ދައުލަތަށް ލިބުނު އާމްދަނީ ދަށްވިޔަސް ހަރަދުތައް ކުޑަކޮށްގެން ބަޖެޓު 1.4 ބިލިއަނުން ސާޕްލަސްގައި!

މި އަހަރުގެ މިހާތަނަށް ދައުލަތަށް ލިބުނު އާމްދަނީ ދަށްވެފައި ވިޔަސް، ދައުލަތުގެ ހިންގުމުގެ ހަރަދުތައް ކުޑަކޮށްގެން، މި އަހަރުގެ ބަޖެޓު އަދި އޮތީ 1.4 ބިލިއަން ރުފިޔާގެ ސާޕްލަސްއެއްގައި ކަމަށް މާލީ ހިސާބުތަކުން ދައްކައިފި އެވެ.

ފިނޭންސް މިނިސްޓްރީން ކޮންމެ ހަފުތާއަކު އާންމުކުރާ މާލީ ހިސާބުތައް ދައްކާ ގޮތުން، މިދިޔަ އަހަރުގެ ފެބްރުއަރީ 13 ވަނަ ދުވަހާ ހަމައަށް އާމްދަނީ އާއި ހިލޭ އެހީގެ ގޮތުގައި ލިބިފައިވަނީ 4.8 ބިލިއަން ރުފިޔާ އެވެ. ނަމަވެސް، މި އަހަރުގެ އެ މުއްދަތުގައި އެ އަދަދު ވަނީ 4.4 ބިލިއަން ރުފިޔާއަށް ދަށްވެފަ އެވެ.

މި އަހަރުގެ މިހާތަނަށް ދައުލަތަށް ލިބުނު ޓެކްސް އާއި ޓެކްސް ނޫން އާމްދަނީ ވެސް ވަނީ ކުޑަވެފަ އެވެ.

މިދިޔަ އަހަރު ޓެކްސްގެ ގޮތުގައި ލިބުނު 4.1 ބިލިއަން ރުފިޔާ، މި އަހަރު ވަނީ 3.9 ބިލިއަނަށް ވެއްޓިފަ އެވެ. ޓެކްސް ނޫން ގޮތް ގޮތުން ލިބުނު އާމްދަނީ 718.7 މިލިއަން ރުފިޔާ އިން، މި އަހަރު 541.3 މިލިއަން ރުފިޔާ އަށް ވަނީ ތިރިވެފަ އެވެ.

ނަމަވެސް، އާމްދަނީ ދަށްވުމުގެ އަސަރު ދައުލަތުގެ ޖުމްލަ ހަރަދުން ސަލާމަތް ކޮށްގެން ވަނީ ވަރަށް ބޮޑަށް ކުޑަކޮށްފަ އެވެ.

މިގޮތުން، މިދިޔަ އަހަރުގެ އެ މުއްދަތުގައި ޖުމްލަ ހަރަދުގެ ގޮތުގައި ހުރި 4.1 ބިލިއަން ރުފިޔާ، މި އަހަރު ވަނީ ތިން ބިލިއަން ރުފިޔާ އަށް ދަށްވެފަ އެވެ.

ޖުމްލަ ހަރަދުން ގާތްގަނޑަކަށް އެއް ބިލިއަން ރުފިޔާ ސަލާމަތްކޮށްފައިވަނީ، ރިކަރަންޓު ހަރަދުތައް ވެސް ކުޑަކޮށްގެންނެވެ.

މިދިޔަ އަހަރުގެ މި މުއްދަތުގައި ރިކަރަންޓު ހަރަދަށް 3.27 ބިލިއަން ރުފިޔާ ހޭދަވެފައިވެ އެވެ. ނަމަވެސް، މި އަހަރުގެ މިހާތަނަށް އެ ހަރަދުތައް ވަނީ 2.87 ބިލިއަން ރުފިޔާއަށް ތިރިކޮށްފަ އެވެ.

މި ހަރަދުގެ ތެރޭގައި މުސާރަ އާއި ޕެންޝަނަށް ކުރާ ހޭދަ މިދިޔަ އަހަރަށް ވުރެ 100 މިލިއަނަށް ވުރެ ގިނަ ރުފިޔާ އިތުރުވެފައިވިޔަސް، ޖުމްލަ ރިކަރަންޓު ހަރަދު ކުޑަކޮށްފައިވަނީ އިދާރީ އަދި ހިންގުމުގެ ހަރަދުތައް ކުޑަކޮށްގެންނެވެ. މިގޮތުން، މިދިޔަ އަހަރު 2.18 ބިލިއަން ރުފިޔާ އިދާރީ އަދި ހިންގުމުގެ ހަރަދުތައް ހޭދަކޮށްފައިވާ އަދަދު، މި އަހަރު ވަނީ 1.73 ބިލިއަން ރުފިޔާއަށް ކުޑަކޮށްފަ އެވެ.

ނަމަވެސް، ހަރަދުތައް މި މިންވަރަށް ކުޑަވުމުގެ ހިއްސާ އެންމެ ބޮޑީ، ކެޕިޓަލް ހަރަދުތައް ދަށްވުމެވެ.

މިދިޔަ އަހަރު ކެޕިޓަލް ހަރަދުގެ ގޮތުގައި ހުރި 855.8 މިލިއަން ރުފިޔާ، މި އަހަރު ވަނީ 169.8 މިލިއަން ރުފިޔާ އަށް ދަށްވެފަ އެވެ.

އުމްރާނީ ތަރައްގީ (ޕީއެސްއައިޕީ)ގެ މަޝްރޫއުތަކަށް ބަލާ ނަމަ މިދިޔަ އަހަރު ހުރި 819.4 މިލިއަން ރުފިޔާއިން މި އަހަރު ވަނީ 324.8 އަށް ވެއްޓިފަ އެވެ.

އެއާ އެކު، މިދިޔަ އަހަރާ އަޅާބަލާއިރު، ފެބްރުއަރީ 13 ވަނަ ދުވަހާ ހަމައަށް، ދައުލަތުގެ ޖުމްލަ ހަރަދަށް ވުރެ އާމްދަނީ 1.4 ބިލިއަން ރުފިޔާ އިތުރު ކަމަށް މާލީ ހިސާބުތަކުން ދައްކަ އެވެ.