ވިޔަފާރިގެ ބޭނުމަށް "އޮޕަރޭޝަން ސިންދޫރު" ބޭނުންކުރުމާ ދެކޮޅަށް ސުޕްރީމް ކޯޓަށް!

ޕާކިސްތާނާ ދެކޮޅަށް އިންޑިއާގެ އަސްކަރިއްޔާ އިން ފަށާފައިވާ "އޮޕަރޭޝަން ސިންދޫރު"ގެ ނަން ވަރަށް ގިނަ ފިލްމާއި ސީރީޒްތަކަށް ކިޔަން ހުށަހަޅާފައި ވަނިކޮށް، ވިޔަފާރިގެ ބޭނުމަށް ކުރާ އެއްވެސް ކަމަކަށް އެ ނަން ރަޖިސްޓްރީ ކޮށްދިނުމާ ދެކޮޅަށް އިންޑިއާގެ ސުޕްރީމް ކޯޓަށް މައްސަލައެއް ހުށަހަޅައިފި އެވެ.

"އޮޕަރޭޝަން ސިންދޫރު"ގެ ނަމުގައި ޕާކިސްތާނާ ދެކޮޅަށް އިންޑިއާގެ އަސްކަރިއްޔާ އިން ހާއްސަ އޮޕަރޭޝަނެއް ފެށީ ކަޝްމީރުގެ އިންޑިއާ ސަރަހައްދުގައި މިދިޔަ މަހުގެ 22 ވަނަ ދުވަހު 26 މީހަކު މަރާލި ހާދިސާއާ ގުޅިގެންނެވެ. އިންޑިއާއިން ތުހުމަތުކުރާ ގޮތުގައި އެއީ ޕާކިސްތާނު އަޑީގައި އޮވެގެން ކުރުވި ކަމެކެވެ. އެކަމަކު ޕާކިސްތާނުން އެ ވާހަކަ ދޮގުކުރެ އެވެ.

ރިޕޯޓްތައް ބުނި ގޮތުގައި، އެ އޮޕަރޭޝަން އިއުލާންކުރި ހިސާބުން ފެށިގެން ފިލްމާއި ސީރީޒް އުފެއްދުމަށް މިހާތަނަށް ވަނީ 30 އަށް ވުރެ ގިނަ މީހުން "އޮޕަރޭޝަން ސިންދޫރު"ގެ ނަން ރަޖިސްޓްރީކޮށްދޭން ހުށަހަޅައިފަ އެވެ. އަދި މިހާރު އެ ނަމުގައި ފިލްމެއް އިއުލާންކޮށްފައި ވެސް ވެ އެވެ.

ދޭވް އަޝިޝް ދުބޭ ކިޔާ އަމިއްލަ މީހަކު އިންޑިއާގެ ސުޕްރީމް ކޯޓަށް ހުށަހަޅާފައިވާ މައްސަލާގައި ބުނީ "އޮޕަރޭޝަން ސިންދޫރު"ގެ ނަމުގައި ޓްރޭޑްމާކް ރަޖިސްޓްރީކުރުމަށް ފަސް މީހަކު މިހާރު ވެސް ހުށަހަޅާފައިވާ ކަމަށެވެ. އެއީ ތައުލީމާއި މުނިފޫހިފިލުވުމުގެ ދާއިރާގެ ވިޔަފާރިގެ ބޭނުންތަކަށް ކަމަށް ބުންޏެވެ.

ސުޕްރީމް ކޯޓަށް ހުށަހެޅި މައްސަލާގައި ބުނެފައި ވަނީ "އޮޕަރޭޝަން ސިންދޫރު"ގެ ނަމަކީ ޕާކިސްތާނުން ހިންގާ ޓެރަރިޒަމާ ދެކޮޅަށް އިންޑިއާ އިން ކުރާ ހަނގުރާމާގައި މަރުވި ސިފައިންގެ އަނބިން ވީ ގުރުބާނީގެ ރަމްޒެއް ކަމަށެވެ.

އެހެންވެ، އާންމުންގެ އިހުސާސްތަކުގެ ބޭނުންކޮށްގެން އަމިއްލަ ވިޔަފާރިގެ ފައިދާ ހޯދުމަށް އެއްވެސް މީހަކަށް ނަހަމަ ގޮތުގައި މި ނަން ބޭނުންކުރުމުގެ ފުރުސަތު ދީގެން ނުވާނެ ކަމަށް އެ މައްސަލަ ހުށަހެޅި ފަރާތުން ބުންޏެވެ.

އިންޑިއާ އާއި ޕާކިސްތާނުން ބަދަލުކުރަމުންދާ ހަމަލާތައް ވަގުތުން ހުއްޓާލަން އެ ދެ ގައުމުން މިހާރު ވަނީ އެއްބަސްވެފަ އެވެ. އެކަން އިއްޔެ އެންމެ ފުރަތަމަ އިއުލާނުކުރެއްވީ އެމެރިކާގެ ރައީސް ޑޮނަލްޑް ޓްރަމްޕެވެ.