ކާޑު ބަރުކޮށްގެން އުތުރުގެ ރަށްތަކަށް ދަތުރުކުރި "އިނާ" ނަމަކަށް ކިޔާ ދޯންޏެއް ރޭ ފަތިހު ފަރަށް އަރައި، ދޯނީގައި ހުރި ބައެއް ކާޑުތައް މޫދަށް ވެއްޓިއްޖެ އެވެ.
އެމްއެންޑީއެފުން ބުނި ގޮތުގައި އެސްޓީއޯ އިން ކާޑު ބަރުކޮށްގެން އުތުރުގެ ރަށްތަކަށް ދަތުރު ކުރަނިކޮށް، މަކުނޫދޫ އައިލެންޑް ރިސޯޓްގެ ހުޅަނގު ދެކުނު ފަރާތު ފަރަށް އެރި ދޯނީގައި 1،800 ބަސްތާ ކާޑު ހުއްޓެވެ. ނަމަވެސް މޫދަށް ވެއްޓުނީ އޭގެ ތެރެއިން ބައެއް ކާޑު ބަސްތާ އެވެ.
ފަރަށް އެރުމުގެ ސަބަބުން، ދޯނި ވަރަށް ބޮޑަށް ދިޔަވެފައިވާ ކަމަށާއި ދޯނީގެ ވެރިފަރާތާ ގުޅިގެން ދޯނި ފުންކުރުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.
މި ދޯނިން ދަތުރުކުރީ ދިވެއްސަކާއި ތިން ބިދޭސީ އެކެވެ. އެމްއެންޑީއެފުން ބުނި ގޮތުގައި ދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.