ބޯޓު ވެއްޓުނީ ހަމަލާ ދިނުމުން ކަމަށް ރަޝިޔާއިން އެއްބަސްވާން އަޒަރްބައިޖާނުން ގޮވާލައިފި

އަޒަރްބައިޖާންގެ މަތިންދާބޯޓު ވެއްޓިފައި: އެ ބޯޓު ވެއްޓުނީ ރަޝިޔާގެ ހަމަލާއަކަށް ފަހު ކޮންޓްރޯލް ގެއްލިގެން ކަމަށް އަޒަރްބައިޖާނުން ވަނީ ބުނެފައި. -- ފޮޓޯ: އޭއެފްޕީ

30 ޑިސެމްބަރ 2024 - 06:14

އަޒަރްބައިޖާން އެއާލައިންސްގެ މަތިންދާބޯޓު ވެއްޓުމުގެ ކުރިން ރަޝިއާއިން އެޔަށް ހަމަލާދީފައިވާ ކަމަށާއި އެކަން ފޮރުވަން ރަޝިޔާއިން އެންމެ ފުރަތަމަ މަސައްކަތްކުރި ކަމަށް އަޒަރުބައިޖާންގެ ރައީސް އިލްހާމް އަލިޔޭވް އިއްޔެ ވިދާޅުވެއްޖެ އެވެ.

އަލިޔޭވް ވަނީ އިތުރަށް ކަންކަން ސިއްރު ނުކޮށް މިކަން ހިނގައިދިޔަ ގޮތް ހާމަކޮށް އެކަމަށް އިއުތިރާފް ވުމަށް ރަޝިޔާއަށް ގޮވާލައްވައިފަ އެވެ.

އަލިޔޭވް މި ތުހުމަތުކުރެއްވީ ކަޒަކިސްތާނުގައި އަޒަލްގެ މަތިންދާބޯޓު ވެއްޓި ބޯޓުގައި ތިބި 67 މީހުންގެ ތެރެއިން 38 މީހުން މަރުވިތާ ހަތަރު ދުވަސް ފަހުން ބަކޫ އެއާޕޯޓުގައި ދައުލަތުގެ މީޑިއާއަށް ދެއްވި އިންޓަވިއުއެއްގަ އެވެ.

އަޒަރްބައިޖާންގެ އޮފިޝަލުން ލަފާކުރާ ގޮތުގައި އެ މަތިންދާބޯޓަށް ހަމަލާ އަމާޒުވީ ރަޝިއާގެ ޗެޗްނިއާގެ ވެރިރަށް ގްރޮޒްނީއަށް ޖައްސަން އުޅުމުގެ ތެރޭގައި ރަޝިއާގެ ވައިގެ ދިފާއީ ނިޒާމަކުންނެވެ.

ރަޝިޔާ އަކީ އަޒަރްބައިޖާންގެ އެކުވެރި ގައުމެކެވެ. އެކަމަކު އަލިޔޭވް މި ވާހަކަ ދެއްކެވީ ރަޝިއާގެ ރައީސް ލަޑިމިއާ ޕޫޓިންއާ މި މައްސަލައިގައި ފޯނުން ވާހަކަ ދެއްކެވިތާ އެއް ދުވަސް ފަހުންނެވެ.

ފޯނު ކޯލާ ބެހޭ ގޮތުން ރަޝިޔާއިން ނެރުނު ބަޔާނުގައި ރަޝިޔާގެ އެއާ ޑިފެންސް ސިސްޓަމް އެ ވަގުތު ހުރީ އެކްޓިވޭޓް ކޮށްފައި ކަމަށް ބުންޏަސް ހާދިސާގެ ޒިންމާ އުފުލާ ކަމަށް އެއްވެސް އިޝާރާތެއް ކޮށްފައެއް ނުވެ އެވެ.

"ހަގީގަތަކީ އަޒަރްބައިޖާންގެ މަދަނީ މަތިންދާބޯޓު ރަޝިއާގެ ސަރަހައްދުގެ މަތިން، ގްރޮޒްނީ ސިޓީ ކައިރިން ދަނިކޮށް ހަމަލާ އަމާޒުވެ ހަލާކުވެ، ގާތްގަނޑަކަށް ކޮންޓްރޯލް ގެއްލުނު ކަން،" އަލިޔޭވް ދައުލަތުގެ ޓީވީއަށް ވިދާޅުވި އެވެ.

"އަޅުގަނޑަށް ވެސް އެނގޭ އިލެކްޓްރޯނިކް ވޯފެއާ ސިސްޓަމްތަކުގެ ސަބަބުން މަތިންދާބޯޓު ކޮންޓްރޯލުން ނެއްޓިފައިވާކަން... ހަމައެއާ އެކު ބިމުން ދިން ހަމަލާގައި މަތިންދާބޯޓުގެ ފަހަތު ބަޔަށް ބޮޑެތި ގެއްލުންތަކެއް ވެސް ވަނީ ލިބިފައި."

އަލިޔޭވް ވިދާޅުވީ "މިކަން ހިނގީ އެކްސިޑެންޓަކުންކަން އެނގޭ" ކަމަށާއި އެކަމަކު މައްސަލަ އަކީ އެކަން ފޮރުވަން ރަޝިޔާއިން މަސައްކަތްކުރުމުން ކަމަށެވެ.

އޭނާ ވިދާޅުވީ ހަގީގަތް ފޮރުވަން ރަޝިޔާއިން އެކި ތިޔަރީތައް ހަދަމުން ގެންދާ ކަމަށާއި މިދިޔަ ތިން ދުވަހު މިކަމާ ގުޅޭ ގޮތުން ރަޝިޔާއިން ރަސްމީކޮށް އެއްވެސް ވާހަކައެއް ދައްކާފައި ނުވާތީ ހިތާމަކުރާ ކަމަށެވެ.