ސިޓީ ކައުންސިލުން ބުނީ އަލިފާނުގެ ހާދިސާގައި ގެއްލުން ލިބުނު ވައިޓަލް ރަޖިސްޓްރޭޝަން ސެކްޝަނުން ދެމުން އައި ހިދުމަތްތަކުގެ 85 ޕަސެންޓް މަސައްކަތްތައް އަންނަ ހަފުތާގައި އަލުން ފެށޭވަރު ވާނެ ކަމަށް.
އަލިފާނުގެ ހާދިސާ ހިނގި ދުވަހު ސިޓީ ކައުންސިލްގެ އޮފީސް އިމާރާތުގެ ތެރެއިން ބައެއް ލިޔެކިޔުންތައް ނެރުމުގެ މަސައްކަތް ކައުންސިލް މުވައްޒަފުން ކުރަނީ.-- ފޮޓޯ: ނިޝާން އަލީ | މިހާރު
18 ޑިސެމްބަރ 2024 - 12:42
3 comments
މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ގެއްލުނު މުހިންމު ލިޔެކިޔުންތަކުގެ ޑިޖިޓަލް ކޮޕީ އާއި އިތުރު މުހިންމު ޑޭޓާ މާލޭ ސިޓީ ކައުންސިލަށް ދޭން ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) އާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އެއްބަސްވެއްޖެ އެވެ.
މާލޭ ސިޓީ ކައުންސިލުން މިއަދު ބޭއްވި އާންމު ޖަލްސާގައި މޭޔަރު އާދަމް އާޒިމް ވިދާޅުވީ އަލިފާނުގެ ހާދިސާގައި ގެއްލުނު ލިޔެކިޔުންތަކުގެ ކޮޕީ ހޯދުމަށް ޑީއެންއާރު އާއި ޑީޖޭއޭއާ އެކު ބައްދަލުވުމެއް ބާއްވާފައިވާ ކަމަށެވެ. އެކަމުގައި އެ އިދާރާތަކުގެ ފުރިހަމަ އެއްބާރުލުން ސިޓީ ކައުންސިލަށް ލިބޭނެ ކަމުގެ ޔަގީންކަން ދީފައިވާ ކަމަށް އާޒިމް ވިދާޅުވި އެވެ.
އާޒިމް ވިދާޅުވީ މާލޭގެ ގެތަކުގެ ރަޖިސްޓްރީ އާއި ގެދޮރާ ގުޅޭ ގަޒިއްޔާތަކުގެ ޑިޖިޓަލް ކޮޕީ ޑީޖޭއޭގައި އެބަހުރި ކަމަށާއި އެ މައުލޫމާތު ސިޓީ ކައުންސިލަށް ފެންނާނެ އިންތިޒާމު ހަމަޖައްސައިދޭން ޑީޖޭއޭ އިން އެއްބަސްވެފައިވާ ކަމަށެވެ. ސިޓީ ކައުންސިލްގެ ޑޭޓާބޭސްގައި މިހާރު ހުރި މައުލޫމާތާއި ޑީޖޭއޭ އާއި ޑީއެންއާރުން ފޯރުކޮށްދޭ ޑޭޓާއާ އެކު، އަމާޒަކީ ކުރިއަށް އޮތްތަނުގައި ސިޓީ ކައުންސިލްގެ ހުރިހާ މައުލޫމާތެއް ޑިޖިޓަލްކޮށް ބެލެހެއްޓޭނެ އިންތިޒާމު ހަމަޖެއްސުން ކަމަށް ވެސް އާޒިމް ވިދާޅުވި އެވެ.
"އެ ބޭފުޅުން [ޑީޖޭއޭ]ގެ އަތުގައި ގިނަ މައުލޫމާތުތަކެއް އެބަހުރި، ކޯޓުތަކުގެ ނިންމުންތަކާ އެއްޗެހި، ޑިޖިޓަލްކޮށް އެބަހުރި ހުރިހާ އެއްޗެއް. އަޅުގަނޑުމެންނަށް އެ ބޭފުޅުން ވިއު އެކްސެސްއެއް ދީގެން، އަޅުގަނޑުމެންގެ އައިޓީ ޓީމާއި އެ ބޭފުޅުންގެ އައިޓީ ޓީމް އެއްކޮށް މަސައްކަތްކޮށްގެން ކުރިއަށް ދާ ކަހަލަ ގޮތަކަށް މި ދަނީ،" އާޒިމް ވިދާޅުވި އެވެ.
އަލިފާނުގައި ސިޓީ ކައުންސިލް އިމާރާތަށް ލިބުނު ގެއްލުން މޭޔަރު އާދަމް އާޒިމާއި ކައުންސިލަރު ސައިފް ފާތިހު ބައްލަވާލައްވަނީ.-- ފޮޓޯ: ސިޓީ ކައުންސިލް
ޑެޕިއުޓީ މޭޔަރު އަހްމަދު ނަރީޝް ވިދާޅުވީ ޑީޖޭއޭ އާއި ޑީއެންއާރުއާ އެކު ބޭއްވި ބައްދަލުވުންތަކުން ލިބުނު އެންމެ އުފާވެރި ޚަބަރަކީ އުފަންދުވަހުގެ ސެޓްފިކެޓް ހެދުމަށް ބޭނުންވާ ކައިވެނީގެ ސެޓްފިކެޓްގެ ޑިޖިޓަލް ކޮޕީ، ކައުންސިލަށް އެ ދެ އިދާރާ މެދުވެރިކޮށް ލިބުން ކަމަށެވެ. އޭރުން އުފަންދުވަހުގެ ސެޓްފިކެޓް ހެދުމަށް އާންމުންނަށް ކައިވެނީ ސެޓްފިކެޓްގެ ކޮޕީ ކައުންސިލަށް ހުށަހަޅަން ނުޖެހޭނެ ކަމަށް ނަރީޝް ވިދާޅުވި އެވެ.
ކައިވެނީގެ ސެޓްފިކެޓް ހިފައިގެން [ކައުންސިލަށް] ނުގޮސް، ޑިޖިޓަލް ކޮޕީ ބަލައިގެން ވެރިފައިކޮށްފައި، އުފަންދުވަހުގެ ސެޓްފިކެޓަށް ހުށަހަޅާ ދުވަހު އެ މީހަކަށް ޑިޖިޓަލްކޮށް [އެ ސެޓްފިކެޓް] ފޮނުވާލެވޭނެ އިންތިޒާމު ހަމަޖެހޭނެ: ނަރީޝް، ޑެޕިއުޓީ މޭޔަރު
"ކައިވެނީގެ ސެޓްފިކެޓް ހިފައިގެން [ކައުންސިލަށް] ނުގޮސް، ޑިޖިޓަލް ކޮޕީ ބަލައިގެން ވެރިފައިކޮށްފައި، އުފަންދުވަހުގެ ސެޓްފިކެޓަށް ހުށަހަޅާ ދުވަހު އެ މީހަކަށް ޑިޖިޓަލްކޮށް [އެ ސެޓްފިކެޓް] ފޮނުވާލެވޭނެ އިންތިޒާމު ހަމަޖެހޭނެ،" އޭނާ ވިދާޅުވި އެވެ.
ޑީއެންއާރުގައި ހުރި މާލޭގެ ރަށްވެހިގެން ރަޖިސްޓްރީތަކުގެ ޑިޖިޓަލް ކޮޕީ ސިޓީ ކައުންސިލަށް ފެންނާނެ އިންތިޒާމު ހަމަޖައްސައިދޭން ވެސް އެ އިދާރާއިން އެއްބަސްވެފައިވާ ކަމަށް ނަރީޝް ވިދާޅުވި އެވެ.
"އަޅުގަނޑުމެންގެ ލޭންޑް ސެކްޝަނުން ގެއްލިގެން މި ދިޔަ އެންމެ ޒަމާންވީ ރަޖިސްޓްރީތައް، އޭގެ އެންމެ އިހުގެ ގަޒިއްޔާތަކުން ފެށިގެން އެންމެ ފަހާ ހަމައަށް، އެ ބޭފުޅުން [ޑީޖީއޭ]ގެ އަތުގައި ކޮޕީ ހުރި ހުރިހާ އެއްޗެއް، އަޅުގަނޑުމެންނަށް ޑިޖިޓަލް ކޮޕީ ދެއްވަން އެއްބަސްވި،" ނަރީޝް ވިދާޅުވި އެވެ.
ސިޓީ ކައުންސިލްގައި ހުރި ބައެއް ލިޔެކިޔުންތައް އަނދާފައި.-- ފޮޓޯ: ސިޓީ ކައުންސިލް
ނަރީޝް ވިދާޅުވީ، މި އެހީ ލިބުމާ އެކު، އަލިފާނުގެ ހާދިސާގައި ގެއްލުން ލިބުނު ސިޓީ ކައުންސިލްގެ ވައިޓަލް ރަޖިސްޓްރޭޝަން ސެކްޝަނާއި ލޭންޑް ސެކްޝަނުން ކުރިން ދެމުން އައި ހިދުމަތްތަކުގެ 85 ޕަސެންޓް މަސައްކަތްތައް އަންނަ ހަފުތާގައި އަލުން ފެށޭވަރު ވާނެ ކަމަށެވެ.
ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ މި މުހިންމު މައުލޫމާތުތައް ރިކަވާކުރުމަށް ޑީޖޭއޭ އާއި ޑީއެންއާރުން ދިން އެއްބާރުލުން ވަރަށް ބޮޑަށް ފާހަގަކުރައްވައިފަ އެވެ. އަދި އެ ދެ އިދާރާއާ އެކު އެމްއޯޔޫއެއްގައި ސޮއިކުރުމަށް ފަހު، އެއްވެސް ދަތިކަމެއް ނެތި ސިޓީ ކައުންސިލަށް މި މައުލޫމާތު ލިބޭނެ އިންޒާމު ހަމަޖެހޭނެ ކަމަށް އޭނާ ވިދާޅުވި އެވެ.
"ރެސްޕޮންސް ވަރަށް ރަނގަޅަށް ދިޔައީ... އެ ބޭފުޅުން ވަރަށް އޯޕަން މައިންޑެއްގައި އަދި ވަރަށް ޒިންމާދާރުކަމާއި އެހީތެރިކަމާ އެކު، އަޅުގަނޑުމެންނާ މެދުގައި އަމަލުކުރެއްވީ،" ސައިފް ވިދާޅުވި އެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގި ޓިނު ބިލްޑިންގާއި ތިމާވެއްޓާ ބެހޭ މިނިސްޓްރީ ހިންގި މ. ގްރީން ބިލްޑިންގުގައި މިދިޔަ ބުރާސްފަތި ދުވަހު ރޯވި އަލިފާނުގެ ހާދިސާގައި މާލޭ ސިޓީ ކައުންސިލްގެ ވައިޓަލް ރަޖިސްޓްރޭޝަން އޮފީހުގައި ހުރި މުހިންމު، ވަރަށް ގިނަ ލިޔެކިޔުންތަކެއް ވަނީ ގެއްލިފަ އެވެ.
އަލިފާނުގެ ހާދިސާ ހިނގި ދުވަހު ސިޓީ ކައުންސިލްގެ އޮފީސް އިމާރާތުގެ ތެރެއިން ބައެއް ލިޔެކިޔުންތައް ނެރުމުގެ މަސައްކަތް ސިފައިން ކުރަނީ.-- ފޮޓޯ: ނިޝާން އަލީ/ މިހާރު
ވައިޓަލް ރެޖިސްޓްރޭޝަން އޮފީހަކީ އުފަންދުވަހުގެ ސެޓްފިކެޓާއި މަރުވާ މީހުންގެ ރެކޯޑުތަކުގެ އިތުރުން ރަށްވެހިކަމާއި މާލޭގެ ގޯތިތަކުގެ ރަޖިސްޓްރޭޝަން ވެސް ބަލަހައްޓަމުން އައި ސިޓީ ކައުންސިލް ސެކްޝަނެވެ.
ވައިޓަލް ރަޖިސްޓްރޭޝަން އޮފީހުގައި ރޯވުމުން، ކައުންސިލުން މިދިޔަ ބުރާސްފަތި ދުވަހު ވަނީ އެ ތަނުން ދެމުން އައި ހުރިހާ ހިދުމަތެއް ހުޅުމާލޭ އަމިން އެވެނިއުގެ ފުރަތަމަ ފަންގިފިލާގައި ހުންނަ ސިޓީ ކައުންސިލްގެ އޮފީހަށް ބަދަލުކޮށްފަ އެވެ. އެކަމަކު، އަލުން މާލޭގައި އެ ހިދުމަތް ފެށުމަށް، ރޯވި އިމާރާތުގައި ހުރި ލިޔެކިޔުންތައް ވަނީ ގަލޮޅު މަދަރުސާގައި ހުރި ހޯލަކަށް ބަދަލުކޮށްފަ އެވެ.
އެ އޮފީހުގެ މަސައްކަތްތައް މާލޭގައި އަލުން ފެށުމަށް ސަރުކާރުން މިހާރު ވަގުތީ ގޮތުން ތާޖުއްދީން ސްކޫލްގެ ހޯލު ވެސް ހަމަޖައްސައި ދީފަ އެވެ. އަންނަ އާދިއްތަ ދުވަހު އެ ހޯލު ތައްޔާރުކުރުމުގެ މަސައްކަތް ފަށާނެ ކަމަށް ސިޓީ ކައުންސިލުން މިއަދު ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަގުމަތީ ޕާކިންގ
18 December 2024
މަގުމަތީ ޕާކިންގ ވިއްކާފަތިބި މީހުންގެ ރެކޯޑްވެސް ގެއްލުނީތޯ؟
ޖުހާ 2.0
18 December 2024
ހޫނ ތިހެން ބެކަޕް ނުލާ އުޅެންޏާ އަހަރުމެންގެ ރައްޔިތުންކަންވެސް ގެއްލިދާނެ. އަވަހަށް ބޭރުގެ ރެފިއުޖީ ލިސްޓެއްގަ ޖެހެންވީ.
ގޭން
18 December 2024
ބައެއް ސިޓީކައުންސިލްތަކުގައި ޑިޖިޓަލް ފައިލަކީ ފޮރުވައިގެންގެންގުޅޭތަކެތި، ސިއްރު މައުލޫމާތޯ. އެނޫން ޑޮކިއުމެންޓްތަކަކީ އެމީހުނަށް ފެންނަބަޔަކަށް މަންފާއަށްބަލައި އުފައްދާދޭތަކެތި.