ލިސްޓުގެ ބޭރުން ގޯތި ދިން މައްސަލާގައި ހަރުކަށި އަދަބު ދޭން އެމްޑީޕީން ގޮވާލައިފި

ބިންވެރިޔާ ސްކީމުގެ ބޭރުން އެޗްޑީސީން ހުޅުމާލެއިން ގޯތިތަކެއް ދޫކުރި ކަމަށް ބުނާ މައްސަލާގައި އެކަމުގެ ފަހަތުގައި ތިބި އެންމެނަށް ހަރުކަށި އަދަބު ދޭން އިދިކޮޅު އެމްޑީޕީން މިރޭ ގޮވާލައިފި އެވެ.

އެ ޕާޓީން ނެރުނު ނޫސްބަޔާނެއްގައި ބުނީ، އެމްޑީޕީގެ ސަރުކާރުގައި މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ކުރިއަށް ގެންދިޔަ ބިންވެރިޔާ ސްކީމަށް ޝަރުތު ހަމަނުވާ އެތައް ބަޔަކަށް އެޗްޑީސީން ދޮގު ލިޔުން ތައްޔާރުކޮށް، މަކަރާއި ހީލަތުން ބިންތައް ދީފައި ވާތީ، އެ ޕާޓީން ކަންބޮޑުވުން ފާޅުކުރާ ކަމަށެވެ. މި މައްސަލައަކީ މި ސަރުކާރުގެ ތެރޭގައި ކޮރަޕްޝަނާއި ވައްކަން މޫލާފައިވާ މިންވަރު ހާމަވާ އަލިގަދަ ހެއްކެއް ކަމަށް ވެސް އެމްޑީޕީން ބުންޏެވެ.

މި މައްސަލަ ފެންމަތިވުމާ އެކު، މިހާތަނަށް ވެސް އެޗްޑީސީގެ ވެރިންނާ މެދު ސަރުކާރުން އެއްވެސް ފިޔަވަޅެއް އަޅާފައި ނުވުމަކީ ކޮރަޕްޝަނާއި ވައްކަމަށް ސަރުކާރުން ހިތްވަރު ދެމުންދާ ކަމަށް އެމްޑީޕީން ތުހުމަތު ކުރި އެވެ.

ދައުލަތުގެ ލިޔެކިޔުންތަކަށް ބަދަލު ގެނެސްގެން، ގޯތީގެ ރަޖިސްޓަރީ ހަދައި، ހައްގުވެރިން ނޫން އެތައް ބަޔަކަށް ހުޅުމާލެ އިން ބިންތަކެއް ދިން ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް ތުހުމަތު ވާތީ، އެ މަގާމުން އޭނާ ވަކިކޮށް، ގާނޫނީ ފިޔަވަޅު އެޅުމަށް ވެސް އެމްޑީޕީން ގޮވާލި އެވެ.

"އޭގެ އިތުރުން, މި މުއާމަލާތަކީ އެކަކަށް ހިންގޭނެ ފަދަ މުއާމަލާތަކަށް ނުވުމާ އެކު، މި މުއާމަލާތްތަކުގައި ހިމެނޭ ހުރިހާ ފަރާތްތަކަށް ގާނޫނުގައި ބަޔާންކުރާ އެންމެ ހަރުކަށި އަދަބު ދިނުމަށް މި ޕާޓީން ގޮވާލަމެވެ. ހަމަ އެހެންމެ, މި ގޮތަށް އޮޅުވާލައިގެން ދީފައިވާ ބިންތައް އަނބުރާ ނަގައި، ބިންވެރިޔާ ސްކީމްގެ ހައްގުވެރި ފަރާތްތަކަށް ބިންތައް ވީ އެންމެ އަވަހަކަށް ހަވާލުކުރުމަށް ސަރުކާރަށް ގޮވާލަމެވެ،" އެމްޑީޕީގެ ބަޔާނުގައި ބުންޏެވެ.

އެމްޑީޕީން ބުނީ، އެޗްޑީސީ އާއި ސަރުކާރުގެ ހިއްސާ އޮންނަ އެހެނިހެން ކުންފުނިތައް މެދުވެރިކޮށް ވައްކަމާއި ހިޔާނާތުގެ އެތައް އަމަލުތަކެއް ހިންގަމުންދާ ކަމަށް ތުހުމަތު ވާއިރު، ރާއްޖޭގެ ތަހުގީގީ އިދާރާތަކާއި މިނިވަން މުއައްސަސާތަކުން އެއްވެސް ކަމެއް ނުކޮށް ތިބޭތީ އެ ޕާޓީން ހިތާމަކުރާ ކަމަށެވެ.

ރައްޔިތުންގެ މުދަލަށް ހިޔާނާތްތެރިވަމުންދާ މީހުންގެ މައްސަލަތައް ވީހާ ވެސް އަވަހަކަށް ބަލައި، ފިޔަވަޅު އެޅުމަށް ދައުލަތުގެ ހުރިހާ އިދާރާއަކަށް އެ ޕާޓީން ވަނީ ގޮވާލައިފަ އެވެ.

Binveriyaa scheme ge beyrun goathi dhin massalaiga HDC ah fuluhun vadhejje

The most trusted news source in the Maldives

Mihaaru

އެޗްޑީސީގެ މެނޭޖިން ޑިރެކްޓަރު ފަޒުލްގެ ބޭބެ ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލާގެ ތަހުގީގަށް އެޗްޑީސީގެ އޮފީހަށް ފުލުހުން މިއަދު ހަވީރު ވަދެ، އެތަން ފާސްކުރަން ވަނީ ފަށައިފަ އެވެ.

ބިންވެރިޔާ ސްކީމަކީ މާލޭ މީހުންނަށް ގޯތި ދިނުމަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި ސްކީމެކެވެ. އެ ސްކީމްގެ ދަށުން ވަނީ ހުޅުމާލެ އާއި ގުޅިފަޅާއި ގިރާވަރުފަޅުން 9،000 ވުރެ ގިނަ ގޯތި ހިލޭ މާލޭ މީހުންނަށް ދިނުމަށް ނިންމައިފަ އެވެ. އެ ސްކީމްގެ ދަށުން ހުޅުމާލެ 2 އިން ދޭން ނިންމި ހުރިހާ ގޯއްޗެއް ހައުސިން މިނިސްޓްރީން ވަނީ އެ ބިންތައް ލިބުނު މީހުންނަށް މިދިޔަ މަހު ހަވާލުކޮށްފަ އެވެ. އެ ގޯތިތަކުގެ ކަންމުޑި ޖަހައި، އިން ވަކިކޮށްދިނުމުގެ މަސައްކަތް ހަވާލުކުރީ އެޗްޑީސީއާ އެވެ.