ހުޅުމާލޭ ޣާޒީ ސްކޫލަށް 18 ކްލާސްރޫމް އިތުރުކުރަނީ

ހުޅުމާލެ 1 ގައި ހުންނަ ޣާޒީ ސްކޫލަށް 18 ކްލާސްރޫމް އިތުރު ކުރަން ނިންމައި އެ މަސައްކަތް ކޮށްދޭނެ ބަޔަކު ހޯދަން ފިނޭންސް މިނިސްޓްރީން ބީލަމަށް ހުޅުވާލަފި އެވެ.

ގްރޭޑް 10 އާ ހަމައަށް ކިޔަވައިދޭ ޣާޒީ ސްކޫލަށް އިތުރު ކުރާ ކްލާސްރޫމްތައް ހަދައި ދިނުމުގެ ބީލަމަށް ޝައުގުވެރިވާ ފަރާތްތަކުން ބީލަން ހުށަހެޅުމުގެ ފުރުސަތު މި މަހުގެ 26 ވަނަ ދުވަހުގެ ނިޔަލަށް ވަނީ ހުޅުވާލައިފަ އެވެ.

ފިނޭންސް މިނިސްޓްރީން ބުނީ މިއަދުން ފެށިގެން މި މަހުގެ 21 ވަނަ ދުވަހުގެ ނިޔަލަށް ބީލަމުގައި ރަޖިސްޓަރީ ވެވޭނެ ކަމަށެވެ.

ރަޖިސްޓްރޭޝަނަށް 500ރ. ދައްކަން ޖެހޭއިރު، ބިޑް ސިކިއުރިޓީގެ ގޮތުގައި 121،000ރ. ވެސް ހުށަހަޅަން ޖެހެ އެވެ. ބިޑް ސެކިއުރިޓީގެ މުއްދަތަކީ ބިޑު ހުޅުވާ ތާރީހުން ފެށިގެން 148 ދުވަހެވެ.

ހުޅުމާލެ 2 ގައި އަލަށް އާބާދުވާ މީހުންގެ އަދަދު އިރުވެފައިވާއިރު، ހުޅުމާލެ 1 އަދި 2 ގައި ހުރި ސްކޫލްތަކަށް ވެސް ވަނީ އިންތިހާ އަށް ލޯޑު ބޮޑުވެފަ އެވެ.

ހުޅުމާލެ ސްކޫލުތަކުގެ ތޮއްޖެހުން ކުޑަކުރުމަށް އެޑިއުކޭޝަން މިނިސްޓްރީން ކުރަމުން އަންނަ މަސައްކަތާ ގުޅޭގޮތުން މިނިސްޓަރު ޑރ. އިސްމާއިލް ޝަފީއު ވިދާޅުވެފައި ވަނީ ހުޅުމާލެ 2 ގައި މިހާރު އަޅަމުން އަންނަ ސްކޫލުގައި އަންނަ އަހަރުގެ ޖެހުއަރީގައި ކިޔަވައިދޭން ފަށާނެ ކަމަށެވެ.

ހުޅުމާލެއަށް އިތުރު ހަތް ސްކޫލު ބޭނުންވާއިރު އެ ސްކޫލުގައި ގްރޭޑް 1 އިން ފެށިގެން ގްރޭޑް 10 އާ ހަމައަށް ކިޔަވައި ދޭނެ އެވެ.

މުޅިން އާ ދެ ސްކޫލެއް ހުޅުމާލޭގައި އިމާރާތް ކުރުމުގެ އަމަލީ މަސައްކަތް މި އަހަރު ފަށާނެ ކަމަށް މިނިސްޓަރު ކުރިން ވަނީ ވިދާޅުވެފައި އެވެ. އެކަމަކު އެ ސްކޫލު އިމާރާތް ކުރާނެ ވަކި ތަނެއް އަދި ނުނިންމާ ކަމަށް ވެސް އޭރު ވިދާޅުވި އެވެ.