ފައިސާ ޗާޕުކުރުމުން އިގްތިސާދަށް ލޮޅުން އަރާނެ: އިމާދު

މި ހާލަތުގައި އިތުރަށް ފައިސާ ޗާޕުކޮށްފި ނަމަ "ސީރިއަސް މެކްރޯ އިކޮނޮމިކް" އަސަރުތަކެއް ކުރާނެ ކަމަށް ޑެޕިއުޓީ މަގާމުން މިއަދު އިސްތިއުފާ ދެއްވި އަހުމަދު އިމާދު ވިދާޅުވެއްޖެ އެވެ.

"މިހާރު" އަށް ލިބިފައިވާ އޭނާގެ އިސްތިއުފާ ސިޓީގައި ފާހަގަކުރައްވާފައިވާ ގޮތުގައި، އިތުރަށް ފައިސާ ޗާޕުކުރުމުން ބޭންކިން ސެކްޓަރުގައި ހުރި "އެކްސަސް ލިކުއިޑިޓީ" ނުވަތަ އެކްސަސް ފައިސާ ބޮޑުތަނުން އިތުރުވާނެ އެވެ. އޭގެ ސަބަބުން، އެކްސްޗޭންޖް ރޭޓު ދެމެހެއްޓުމަށް އެމްއެމްއޭ އިން ކުރަމުން އަންނަ މަސައްކަތަކަށް އިތުރު ގޮންޖެހުންތައް ކުރިމަތިވާނެ ކަމަށް އިމާދު ވިދާޅުވި އެވެ.

"ރުފިޔާގެ ލިކުއިޑިޓީ މެނޭޖް ކުރުމަށް މިހާރު ވެސް ކުރަން ޖެހިފައިވާ ހަރަދު އިތުރުވެ، އެމްއެމްއޭގެ ބެލެންސް ޝީޓު ހީނަރުވެގެންދާނެ އެވެ. އެހެން ކަމުން މި ކަންކަމަކީ އެމްއެމްއޭގެ މައިގަނޑު މަގްސަދު ކަމުގައިވާ ޕްރައިޒް ސްޓެބިލިޓީ ހިފެހެއްޓުމާ ސީދާ ފުށުއަރާ ކަމެކެވެ،" އިމާދުގެ ސިޓީގައި ވެ އެވެ.

އޭނާ އެހެން ވިދާޅުވެފައިވަނީ، އެމްއެމްއޭ އިން އެޗްޑީސީން 11 ބިލިއަނެއްހާ ރުފިޔާ އަށް ބިމެއް ގަތުމަށްޓަކައި އެ އިދާރާގެ ބޯޑުން ފާސްކޮށްފައިވަނިކޮށެވެ. އެއީ ވެސް އިގްތިސާދަށް އިތުރަށް ވައްދާ ފައިސާއަކަށް ވާތީ، ފައިސާ ޗާޕުކުރުން ކަމަށް އިގްތިސާދީ މާހިރުން ދެކެވަޑައިގަންނަވަ އެވެ. އެކަން ނިންމި އިރު އިމާދު ވެސް އެމްއެމްއޭގެ ބޯޑުގައި އިންނެވި އެވެ. އެކަމަކު އެ ކަން ފާސްކުރި ބައްދަލުވުމުގައި އޭނާ ބައިވެރިވެފައެއް ނުވެ އެވެ. އަދި އެ މައްސަލަ އަލުން ރިވިއުކުރަން އެދުމަށް އޭނާ ވަކާލާތުކުރި ކަމަށް ފަހުން ވަނީ އެނގިފަ އެވެ.

"ރުފިޔާގެ ލިކުއިޑިޓީ މެނޭޖްކުރުމަށް މިހާރު ވެސް ކުރަން ޖެހިފައިވާ ހަރަދު އިތުރުވެ، އެމްއެމްއޭގެ ބެލެންސް ޝީޓު ހީނަރުވެގެންދާނެ އެވެ. އެހެން ކަމުން މިކަންކަމަކީ އެމްއެމްއޭގެ މައިގަނޑު މަގްސަދު ކަމުގައިވާ ޕްރައިޒް ސްޓެބިލިޓީ ހިފެހެއްޓުމާ ސީދާ ފުށުއަރާ ކަމެކެވެ." އިމާދުގެ ސިޓީގައިވެ އެވެ.

އޭނާ ވިދާޅުވިގޮތުގައި، ފައިސާ ޗާޕުކުރުމުން "ފިސްކަލް ކޮންސޮލިޑޭޝަން" ނުވަތަ ޑެފިސިޓާއި ދަރަނި ކުޑަކުރުމުގެ ބަދަލުގައި ފިސްކަލް ސިޔާސަތު ހީނަރުވާން މަގުފަހިވާނެ އެވެ.

އިމާދު ވިދާޅުވީ، އިގްތިސާދުގެ ރިއަލް ސެކްޓަރަށް ރަނގަޅު ކުރިއެރުމެއް ލިބެމުން އައި ނަމަވެސް ފިސްކަލް ސެކްޓަރާއި މޮނިޓަރީ ސެކްޓަރަށް ބޮޑެތި ގޮންޖެހުންތައް އެބަހުރި ކަމަށެވެ.

"ހާއްސަކޮށް ބޭރުގެ ދަރަނި އިތުރުވެގެންދާ ދިއުމަކީ މެކްރޯ އިކޮނޮމިކް ހަމަޖެހުމަށް ނޭދެވޭ އަސަރުކުރަމުންދާ ކަމެކެވެ. ހާއްސަކޮށް ބޭންކުތަކުން ސަރުކާރަށް ދޫކޮށްފައިވާ ދަރަނީގެ ރިސްކު މަތިވެފައިވެ އެވެ. ރިސްކުތައް ކުޑަކުރުމަށް އެމްއެމްއޭ އިން ޕްރޫޑަންޑް ރެގިއުލޭޓަރީ ފިޔަވަޅުތައް އަޅަން މަޖުބޫރުވެ އެވެ،" އޭނާ ވިދާޅުވި އެވެ.

ދެ ސޮފްހާގެ އެ ސިޓީގައި އިތުރަށް ވަނީ ކޮވިޑުގެ ދުވަސްވަރު ފައިސާގެ ސިޔާސަތުތަކަށް ދިން ލުއިތައް އިޔާދަކުރުމަށް ލަފާކުރި މުއްދަތު އިތުރުވި ކަމަށެވެ. އެކަން އެހެންވީ، ސަރުކާރުގެ ފިސްކަލް ހާލަތު ދަށްވުމާއި ހަރަދުތައް ކުޑަ ނުކުރުމުގެ ސަބަބުން ކަމަށެވެ.

އިމާދު އިސްތިއުފާ ދެއްވި އިރު އޭނާ އެ މަގާމުން ވަކި ކުރުމަށް ރައްޔިތުންގެ މަޖިލީހަށް މައްސަލައެއް ވެސް އޮތީ ހުށަހަޅައިފަ އެވެ. އެއީ އެމްއެމްއޭގެ ކުރީގެ ގަވަރުނަރު އަލީ ހާޝިމް ގާނޫނުން މަތިކޮށްފައިވާ ޒިންމާތައް އަދާ ނުކުރައްވައި ހުންނެވިއިރު، އެ ކަންކަން ފާހަގަކުރުމަށްޓަކައި ގާނޫނުން މަތިކޮށްފައިވާ ޒިންމާތައް އަދާކުރުމަށް ޑެޕިއުޓީ ގަވަރުނަރު އިމާދު މަސައްކަތް ކުރެއްވިކަން އެނގެން ނެތް ކަމަށް ބުނެ އެވެ.