އިންޑިއާގެ ތަޣައްޔަރު ވައިން ރާއްޖެ ފުސްވެއްޖެ

އުތުރު އިންޑިއާގެ ވައި ތަޣައްޔަރުވުމުގެ އަސަރު ރާއްޖެއަށް ކުރަން ފަށައިފި އެވެ.

ޖައްވުގެ ނުސާފުކަން އަންދާޒާކުރާ ނިޒާމު "އައިކިއު އެއާ" އިން ދައްކާ ގޮތުގައި، މިއަދު މެންދުރު މާލޭގެ ވައިގެ ކޮލިޓީ ހުރީ 94 ގަ އެވެ. އެއީ މޮޑަރޭޓް ލެވަލް އެވެ. އެކަމަކު، މާލެއާ ކައިރީގައި އޮންނަ ވިލިމާލޭގެ ވައިގެ ކޮލިޓީ ހުރީ 139 ގަ އެވެ. އެއީ ސިއްހަތަށް ނުރައްކާވާ މިންވަރެކެވެ. އެ މިންވަރުގައި ހުންނަ ނަމަ ހައި ރިސްކް މީހުން ހާއްސަ ސަމާލުކަމެއް ދޭން ޖެހޭނެ އެވެ.

"އައިކިއު އެއާ" އިން ދައްކާ ގޮތުގައި، މިދިޔަ ހަފުތާއިން ފެށިގެން ރާއްޖެ ސަރަހައްދުގެ ޖައްވު ވަނީ ތަޣައްޔަރުވާން ފަށައިފަ އެވެ. އަދި މި ވަގުތު، ހޭޒްގެ އަސަރު އެންމެ ބޮޑަށް ކުރަނީ އިންޑިއާއާ ރާއްޖޭން އެންމެ ކައިރީގައި އޮންނަ އުތުރުގެ ސަރަހައްދުތަކަށެވެ.

މިއަދު މެންދުރު މާލެ ސަރަހައްދުގައި އެއާ ކޮލިޓީ ހުރި މިންވަރު.

މިހާރު އާންމުކޮށް ކޮންމެ އަހަރަކު ވެސް، ޑިސެމްބަރު މަހު ރާއްޖެއަށް، ޖައްވު ތަޣައްޔަރުވުމުގެ ސަބަބުން ހޭޒް ނުވަތަ ފުސްކަމުގެ އަސަރު ކުރެ އެވެ.

އެކަމަކު، މީގެ ކުރީ އަހަރުތަކުގައި ހޭޒްގެ އަސަރު ރާއްޖެއަށް ކުރީ އިރުވައި މޫސުމުގެ އުތުރު ހަޅައިގައި ބޭ އޮފް ބެންގަލްގެ ކަނޑުން އަންނަ ވަޔާ އެކުގަ އެވެ. ނަމަވެސް، މި އަހަރު އިރުވައި މޫސުމުގެ ހަޅަ ޖަހަން ފެށުމުގެ ކުރިން ހޭޒްގެ އަސަރު ފެންނަން މިހާރު ވަނީ ފަށައިފަ އެވެ. މިފަހަރު ތަޣައްޔަރު ވައި އަންނަނީ އަރަބި ކަނޑުންނެވެ. އޭގެ، ސަބަބެއް ކަމަށް ބެލެވެނީ އުތުރު އިންޑިއާގެ ސަރަހައްދުގައި އުފެދުނު ބާރުގަދަ ތޫފާން "ފެންގާލް"ގެ ވައިގެ މިސްރާބު ހުރި ގޮތެވެ.

އިންޑިއާގެ ވެރިރަށް ނިއު ދިއްލީގައި މިދިޔަ މަހު ވައި ނުސާފުގެ ފުސްވެފައި. -- ފޮޓޯ: އޭއެފްޕީ

އުތުރު އިންޑިއާގެ ސަރަހައްދުތަކުން އަންނަ މި ތަޣައްޔަރު ވައިގައި އެކުލެވިގެން ވަނީ ހިރަފުހާއި ކާރުހާނާތަކުން އަރާ ދުމެވެ. ދުން ގިނަވެ، ފުސްވުމުގެ ސަބަބުން، ލޮލަށް ފެންނަ ދުރުމިން ދަށްވެ އެވެ. އަދި އެކަމުގެ ސަބަބުން ދަތުރުފަތުރު ކުރުމަށް ވެސް އުނދަގޫވެ އެވެ.

މިދިޔަ މަހުން ފެށިގެން އިންޑިއާގެ ވެރިރަށް ނިއު ދިއްލީގައި އާދަޔާ ހިލާފަށް ދުން ބޯވެ، ވަރަށް ބޮޑަށް ވައި ތަޣައްޔަރުވުމާ ގުޅިގެން، ސްކޫލުތަކާއި އޮފީސްތައް ވެސް ބަންދުކުރި އެވެ.

ނިއު ދިއްލީ ހިމެނެނީ، އެންމެ ބޮޑަށް ވައި ނުސާފުވެފައިވާ ސިޓީތަކުގެ ތެރޭގަ އެވެ. ކާރުހާނަތަކުން ބޭރުކުރާ ދުންތަކާއި އެއްގަމު އުޅަނދުތަކުން ބޭރުކުރާ ދުމުގެ އިތުރުން ދަނޑުބިންތަކުގައި އަންދާ އެންދުންތަކުން ބޭރުވާ ދުމުގެ ސަބަބުން، ދިއްލީގެ ޖައްވު އަބަދުމެ ހެން އޮންނަނީ ތަޣައްޔަރުވެފަ އެވެ.