ފިޔަވަޅުތަކާ އެކު އާސަންދަ އާއި ސަބްސިޑީ ހަރަދު ކުޑަވާން ފަށައިފި

ދައުލަތުގެ ހަރަދަށް އެންމެ ބޮޑު ބުރައަކަށް ވެފައިވާ އާސަންދަ އާއި ސަބްސިޑީ ދިނުމުގައި ވަމުންދާ އިސްރާފް ކުޑަކުރަން ސަރުކާރުން އަޅަން ފަށާފައިވާ ފިޔަވަޅުތަކުން ހަރަދު ކުޑަވާން ފަށާފައިވާ ކަމަށް މާލީ ހިސާބުތަކުން ދައްކައިފި އެވެ.

ފިނޭންސް މިނިސްޓްރީން ކޮންމެ ހަފްތާއަކު އާންމުކުރާ ތަފާސްހިސާބުތައް ދައްކާ ގޮތުން، މި މަހުގެ ފަސް ވަނަ ދުވަހާ ހަމައަށް، ހިންގުމުގެ ހަރަދުގެ ތެރޭގައި ހިމެނޭ އާސަންދަ އާއި ސަބްސިޑީ ދޭން ކުރި ހޭދަ ވަނީ މިދިޔަ އަހަރާ ބަލާއިރު ވަރަށް ބޮޑަށް ދަށްވެފަ އެވެ.

މިގޮތުން، މި އަހަރު އާސަންދައަށް ހަރަދު ކުރި 1.88 ބިލިއަން ރުފިޔާ އަކީ މިދިޔަ އަހަރާ އަޅާބަލާއިރު، ގާތްގަނޑަކަށް 101 މިލިއަން ރުފިޔާ މަދު އަދަދެކެވެ.

އާސަންދަ އެކޭ އެއްފަދައިން، ސަބްސިޑީ ދިނުމަށް ދައުލަތުން ކުރާ ހަރަދު ވެސް ވަނީ މިދިޔަ އަހަރާ އަޅާބަލާއިރު، ދަށްވެފަ އެވެ. މިދިޔަ އަހަރު އެހާތަނަށް ސަބްސިޑީ ދޭން 3.68 ބިލިއަން ރުފިޔާ ހަރަދުކޮށްފައިވާ އިރު، މި އަހަރު އެ ހަރަދު ހުރީ 3.44 ބިލިއަން ރުފިޔާގަ އެވެ.

މިއީ، ގާތްގަނޑަކަށް 233 މިލިއަން ރުފިޔާގެ ދަށްވުމެކެވެ.

ކޮންމެ އަހަރަކު ވެސް ބަޖެޓުކުރާ އަދަދަށް ވުރެ އެތައް މިލިއަން ރުފިޔާއެއް އިތުރަށް އާސަންދަ އާއި ސަބްސިޑީއަށް އިސްރާފުވަމުންދާތީ، މި ސަރުކާރުން ވަނީ އެ ދެ ނިޒާމް އިސްލާހު ކުރުމުގެ ފިޔަވަޅުތަކެއް ރާވައި، ތަންފީޒުކުރަން ފަށައިފަ އެވެ.

މިގޮތުން، ރާއްޖޭގައި އާންމުކޮށް ބޭނުންކުރާ 250 ބޭހެއްގެ އަގު ކޮންޓްރޯލްކޮށް، އެސްޓީއޯއާ ގުޅިގެން ގަނޑުކޮށް ބޭސް ގެނައުމުގެ ނިޒާމަކަށް ވަނީ ބަދަލުކޮށްފަ އެވެ.

ފިޔަވަހިތަކަކަށް ބަހާލައިގެން އަގު ކޮންޓްރޯލް ކުރުމުން ހަމައެކަނި މި ބޭސްތަކުން އަހަރަކު ބޭހަށް ކުރޭ ހޭދައިން 220 މިލިއަން ރުފިޔާ އަށް ވުރެ ބޮޑު އަދަދެއް ސަލާމަތް ވާނެ އެވެ. ދެމެހެއްޓެނިވި ގޮތަކަށް އެ ނިޒާމު ހަރުދަނާކުރަން މުހިއްމު އިތުރު ބަދަލުތަކެއް ގެންނަން ވެސް ވަނީ ތައްޔާރުވެފަ އެވެ.

އޭގެތެރޭގައި އާސަންދައަށް ދައުލަތުން ކުރާ ހޭދަ ކުޑަކުރުމަށްޓަކައި އެންމެ މުއްސަނދިންގެ އަތުން އަންނަ އަހަރުން ފެށިގެން ޕްރީޕޭއެއް ނުވަތަ ވަކި އަދަދެއް ދައްކަންޖެހޭ ޖެހޭ ގޮތަށް ބަދަލުކުރުމާއި އެންމެ ގިނައިން އާމްދަނީ ލިބޭ މީހުން އައުޓްޕޭޝަންޓް ހިދުމަތްތައް ހޯދުމާއި އެސެންޝަލް ނޫން ބޭސް ގަންނަ އިރު ބިލްގެ ވަކި އަދަދެއް ކޮންޓްރިބިއުޝަނެއްގެ ގޮތުގައި ދައްކަން ޖެހޭ ގޮތަށް ބަދަލުކުރުން ހިމެނެ އެވެ.

އާސަންދަ އަށް ގެންނަ ހުރިހާ ބަދަލުތަކުން 600 މިލިއަން ރުފިޔާ ސަލާމަތް ކުރެވޭނެ ކަމަށް ފިނޭންސް މިނިސްޓްރީން ވަނީ ލަފާކޮށްފަ އެވެ.

އާސަންދައިގެ އިތުރުން، ސަބްސިޑީ ދިނުމުގެ ނިޒާމަށް ވެސް ބަދަލު ގެންނަން ވަނީ ނިންމައިފަ އެވެ. އަންނަ އަހަރު ގެންނަން ރާވާފައިވާ މައިގަނޑު ބަދަލަކީ، ސަބްސިޑީ ދިނުން ޓާގެޓަޑް ސަބްސިޑީ ނިޒާމަކަށް ބަދަލުކުރުމެވެ.

އަންނަ އަހަރުގެ ބަޖެޓުގެ ތަފްސީލީ ރިޕޯޓުގައިވާ ގޮތުން ސަބްސިޑީގެ ގޮތުގައި އެންމެ ފަގީރު އާބާދީގެ 20 ޕަސެންޓްގެ އެވްރެޖް ގޭބިސީއަކަށް މަހަކު 2،450ރ. ޖަމާކޮށްދޭނެ އެވެ. އޭގެ އިތުރުން އާބާދީގެ ބޮޑު ބަޔަކަށް ތެލާއި ކަރަންޓާއި ކާޑު އަދި ނަރުދަމާގެ ސަބްސިޑީ ލިބޭ ގޮތަށް ވަނީ ހިމަނައިފަ އެވެ.