ސޯސަންގޭގައި ހެދި އޭޑީކޭ ފްލޫ ކްލިނިކް: އެ ތަނުން ހިދުމަތް ހޯދާ މީހުންގެ އަދަދު ދަނީ ދަށްވަމުން.-- ފޮޓޯ: ހުސެއިން ވަހީދު/ މިހާރު
23 މާޗް 2017 - 10:41
5 comments
ރާއްޖޭގައި މިހާރު ފެތުރެމުންދާ ހުމާއި ރޯގާއަށް ހާއްސަކޮށްގެން އޭޑީކޭ ހޮސްޕިޓަލުން ހުޅުވި ފްލޫ ކްލިނިކްގެ ހިދުމަތް ހުއްޓާލައިފި އެވެ.
އެ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ ސޯސަންގޭގައި ހެދި ފްލޫ ކްލިނިކް ހުއްޓާލީ އެތަނުން ހިދުމަތް ހޯދާ މީހުންގެ އަދަދު ދަށްވަމުންދާތީ ކަމަށެވެ.
އޭޑީކޭއިން ރޭ އާއްމުކުރި ތަފާސްހިސާބު ދައްކާގޮތުން، ހުން ޖެހިގެން އެ ކްލިނިކަށް ދެއްކި މީހުންގެ އަދަދު އަންނަނީ ދަށްވަމުންނެވެ. ކްލިނިކްގެ ހިދުމަތް މިދިޔަ ހަފުތާގެ އަންގާރަ ދުވަހު ފެށިއިރު، ފުރަތަމަ ފަސް ދުވަހު 200 އަށް ވުރެ ގިނަ މީހުން ފަރުވާ ހޯދި އެވެ. އެކަމަކު އޭގެ ފަހުން އެ އަދަދު ދިޔައީ ދަށަށެވެ.
އޭޑީކޭ ފްލޫ ކްލިނިކަށް އިއްޔެ 108 މީހުން ދެއްކިއިރު އޭގެ ތެރެއިން އެކަކަށް ހޮސްޕިޓަލުން ފަރުވާ ދޭން ޖެހުނު ކަމަށް ހިސާބުތަކުން ދައްކަ އެވެ.
އަފްއާލް ވިދާޅުވީ ފްލޫ ކްލިނިކް ހިންގީ، އެ ހޮސްޕިޓަލްގެ ޖެނެރަލް އޯޕީޑީ ހުއްޓާލާފައި ކަމަށާއި އެހެންކަމުން މިއަދުން ފެށިގެން ޖެނެރަލް އޯޕީޑީގެ އޮޕަރޭޝަންތައް އަލުން ފަށާނެ ކަމަށެވެ. ރޯގާއާ ގުޅޭ މައްސަލަތަކުގައި ވެސް އޭޑީކޭއިން ދެން ފަރުވާ ހޯދަން ޖެހޭނީ ޖެނެރަލް އޯޕީޑީންނެވެ.
"އޯޕީޑީގައި މަސައްކަތް ކުރި ޑޮކްޓަރުން ފްލޫ ކްލިނިކްގައި މަސައްކަތް ކުރަން ވެގެން، އަޅުގަނޑުމެން ޖެނެރަލް އޯޕީޑީ ހުއްޓާލީ. އެކަމަކު މިއަދުން ފެށިގެން ޖެނެރަލް އޯޕީޑީ ފަށާނެ،" އަފްއާލް ވިދާޅުވި އެވެ.
ރާއްޖޭގައި ހުމާއި ރޯގާއާ އެކު ސްވައިން ފްލޫ ވެސް ދަނީ ފެތުރެމުންނެވެ. ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިއްޔެ އާއްމުކުރި، އަންގާރަ ދުވަހުގެ ތަފާސްހިސާބު ދައްކާގޮތުން ސްވައިން ފްލޫ ޖެހުނު މީހުންގެ އަދަދު ވަނީ 169 އަށް އަރައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މޯޑް
23 March 2017
ކަމާބެހޭ މުވައްސަސާތަކުން އެލާރޓް ލެވެލް ދަށް ނުކުރަނީސް ކްލިނިކް ބަންދު ކުރުމަކީ ދެރަކަމެއް. އެކަމަކު ޢޭ.ޑީ.ކޭ ގެ އުސޫލްތައް ދަންނަ މީހެއްގެ ހައިސިއްޔަތުން ތިޔަ ނިންމުމާމެދު ހައިރާނެއްނުވޭ!
ޓިޓިސް
23 March 2017
ހިލޭ ކަމެއްކޮށްދޭން މިމީހުން ބޭނުމެއް ނުވާނޭ..އެހެންވެ ބަންދު ކުރީ!
އަސްލު
23 March 2017
އެނގޭ ކަަމަކީ މިބަލި ބާރަށް އެބަ ފެތުރޭކަން، ހުން ޖެހިގެން އެތައްބައެއް ދެއްކިއިރު، މިބައްޔަށް ޓެސްޓުކޮށްފަވަނީ ނިސަބަތުން ވަރަށް މަދުބައެއްކަން ފާހަގަކުރެވޭ، ވީމާ މިތަނުން ބަލި ބޮޑުވެގެން ވަރަށް ގިނަމީހުން ކުރިޔަށް އޮތްހަފްތާތެރޭ އަދި ދައްކަން ވަޑައިގަންނަވާނެކަމަށް އަންދާޒާކުރެވެނީ! ވީމާ، ކުލިނިކް ބަންދުކުރުމަކީ މިވަގުތު އަދި ރަނގަޅު ކަމެއްނޫން! ކުރަންވީ ކަމަކީ އަންނަކޮންމެ މީހަކު ޓެސްޓު ކުރަންވީ، އޭރުން އަސްލު ފިގާއެއް، ނުވަތަ އަދަދެއް އެގޭނީ!
ބަތްކައްކާ
23 March 2017
ކިޔެވުން ފެށޭތަ ދެން؟
އަބްދުﷲ އިސްމާޢީލް
23 March 2017
ބައްޔަކީ ގެއްލުން ބޮޑު، އަވަހަށް ފެތުރޭ ބައްޔެއް. މާލެ ފަދަ ތޮއްޖެހިފައިވާ ތަނެއްގައި މިބަލި ފެތުރުން ހުއްޓުވޭނީ އެއްމެއް އެއްބާރުލައިގެން އެކުގައި މަސައްކަތް ކޮށްގެން. އެހެނަސް ފެންނަ މަންޒަރުތަކުން މިކަމާއި މާބޮޑަށް އަޅާނުލާ ބަޔަކު އުޅޭކަން އެބަ އެނގޭ. ރައްކާތެރިކަމުގެ ފިޔަވަޅު އެޅުމާއި ސާފުތާހިރުކަމަކީ ބަޔަކު ދަންނަކަމެއް ނޫން. މިއޮތް ބަލިމަޑުކަމުގެ ދުވަސްވަރު އެއްވެސް ހާސްކަމެއް ނެތި ކުޑަކުދިން ގޮވައިގެން ހަވީރު ބުރުޖަހަން ދާމީހުންވެސް ފެނޭ. އަނެއްކޮޅުން ސިއްހީގޮތުން ކިހާ ރައްކާތެރިކަމެއްކަން ބެލުމެއްނެތި އަންނަ އާދީއްތަ ދުވަހު ބައެއް ޔުނިވާސިޓީތައް ހުޅުވާ ކުލާސްތަކާއި، ޓެސްޓްތަކާއި އިތުރު ހަރަކާތްތައް ނޯޓިސްވެސް ދަރިވަރުންނަށް ދަނީ ދެމުން. މިހެން ކަންތަށް އޮތް އިރު އެތަށް ދަރިވަރުންނެއް ތިބީ މާލޭގައި އެނބުރޭ ރޯގާތަކުގެ ތެރޭގައި. އަދި ރޯގާތަކާއި، ސްވައިންފުލޫ ޖެހޭ މީހުން ވަނީ އިތުރުވެ، ހާލު ސީރިއަށްވެފައިތިބި މީހުން ގިނަވެފައި. ކިޔެވުން ފެށުމަކީ މިހާރު ބަލިމަޑުކަމުގައި އުޅޭ ކުދިންގެ ފަރާތުން އެހެން ދަރިވަރުންނަށް ބަލިމަޑުގަން ފެތުރިގަންނާނެކަމަކަށް ވެދާނެ. މިކަން ހައްލުކުރުމަށް ރައްޔިތުންނާއި، މުއައްސަސާތަކާއި، ސަރުކާރާއި، ކުންފުނިތަކާއި އެންމެހާ ފަރާތްތަކުގެ އެއްބާރުލުން ބޭނުންވޭ.