ލޯންޗް އެކްސިޑެންޓެއްގައި މީހަކު މަރުވުމުން ކައްޕިންނަށް ދައުވާކުރަން އަނެއްކާވެސް ޕީޖީއަށް

މީގެ ދެ އަހަރު ކުރިން ދެ ލޯންޗެއް ޖެހިގެން ހިނގި އެކްސިޑެންޓެއްގައި މީހަކު މަރުވި މައްސަލާގައި، އެ ދެ ލޯންޗު ދުއްވަން ތިބި ކައްޕިންގެ މައްޗަށް ދައުވާކޮށްދޭން އެދި ޕްރޮސިކިއުޓާ ޖެނެރަލްގެ އޮފީހަށް ފުލުހުން ފޮނުވައިފި އެވެ.

ފުލުހުން މިމަހު ދައުވާކޮށްދޭން އެދުނީ 2023، އޭޕްރީލް 29 ވަނަ ދުވަހުގެ 16:42 ހާއިރު ފޭދޫ ފިނޮޅު ކައިރިން "ސަސް އީ ސްޕީޑް" ލާންޗާއި "އެމްޑަބްލިޔުއެސްސީ މެރިން 2" ލޯންޗް ޖެހި ހިނގި އެކްސިޑެންޓާ ގުޅިގެންނެވެ.

އެ އެކްސިޑެންޓްގައި، އޭގެ ތެރެއިން އެއް ލޯންޗުން ދަތުރުކުރި މީހަކަށް ލިބުނު އަނިޔާތަކަށް ފަރުވާދެމުން ދަނިކޮށް ވަނީ މަރުވެފަ އެވެ.

އެ މައްސަލަ ތަހުގީގު ކުރުމަށްފަހު ފުލުހުން އެދިފައިވަނީ އެ ދެ ލޯންޗުގެ ވެސް ކައްޕިންގެ އިހުމާލު އޮތް ކަމަށާއި އެހެންވެ، އެމީހުންގެ މައްޗަށް ދައުވާކޮށް ދިނުމަށެވެ.

ދައުވާކޮށްދޭން އެދިފައިވަނީ:

- މުހައްމަދު ޖަމީލް (43އ)، ގްރީންހައުސް ހދ. ނޮޅިވަރަން

- ޔާނިސް ހަމީދު (35އ)، ހީނާވިލާ ކ. ކާށިދޫ

ފުލުހުން ބުނީ އެ މައްސަލައިގެ ތަހުގީގު ނިންމައި، އެ ދެމީހުންގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް އެންމެ ފުރަތަމަ ފޮނުވީ ޖޫން، 2023 ގައި ކަމަށެވެ. ނަމަވެސް އެ މައްސަލަ އިސްލާހުކުރުމަށް އަނބުރާ ފޮނުވުމުން ދެވަނަ ފަހަރަށް އެ މައްސަލަ ޕީޖީއަށް ފޮނުވީ މި މަހުގެ 15 ވަނަ ދުވަހު އެވެ.

އެކްސިޑެންޓްގައި ނިޔާވެފައިވަނީ 52 އަަހަރުގެ ފިރިހެނެކެވެ. އޭނާ މަރުވެފައިވަނީ އެ އެކްސިޑެންޓްގައި ލިބުނު އަނިޔާތަކަށް އޭޑީކޭ ހޮސްޕިޓަލްގައި ފަރުވާދެމުން ދަނިކޮށެވެ.