ރިސޯޓްތަކުގެ ކުއްޔަށް ގިނަ ލުއިތައް ދޭތީ ކުލި ނުދައްކަން ހިތްވަރު ލިބޭ: އޮޑިޓާ ޖެނެރަލް

ރިސޯޓުތަކުން ދައުލަތަށް ދައްކަންޖެހޭ ކުއްޔަށް ގިނަ ލުއިތަކެއް ދީ އަދި ކުލީގެ ޖޫރިމަނާ މައާފްކޮށް ދޭތީ ރިސޯޓްތަކުގެ ކުލި ނުދައްކަން ހިތްވަރު ލިބޭ ކަމަށް އޮޑިޓާ ޖެނެރަލްގެ އޮފީހުން ބުނެފި އެވެ.

އޮޑިޓާ ޖެނެރަލް ހުސައިން ނިޔާޒީ ނެރުއްވި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ 2023 ވަނަ އަހަރުގެ އޮޑިޓް ރިޕޯޓުގައިވާ ގޮތުން ރިސޯޓްތަކުގެ ކުލި ނުދެއްކުމުން އަރާފައިވާ ޖޫރިމަނާތައް މައާފު ކުރުމުގައި ކުލި ދައްކާ ފަރާތްތަކާއި ކުލި ނުދައްކާ ފަރާތްތަކާ ދެމެދު އެއްވެސް ފަރަގެއް ނެތް ކަމަށެވެ. އަދި ގަވާއިދަށް ގެނެވޭ ބަދަލުތަކުގެ ސަބަބުން ޖޫރިމަނާ މައާފު ކުރަމުން ގެންދިއުމަކީ ވެސް ކުލި ނުދައްކާ ފަރާތްތަކުން ކުލި ނުދައްކަން އިތުރަށް ދެވޭ ހިތްވަރެއް ކަމަށް ވެސް އެ ރިޕޯޓުގައިވެ އެވެ.

އެ ރިޕޯޓުގައިވާ ގޮތުން 2023 ވަނަ އަހަރު ނިމުނުއިރު ރިސޯޓް ކުއްޔާއި ޖޫރިމަނާގެ ގޮތުގައި 5.9 ބިލިއަން ރުފިޔާ ނުލިބި ހުއްޓެވެ. އެއީ އެހާތަނަށް ދައުލަތަށް ލިބެންޖެހޭ ފައިސާގެ 45 ޕަސެންޓެވެ. އަދި 2021 ވަނަ އަހަރުން ފެށިގެން 2023 ވަނަ އަހަރަށް ރިސޯޓު ކުލީގެ ގޮތުގައި ލިބެންޖެހޭ އަދަދު 38 ޕަސެންޓް ދަށްވެފައިވާ ކަމަށް އެ ރިޕޯޓުގައިވެ އެވެ.

އޭގެ ސަބަބަކީ 2022 ވަނަ އަހަރު ރިސޯޓްތަކުގެ ކުލި ދެއްކުމުގައި ދިން ލުއިތަކާ ގުޅިގެން 4.1 ބިލިއަން ރުފިޔާ ދައްކަން ނުޖެހޭ ގޮތަށް ބަދަލުވުމެވެ. އަދި އޭގެފަހުން 2023 ވަނަ އަހަރު ނުލިބި ހުރި ކުއްޔާއި ޖޫރިމަނާގެ އަދަދު މަދުވީ ބައެއް ރިސޯޓްތަކާއެކު ސެޓުލްމެންޓް އެގްރީމެންޓް ހަދައި، ބައެއް ފައިސާ މައާފުކޮށްދިނުމުންނެވެ.

"ކުލި ނުދެއްކުމާ ގުޅިގެން ޑެފާމެންޓް އެއްބަސްވުންތަކަށް އައި ނަމަވެސް، އެ އެއްބަސްވުންތަކަށް އިހްތިރާމު ނުކުރާ ފަރާތްތަކާއެކު، ތަކުރާރުކޮށް ޑެފާމެންޓް އެއްބަސްވުންތަކުގައި ސޮއި ކުރަމުން ދިއުމަކީ ކުލި ނުދެއްކުމުގެ ރޫހެއް އެފަދަ ފަރާތްތަކުގެ މެދުގައި އުފެދޭ ކަމެކެވެ." ޓެކްސް ފައިސާ ނުލިބޭ މައްސަލަތަކާ ގުޅޭ ގޮތުން އޮޑިޓަ ޖެނެރަލް ދެއްވި ލަފާގައި ބުނެފައިވެ އެވެ.

އެ ރިޕޯޓުގައިވާ ގޮތުން 2022 ވަނަ އަހަރު ލިބެންޖެހޭ ކުލީގެ ބައެއް ފައިސާ 2023 ވަނަ އަހަރު ހޯދުމުން ނުލިބި ހުރި އަދަދު ކޮންމެވެސް ވަރަކަށް ދަށްވި އެވެ.

އެ ރިޕޯޓުގައިވާ ގޮތުން ޓޫރިޒަމް ދާއިރާއިން ކުލި ނުލިބުމުން އެ ފައިސާ ހޯދުމަށް އެކަމާ ގުޅޭ އިދާރާ ކަމަށްވާ ޓޫރިޒަމް މިނިސްޓްރީން އެކަށީގެންވާ މަސައްކަތްތައް ނުކުރުމަކީ ވެސް ރިސޯޓް ކުލީގެ ގޮތުގައި ނުލިބޭ އަދަދު އަހަރުން އަހަރަށް އިތުރުވާ އެއް ސަބަބެވެ.

"ކުލި ނުދެއްކުމާ ގުޅިގެން ޑަފާމެންޓް އެއްބަސްވުންތަކަށް އައި ނަމަވެސް، އެ އެއްބަސްވުންތަކަށް އިހްތިރާމު ނުކުރާ ފަރާތްތަކާ އެކު، ތަކުރާރުކޮށް ޑަފާމެންޓް އެއްބަސްވުންތަކުގައި ސޮއި ކުރަމުން ދިއުމަކީ ކުލި ނުދެއްކުމުގެ ރޫހެއް އެފަދަ ފަރާތްތަކުގެ މެދުގައި އުފެދޭ ކަމެކެވެ." ޓެކްސް ފައިސާ ނުލިބޭ މައްސަލަތަކާ ގުޅޭ ގޮތުން އޮޑިޓާ ޖެނެރަލް ދެއްވި ލަފާގައި ބުނެފައިވެ އެވެ.

އެގްރީމެންޓާ އެއްގޮތަށް ކުލި ނުދައްކާ ފަރާތްތަކާ މެދު ޓޫރިޒަމް މިނިސްޓްރީން ފިޔަވަޅުތައް ވެސް ނާޅާ ކަމަށް އޮޑިޓް ރިޕޯޓުގައި ފާހަގަކޮށްފައިވެ އެވެ.

އެ ރިޕޯޓުގައިވާ ގޮތުން 2023 ގެ ނިޔަލަށް ޓެކްސްތަކުން ނުލިބި ހުރި ފައިސާގެ އަދަދު 6.6 ބިލިއަން ރުފިޔާއަށް އަރަ އެވެ. އެއީ މީރާއަށް އެ އަހަރުގެ ނިޔަލަށް ލިބެން ޖެހޭ ޖުމްލަ އަދަދުގެ ވެސް ގާތްގަނޑަކަށް 50 ޕަސެންޓު ކަމަށް އޮޑިޓް ރިޕޯޓްގައިވެ އެވެ.

އޮޑިޓް ރިޕޯޓުގައިވާ ގޮތުން 2023 ވަނަ އަހަރު ޓެކްސްގެ ގޮތުގައި ނުލިބި ހުރި ފައިސާގެ ތެރެއިން އެންމެ ބޮޑު އަދަދެއް ހިއްސާކުރީ ޖީއެސްޓީ އެވެ. ޖީއެސްޓީގެ ގޮތުގައި އެ އަހަރު 2.9 ބިލިއަން ރުފިޔާ ނުލިބި ހުއްޓެވެ. އަދި ޓީޖީއެސްޓީގެ ގޮތުގައި އެއަހަރު 1.3 ބިލިއަން ރުފިޔާ ނުލިބި ހުރިއިރު، ވިޔަފާރީގެ ފައިދާގެ ޓެކްސްގެ ގޮތުގައި 1.7 ބިލިއަން ރުފިޔާ ނުލިބި ހުއްޓެވެ.

ކުއްޔާއި ޓެކްސްގެ ގޮތުގައި ހޯދަން ޖެހޭ ފައިސާ ގަވައިދުން ހޯދައި، ނުލިބި ހުރި ފައިސާގެ އަދަދު ދަށްކުރުމަށްޓަކައި އަޅަންޖެހޭ އެންފޯސްމެންޓް ފިޔަވަޅުތައް ގަވާއިދުން އެޅުން ވަރަށް މުހިއްމު ކަމަށް އެ ރިޕޯޓުގައި ބުނެފައިވެ އެވެ. އަދި ކުލި ނުދައްކާ މައްސަލަތަކުގައި ވެސް، އެކަމާ ގުޅޭ އިދާރާތަކުން ފިޔަވަޅުތައް އަޅަން އެ ރިޕޯޓުގައި އޮޑިޓާ ޖެނެރަލް ލަފާ ދެއްވާފައިވެ އެވެ.