ސީރިއާގެ އާ ލީޑަރުގެ ފުރަތަމަ ދަތުރުގައި ސައޫދީ ވަލީއަހުދާ ބައްދަލުކުރައްވައިފި

ސީރިއާގެ އިންތިގާލީ ރައީސް އަހްމަދު އަލް ޝަރާ، ވެރިކަމާ ހަވާލުވެވަޑައިގަތުމަށް ފަހު ގައުމުން ބޭރަށް ކުރެއްވި ފުރަތަމަ ދަތުރުގައި ސައުދީ ވަލީއަހުދު މުހައްމަދު ބިން ސަލްމާނާ އިއްޔެ ބައްދަލުކުރައްވަނީ. -- ފޮޓޯ: އޭއެފްޕީ

03 ފެބުރުއަރީ 2025 - 06:09

1 comments

ޝަރާ، އޭނާގެ ހާރިޖީ ވަޒީރު އަސްއަދު އަލް ޝައިބާނީއާ އެކު ސައޫދީއަށް ވަޑައިގަތުމާ އެކު ސައުދީ އޮފިޝަލުން މަރުހަބާ ދަންނަވާ މަންޒަރު ދައުލަތުގެ ޓީވީން ވަނީ ދައްކައިފަ އެވެ.

ސައުދީގެ ރަސްމީ ނޫސް އެޖެންސީން ފަހުން ވަނީ ޝަރާއަށް މުހައްމަދު މަރުހަބާ ދަންނަވައި، ބައްދަލުކުރައްވާފައިވާ ކަމަށް ބުނެފަ އެވެ. ނަމަވެސް އެ މަޝްވަރާތަކުގެ ތަފްސީލެއް އަދި ހާމައެއް ނުކުރެ އެވެ.

ސީރިއާގެ އިންތިގާލީ ރައީސް އަހްމަދު އަލް ޝަރާ، ވެރިކަމާ ހަވާލުވެވަޑައިގަތުމަށް ފަހު ގައުމުން ބޭރަށް ކުރެއްވި ފުރަތަމަ ދަތުރުގައި ސައުދީ އަރަބިއްޔާގެ ރިޔާޟަށް ފައިބައިވަޑައިގަންނަވަނީ. -- ފޮޓޯ: އޭއެފްޕީ

މިދިޔަ ޑިސެމްބަރު މަހު ބައްޝާރުލް އަސަދުގެ ވެރިކަން ވައްޓާލުމުގައި އިސްކޮށް ހަރަކާތްތެރިވި ޝަރާ ސީރިއާގެ އިންތިގާލީ ރައީސަކަށް ހަމަޖެއްސީ މިދިޔަ ބުދަ ދުވަހު އެވެ. ސައުދީ ރަސްގެފާނު ސަލްމާނާއި ދަރިކަލުން މުހައްމަދު ހިމެނިވަޑައިގަތީ ޝަރާ އަށް ފުރަތަމަ މަރުހަބާ ދެންނެވި ބޭފުޅުންގެ ތެރޭގަ އެވެ.

ސީރިއާ އިން އަންނަނީ ހަނގުރާމައިގެ ސަބަބުން ހަލާކުވެފައިވާ ގައުމު އާރާސްތުކުރުމަށް ގަލްފުގެ މުއްސަނދި ގައުމުތަކުގެ އެހީ ހޯދަން ވަރަށް ބޮޑަށް މަސައްކަތްކުރަމުންނެވެ.