މަންމޯހަން ސިންގް އަވަހާރަވުމާ ގުޅިގެން ރައީސް ތައުޒިޔާ ވިދާޅުވެއްޖެ

އިންޑިއާގެ ކުރީގެ ބޮޑުވަޒީރު މަންމޯހަން ސިންގް އަވަހާރަވުމާ ގުޅިގެން، ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.

އިދިކޮޅު ކޮންގްރެސް ޕާޓީގެ ބޭފުޅެއް ކަމަށްވާ ސިންގް އަވަހާރަވީ ސިއްހީ ހާލުކޮޅު ކުއްލިއަކަށް ގޯސްވުމާ ގުޅިގެން ނިއު ދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް) ގައި އެޑްމިޓްކޮށް ފަރުވާ ދެނިކޮށް ރޭގެ ވަގުތެއްގަ އެވެ. އިންޑިއާ ސަރުކާރަށް ގިނަ ދުވަހު ހިދުމަތް ކުރެއްވި އިގްތިސާދީ މާހިރެއް ކަމަށްވާ ޑރ. ސިންގް ވަނީ 2004 ވަނަ އަހަރުން ފެށިގެން 2014 ވަނަ އަހަރާ ހަމައަށް އިންޑިއާގެ ބޮޑުވަޒީރުކަން ކުރައްވައިފަ އެވެ. އިންޑިއާގެ 14 ވަނަ ބޮޑުވަޒީރު ކަމަށްވާ ސިންގް ވަނީ ގައުމުގެ އިގްތިސާދީ ސިޔާސަތުތައް ބައްޓަންކުރެއްވުމުގައި އިސްދައުރެއް އަދާކުރައްވައިފަ އެވެ.

މަންމޯހަން ސިންގް އަވަހާރަވުމާ ގުޅިގެން، ސޯޝަލް މީޑިޔާގައި ހިއްސާކުރެއްވި ޕޯސްޓެއްގައި ރައީސް މުއިއްޒު ވިދާޅުވީ އިންޑިއާގެ ރައްޔިތުންނަށް ކުރިމަތިވެފައިވާ މި ހިތާމަވެރި ދަނޑިވަޅުގައި، އެ މަނިކުފާނާއި ދިވެހި ރައްޔިތުން ބައިވެރިވާ ކަމަށެވެ.

އަދި 2011 ވަނަ އަހަރު މަންމޯހަން ސިންގް ރާއްޖެއަށް ކުރެއްވި ދަތުރުފުޅުގެ ހަނދާން އާ ކުރައްވައި، ރައީސް މުއިއްޒު ވަނީ އެއީ ރާއްޖޭގެ އިގުތިސާދީ އަދި އިޖުތިމާއީ ކުރިއެރުމަށް މުހިންމު ދަތުރުފުޅެއް ކަން ފާހަގަކުރައްވައިފަ އެވެ.

"ކުރިއެރުމާއި ތަރައްގީއަށް ޑރ. ސިންގް ދެއްވި އަހައްމިއްޔަތާއި އެ މަނިކުފާނުގެ 'ލޫކް އީސްޓް ޕޮލިސީ' ހަރުދަނާ ކުރުމަށް ކުރެއްވި މަސައްކަތުން، މުޅި ދެކުނު އޭޝިއާ ސަރަހައްދުގައި ތަރައްގީއާއި ގުޅުންތައް ކުރިއެރުވުމުގައި މުހިންމު ދައުރެއް އަދާކުރި،" ރައީސް ވިދާޅުވި އެވެ.