ޑްރަގާއެކު ހައްޔަރުކުރި މީހަކު، އެ ޑްރަގަކީ އޭނާގެ ބައްޕަގެ އެއްޗެއް ކަމަށް ކޯޓުގައި ބުނެފި އެވެ.
މި މައްސަލާގައި ފުލުހުން ހައްޔަރު ކޮށްފައިވަނީ 23 އަހަރުގެ ދިވެހި ފިރިހެނެކެވެ. އޭނާގެ ބަންދާ ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހަށް ބަންދުކުރަން އިއްޔެ ވަނީ އަމުރުކޮށްފަ އެވެ.
އޭނާއަށް ތުހުމަތު ކުރަނީ މަސްތުވާތަކެތި ބޭނުންކުރުމާއި ގެންގުޅުމާއި ޓްރެފިކް ކުރުމުގެ ތުހުމަތެވެ.
ކޯޓުގައި މީނާ ވަނީ މި ތުހުމަތުތަކަށް އިންކާރުކޮށްފަ އެވެ. އޭނާ ބުނި ގޮތުގައި އޭނާގެ އަތުން ފެނުނު ޑްރަގަކީ އޭނާގެ ބައްޕަގެ ތަކެއްޗެވެ.
ނަމަވެސް، ހައްޔަރުކުރި ވަގުތު އެ ތަކެއްޗަކީ ބައްޕަގެ އެއްޗެއް ކަމަށް އޭނާ ބުނެފައިނުވާ ކަމަށް ފުލުހުން ކޯޓުގައި ބުނެފައިވެ އެވެ.
އޭނާގެ އަތުން ގިނަ އަދަދެއްގެ ޑްރަގާއި ޑްރަގް ބަންދުކުރުމަށް ބޭނުން ބަންދުކުރުމަށް ބޭނުން ކުރާ ތަކެތި ފެނިފައިވާ ކަމަށް ވެސް ފުލުހުން ބުނެފައިވެ އެވެ.