ލިބޭ ޑޮލަރުގެ ބޮޑު ބައެއް ދޭނީ ބޭންކުތަކަށް، ރިޒާވް އާއި އާންމުންނަށް ވެސް ފައިދާ ކުރާނެ: ގަވަރުނަރު

ރިސޯޓުތަކާއި ގެސްޓް ހައުސްތަކަށް ލިބޭ ޑޮލަރު ބޭންކުތަކުން މާރުކުރަންޖެހޭ ގޮތަށް ހެދުމުން ދައުލަތުގެ ޑޮލަރު ރިޒާވް ރަނގަޅުވުމުގެ އިތުރުން އާންމުންނަށް ވެސް އޭގެ މަންފާ ކުރާނެ ކަމަށް މަރުކަޒީ ބޭންކުގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެ އެވެ.

ރިސޯޓުތަކާއި ގެސްޓް ހައުސްތަކަށް ލިބޭ ޑޮލަރު ބޭންކުތަކުން މާރުކުރަންޖެހޭ ގޮތަށް މިހާރު ހަދާފައިވާ ގަވާއިދަށް ގާނޫނީ ބާރު ދިނުމަށް، "ބޭރު ފައިސާއާބެހޭ ބިލް"ގެ ނަމުގައި އެކުލަވާލާފައިވާ ބިލާ ބެހޭ މައުލޫމާތު ނޫސްވެރިންނާ ހިއްސާކުރައްވަމުން ގަވަރުނަރު ވިދާޅުވީ، ރިޒާވް ރަނގަޅު މިންވަރެއްގައި ހިފެހެއްޓުމުގެ ގާނޫނީ ޒިންމާ، އެމްއެމްއޭ އިން އިސްނަގައިގެން އެންމެ އެކަށީގެންވާ ގޮތެއްގައި ނަގާފައި ނުވާ ކަމަށެވެ.

"އަޅުގަނޑުމެންގެ ރިޒާވް މިއޮތީ ވަރަށް ބޮޑަށް ޕެސިވްކޮށް، ސަރުކާރަށް އެކަނި. އޭގެ ބަދަލުގައި އަޅުގަނޑުމެން މި ބަލަނީ އެކްޓިވްލީކޮށް ރިޒާވް އިތުރުކުރަން އިންޑަސްޓްރީއާ ގުޅިގެން މަސައްކަތް ކުރަން،" ޑޮލަރު މާރުކުރަން މަޖުބޫރު ކުރުވުމަކީ ރިޒާވަށްޓަކައި އިސްވެ އަޅާ ފިޔަވަޅެއް ކަން ފާހަގަކުރައްވައި މުނައްވަރު ވިދާޅުވި އެވެ.

މި ފިޔަވަޅުގެ ސަބަބުން ވިޔަފާރިތަކަށާއި އާންމުންނަށް މިހާރު ކުރިމަތިވެފައި އޮތް ޑޮލަރުގެ ތާށިކަމަށް ހައްލެއް ލިބޭނެ ކަމާ މެދު ފެންމަތިވެފައިވާ ސުވާލަށް ވެސް ގަވަރުނަރު މިއަދު ޖަވާބު ދެއްވި އެވެ.

މި ފިޔަވަޅާ އެކު، ލިބޭ ޑޮލަރުގެ 40 ޕަސެންޓު ބަހައްޓާނީ އޭނާ ވިދާޅުވި ގޮތުގައި ބޭންކުތަކުގެ އަމިއްލަ ބޭނުމަށެވެ. އެމްއެމްއޭގައި ބަހައްޓާ އަދަދުން ބައެއް ވެސް ބޭންކުތަކަށް ދޫކުރާނެ ކަމަށް މުނައްވަރު ވިދާޅުވި އެވެ.

އާންމުންގެ އިތުރުން، ގަވަރުނަރު ވިދާޅުވި ގޮތުގައި، ރިސޯޓުތަކާއި ގެސްޓް ހައުސްތަކަށް ބޭނުންވާ ޑޮލަރު ވެސް އޭރުން ބޭންކުތައް މެދުވެރިކޮށް ލިބޭނެ އެވެ. އެއާ އެކު، މިހާރު ރާއްޖޭގައި އުފެދިފައި އޮތް ޑޮލަރުގެ ކަޅު ބާޒާރުގެ މައްސަލަ ހައްލުވާނެ ކަން އޭނާ ފާހަގަކުރެއްވި އެވެ.

"އުންމީދަކީ ދިވެހިންނަށް ޑޮލަރު ލިބޭނޭ ގޮތަކަށް ހެދުން. އިންފޯމަލް މާކެޓަށް ނޫނޭ ދެން ދާން ޖެހޭނީ، ބޭންކުތަކުންނޭ ޑޮލަރު ލިބޭނީ،" ގަވަރުނަރު ވިދާޅުވި އެވެ.

ރޭޓިން ރަނގަޅުވާނެ، އިންވެސްޓަރުންނަށް ވެސް ފައިދާ ކުރާނެ

ޓޫރިޒަމް ސިނާއަތުން ނަގާ ޓެކްސްތަކާއި އެއާޕޯޓު ޑިވެލޮޕްމަންޓު ފީ މި ފަހުން ބޮޑުކުރުމުގެ މައްޗަށް ޑޮލަރު މާރުކުރަން މަޖުބޫރު ކުރުމުން، ބޭރުގެ އިންވެސްޓަރުން ރާއްޖޭގައި އިންވެސްޓު ކުރަން ފަސްޖެހޭނެ ކަމަށް ބުނެ ފާޅުކުރަމުންދާ ކަންބޮޑުވުންތަކަށް ވެސް މުނައްވަރު މިއަދު ޖަވާބު ދެއްވި އެވެ.

އޭނާ ވިދާޅުވި ގޮތުގައި، ޑޮލަރު މާރުކުރުމަށް މި ގެނައި ބަދަލުގެ ސަބަބުން ރިޒާވް އިތުރުވެ، ރާއްޖޭގެ ކްރެޑިޓް ރޭޓިން އަށް ވެސް އޭގެ ހެޔޮ އަސަރު ކުރާނެ އެވެ.

އޭގެ ތަފްސީލު ދެއްވަމުން، ގަވަރުނަރު ވިދާޅުވީ، ފިޗް އާއި މޫޑީސް ފަދަ ބޭރުގެ ރޭޓިން އެޖެންސީތަކުން ވެސް ގައުމެއްގެ މާލީ ހާލަތު ވަޒަންކުރަން ބަލާ އެންމެ ބޮޑު އެއް މިންގަނޑަކީ ރިޒާވްގައި ހުންނަ އަދަދު ކަމަށެވެ.

ކްރެޑިޓް ރޭޓިން ރަނގަޅުވުމުން، އާންމުކޮށް ރޭޓިން އަށް ބަލައިގެން އިންސްޓުކުރާ ބޭރުގެ އިންވެސްޓަރުން ރާއްޖޭގައި އިންވެސްޓުކުރަން ޝައުގުވެރިކަން ބޮޑުވާނެ ކަން އޭނާ ފާހަގަކުރެއްވި އެވެ.

އެމްއެމްއޭ އިން އާންމުކުރި ގަވާއިދަށް ޓޫރިޒަމް ދާއިރާގެ ބޮޑެތި ބައެއް ވިޔަފާރިތަކުން ވަނީ ދެކޮޅު ހަދައިފަ އެވެ. އެ ގަވައިދުގައި ބުނާ ގޮތަށް އަމަލު ނުކުރެވޭނެ ކަމަށް ވެސް ވަނީ ބުނެފަ އެވެ.

އެކަމާ ގުޅިގެން ކުރި ސުވާލަކަށް ޖަވާބު ދެއްވަމުން ގަވަރުނަރު ވިދާޅުވީ، ރިސޯޓުތަކުން ފާޅުކުރާ އެންމެ ބޮޑު ކަންބޮޑުވުމަކީ ޓޫރިސްޓުންގެ އަތުން ލިބޭ ޑޮލަރަށް ވުރެ އިތުރަށް ބޭންކުތަކަށް މާރުކުރަންޖެހުން ކަމަށެވެ.

އެކަމަކު، މަދު ރިސޯޓަކުން ފިޔަވައި އެ ކަންބޮޑުވުމަށް ބާރު ލިބޭ އެއްވެސް ހިސާބެއް އެމްއެމްއޭއާ ހިއްސާކޮށްފައި ނުވާ ކަން މުނައްވަރު ހާމަކުރެއްވި އެވެ.

"ޓޫރިޒަމް އިންޑަސްޓްރީން ތިޔަ ފާހަގަކުރެއްވި ކޮންސާންސްތައް އަޅުގަނޑުމެންނަށް ފޮނުވި ސިޓީތަކުގައި ފާހަގަކޮށްފައި އެބަހުރި. ޑޭޓާގެ ގޮތުން އަދި ވަރަށް މަދު ބަޔަކު ހުރީ ޝެއާ ކޮށްފައި. އެހެންވީމާ އަޅުގަނޑުމެން ޖެހޭނީ ގަވާއިދުގެ ތެރެއިން މިކަން ދިރާސާ ކުރަން،" ގަވަރުނަރު ވިދާޅުވި އެވެ.

ނަމަވެސް، އޭނާ ވިދާޅުވި ގޮތުގައި، މިހާރު އޮތް ގަވާއިދުގައި ވެސް އަދި އެކުލަވާލާފައިވާ ބިލްގައި ވެސް އެފަދަ ހާލަތްތަކުގައި ހާއްސަ އިސްތިސްނާތަކެއް ވަނީ ދީފަ އެވެ.

ޑޮލަރު މާރުކުރުމުން އިސްތިސްނާވާ ހާލަތްތަކުގެ ތެރޭގައި:

- 24 ގަޑިއިރު ހޭދަނުކުރާ ޓޫރިސްޓުން.

- އުމުރުން ދެ އަހަރުން ދަށުގެ ކުޑަކުދިން.

- ހިލޭ ނުވަތަ ކޮމްޕިލެމްޓަރީކޮށް ތިބޭ މީހުން.

މީގެ އިތުރުން، 50 އެނދަށް ވުރެ ގިނަ ވިޔަސް މަދުވިޔަސް މީހުން ދިރިއުޅޭ ރަށެއްގައި ހުންނަ ޓޫރިސްޓު ހޮޓާތައް ބީ ކެޓަގަރީ އަށް ވަނީ ބަދަލުކޮށްފަ އެވެ. އޭރުން އެ ތަންތަނުން މާރުކުރަން ޖެހޭނީ ބޮލަކަށް 25 ޑޮލަރުގެ ރޭޓުންނެވެ. ބޭރުގައި ރަޖިސްޓަރީ ކޮށްފައިވާ ޓޫރިސްޓު އުޅަނދުތައް ވަނީ މި ކަންކަމުން އިސްތިސްނާކޮށްފަ އެވެ.

ކެޓަގަރީ "އޭ" ގައި ހިމެނޭ، ރިސޯޓުތަކާއި ހޮޓާތަކާއި ޓޫރިސްޓް އުޅަނދުތައް ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޑޮލަރު މާރުކުރަން ލާޒިމްވެ އެވެ. އަދި ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.