ހދ. ކުރިނބީގެ ބަނދަރު ބޮޑުކުރުމުގެ މަސައްކަތް ހުއްޓިފައި އޮތުމުން، ދެ ބަނދަރު ގުޅުވާލާ ޓީ-ޖެޓީ ސަރަހައްދު އެ ރަށުގެ ރައްޔިތުން ނިކުމެ ކޮނެފި އެވެ.
އެ ރަށުން ވާހަކަ ދެެއްކި މީހަކު މިއަދު ބުނީ، ބަނދަރު ބޮޑުކުރަން 2022 ވަނަ އަހަރު އެމްޓީސީސީއާ ހަވާލުކުރި ފަހުން އެ ތަން ކޮނެފައިވާ ކަމަށެވެ. ނަމަވެސް، މަސައްކަތް ކުރިއަށް ނުދާތީ ރަށުގެ ބަޔަކު ނުކުމެ، އެ ދެ ބަނދަރު ގުޅުވާލާފައިވާ ޓީޖެޓީގެ ސަރަހައްދު ކޮނެފައިވާ ކަމަށް އޭނާ ބުންޏެވެ.
"ހަޅަޖަހާ މޫސުމުގައި ބަނދަރުގައި އުޅަނދުތައް ބާއްވައިގެން އުޅެން އުނދަގޫ ވަރަށް. އެހެންވެ، އަލަށް ހަދާ ބަނދަރާ ދިމާލުގައި ބާއްވަން ވެގެން އެ ދެމެދު ސާފުކުރީ ފުން ތަނެއްގައި ބާއްވަން،" ރަށުން ވާހަކަދެއްކި މީހާ ބުންޏެވެ.
އޭނާ ބުނިގޮތުގައި ބަނދަރު ހަދަން ގެންގުޅޭ ބައެއް ސާމާނު ވެސް އެ ރަށުން މިހާރު ގެންގޮސްފައިވާ ކަމަށެވެ.
ކުރިނބީ ކައުންސިލްގެ ރައީސް އަބްދުﷲ އަސްލަމް ވިދާޅުވީ ބަނދަރުގެ މަސައްކަތް ނުނިމި މިހާރު ދިގުލަނީ އެ ތަނުގެ ޑިޒައިނަށް ބަދަލު ގެންނާތީ ކަމަށެވެ. އެ ތަނުގެ ކޮންސެޕްޓް ބަދަލުކުރުމުގެ މަސައްކަތް ކުރަމުން އަންނަ ކަމަށް ކޮންސްޓްރަކްޝަން މިނިސްޓްރީން އަންގާފައިވާ ކަމަށް އަސްލަމް ވިދާޅުވި އެވެ.
ނޭކުރެންދޫގައި ވެސް ބަނދަރު ހެދުމުގެ މަސައްކަތް ކުރަމުން އަންނާތީ ބައެއް ސާމާނުތައް އެ ރަށަށް ބަދަލުކުރީ މަސައްކަތް އަވަސްކުރަން ކަމަށް އޭނާ ވިދާޅުވި އެވެ.
"ބަނދަރުގެ މަސައްކަތްތައް މަޑުޖެހިފައި އޮތީމަ ނޭކުރެންދޫ ބަނދަރު ހަދަން ސްޕީޑް އަވަސްކުރަން ފޮނުވީ." އޭނާ ވިދާޅުވި އެވެ.
އެ ކައުންސިލުން ކޮންސްޓްރަކްޝަން މިނިސްޓްރީއަށް މިދިޔަ އޮކްޓޯބަރު މަހު ފޮނުވި ސިޓީގައި ބުނީ ބަނދަރުގެ އެއްގަމު ތޮށިން ބޮޑު ބައެއް ހަލާކުވެފައިވާތި ބަނދަރުން ރަށަށް އަރައި ފައިބަން ބޭނުން ކުރަނީ އެންމެ ސިޑިއެއް ކަމަށެވެ.
އާއްމު ހާލަތްތަކުގައި ރަށަށް މުދާ ބާލަން ޖެހިއްޖެނަމަ އުޅަނދުތައް ބަނދަރުން ނެރެ، މުދާ ހުސްކުރުމަށް ފަހު އަލުން ބަނދަރަށް ވައްދަން ޖެހުމުން އާއްމު ރައްޔިތުންގެ ކަންބޮޑުވުންތައް އެބަހުރި ކަމަށް ވެސް ސިޓީގައި ބުންޏެވެ.
ކުރިނބީގައި މި ވަގުތު ކުޑަ ދެ ދޯންޏާއި ޑިންގީތައް ގެންގުޅެ އެވެ.
