އޮފީސް އިނާޔަތަށް 14.7 މިލިއަން ހޯދުމުގެ ސިޓީގެ ވާހަކަ ތިލަވުމުން އަނެއްކާވެސް ފަލާހު، ޔާމީން ފަހަތުން!

ކުރީގެ ރައީސް އަބްދުﷲ ޔާމީންގެ ވެރިކަން ނިމުނު ހިސާބުން ފެށިގެން މި މަހާ ހަމަޔަށް، ކުރީގެ ރައީސްގެ އޮފީސް ހިންގުމުގެ ހަރަދަށް ޖެހޭ 14.7 މިލިއަން ރުފިޔާ އެއްފަހަރާ ލިބޭނެ ގޮތް ހަމަޖައްސައި ދިނުމަށް އެދި ފިނޭންސް މިނިސްޓްރީ އަށް އެ މަނިކުފާނު ސިޓީއެއް ފޮނުއްވާފައިވާކަން މީޑީއާ އަށް ތިލަވުމާ ގުޅިގެން ވެސް އިނގުރައިދޫ ދާއިރާގެ ޕީއެންސީގެ މެމްބަރު އިބްރާހިމް ފަލާހު ޔާމީނަށް ފާޑުވިދާޅުވެއްޖެ އެވެ.

ކުރީގެ ރައީސުންގެ އިނާޔަތާއި ރައްކާތެރިކަން ދިނުމުގެ ގާނޫނަށް އިސްލާހު ގެނައުމަށް ސަރުކާރުން ހުށަހަޅާފައިވާ ބިލާ މެދު ރައްޔިތުންގެ މަޖިލިހުގައި މިދިޔަ ބުރާސްފަތި ދުވަހު ކުރި ބަހުސްގައި ޔާމީނާ ގުޅުވައިގެން ފަލާހު ދެއްކެވި ވާހަކަތަކަކާ އެކު، ޔާމީންގެ އޮފީސް ހިންގުމުގެ ހަރަދުގެ މައްސަލަ ވަނީ ބަހުސަކަށް ވެފަ އެވެ.

ޕީއެންއެފުން މިދިޔަ ބުރާސްފަތި ދުވަހުގެ ރޭ ބޭއްވި ބައްދަލުވުމުގައި ފަލާހަށް ރައްދު ދިނުމުގެ "ސެޝަން" ގައި ޔާމީން ވިދާޅުވީ އެ މަނިކުފާނުގެ ވެރިކަން ނޮވެމްބަރު 17، 2018 ގައި ބަދަލުވި ފަހުން، ކުރީގެ ރައީސުންގެ އޮފީސް ހިންގުމަށް ދައުލަތުން ދޫކުރާ ބަޖެޓުގެ ތެރެއިން އެއްވެސް ފައިސާއެއް ނުނަންގަވާ ކަމަށެވެ. އަދި ބޭސްފަރުވާ އަށް ވެސް ދައުލަތުން ފައިސާ ހޯއްދަވާފައި ނުވާނެ ކަމަށް ވިދާޅުވި އެވެ.

ޔާމީންގެ ވާހަކަފުޅުގައި ހާއްސަކޮށް ކުރީގެ ރައީސުންގެ އޮފީސް ހިންގުމުގެ ހަރަދު ދައުލަތުން ނުނަންގަވާ ކަމަށް ވިދާޅުވެ، ވަރަށް ބޮޑަށް ދިފާއުވެވަޑައިގަތެވެ.

ނަމަވެސް ޔާމީންގެ ވެރިކަން ނިމުނު ހިސާބުން ފެށިގެން މި މަހާ ހަމަޔަށް، ކުރީގެ ރައީސްގެ އޮފީސް ހިންގުމުގެ ހަރަދަށް ޖެހޭ 14.7 މިލިއަން ރުފިޔާ އެއްފަހަރާ ލިބޭނެ ގޮތް ހަމަޖައްސައި ދިނުމަށް އެދި ފިނޭންސް މިނިސްޓްރީ އަށް އެ މަނިކުފާނު ސޮއިކުރައްވައި މި މަހުގެ 10 ގައި ސިޓީއެއް ފޮނުއްވި ކަން އިއްޔެ މީޑިއާ އަށް ތިލަވި އެވެ. އެކަމަކު، ކުރީގެ ރައީސްގެ އޮފީހުގެ އިނާޔަތް ނުނަންގަވާ ކަމަށް ވިދާޅުވެ، ދިފާއު އަށް ނުކުމެވަޑައިގެންނެވިއިރު އެ އިނާޔަތް ގަނޑުކޮށް ހޯއްދަވަން ސިޓީއެއް ފޮނުއްވިކަން އެއްވެސް ވަރަކަށް ޔާމީން ވިދާޅުނުވެ އޮތީ "ސިއްރު" ކުރައްވައިފަ އެވެ.

އެހެންވެ، ޔާމީނަށް އަބަދުވެސް ފާޑުވިދާޅުވާ، ޕީއެންސީގެ ޕާލަމެންޓްރީ ގުރޫޕުގެ ލީޑަރު ފަލާހު އަނެއް ޔާމީނަށް ސޯޝަލް މީޑިއާގައި މިއަދު "ރައްދު" ދެއްވީ އެވެ.

ފަލާހު ވިދާޅުވީ، 2018-2023 އަށް ޔާމީން ހުރީ ޖަލަށް ލާފައި ކަަމަށް ވާއިރު، ޖަލު ހުކުމެއްގައި ހުންނަ ވެރިއަކަށް އޮފީސް ހިންގުމުގެ ހަރަދު ގާނޫނު އޮތް ގޮތުން ލިބިވަޑައިނުގަންނަވާނެ ކަމަށެވެ.

ޔާމީންގެ އިސްތަށިފުޅުގައި ތަކުރާރުކޮށް "ވައްކަމުގެ" ތުހުމަތު އަޅުވަމުން ފަލާހުގެ ޕޯސްޓުގައި ވިދާޅުވީ، އޮފީސް ހިންގުމުގެ ހަރަދު ދައުލަތުން ހޯއްދެވުމުގައި ވެސް ޔާމީން އަމަލު ކުރެއްވީ އެ ގޮތަށް ކަމަށެވެ.

"އަހަރެން ބައެއް މީހުންނަށް ކަމު ނުދަނީ ތެދަށް މިފަދަ ވާހަކަ ދައްކާތީ،" ފަލާހު ވިދާޅުވި އެވެ.

ޔާމީން ޖަލަށް ލާފައި ހުރި ދުވަސްތައް ވެސް ހިމެނޭ ގޮތަށް ކުރީގެ ރައީސްގެ އޮފީސް ހިންގުމަށް ހަރަދުވާ 14.7 މިލިއަން ރުފިޔާ ދައުލަތުން ދޫކުރަން އެ މަނިކުފާނު އެދިވަޑައިގެންފައިވާތީ އެ ފައިސާ، ބެކްޑޭޓްކޮށް، ދޫކުރުމާ ބެހޭ ގޮތުން ގާނޫނީ ލަފާ ހޯދަން ފިނޭންސް މިނިސްޓްރީން މިހާރު ވަނީ ބަންޑާރަ ނައިބުގެ އޮފީހުގައި އެދިފަ އެވެ. ބަންޑާރަ ނައިބުގެ އޮފީހުން ވެސް އެކަން އިއްޔެ "މިހާރު" އަށް ކަށަވަރު ކޮށްދިނެވެ.

ކުރީގެ ރައީސުންގެ އޮފީހުގެ ހަރަދު ދައުލަތުގެ ބަޖެޓުން ދޫކުރަނީ އެ ކަމަށް އެދިވަޑައިގެން އެ ބޭފުޅަކު ހުށަހެޅުއްވުމުންނެވެ. އެކަމަކު، ޔާމީން މީގެ ކުރިން ދުވަހަކު ވެސް އޮފީސް ހަރަދު ހޯއްދަވަން ހުށަނާޅުއްވާ ކަމަށް އެނގިފައި ވެ އެވެ.

ކުރީގެ ރައީސުންގެ އޮފީސް ހިންގުމަށް ކޮންމެ ބޭފުޅަކަށް ދައުލަތުން މަހަކު 175،000ރ. ލިބޭނެ އެވެ. މި ރޭޓުން ބަލާއިރު ޔާމީނަށް 14.7 މިލިއަން ރުފިޔާ ލިބިވަޑައިގަންނަވާނެ އެވެ.

ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނުގައި ބުނެފައި ވަނީ ރައީސްކަން ކުރައްވާފައިވާ ބޭފުޅަކު މުޖުތަމައަށް ފައިދާ ހުރި އިޖުތިމާއީ މަސައްކަތްތައް ކުރުމަށްޓަކައި އެ ބޭފުޅަކު ބޭނުންވެއްޖެ ނަމަ މަސައްކަތް ކުރާނެ އޮފީހަކާއި މުވައްޒަފުންނާއި އެހެނިހެން ކަންކަން ހަމަޖައްސަން ކޮންމެ މަހަކު 175،000ރ. އާ ހަމައަށް ދައުލަތުން ފައިސާ ދޭން ވާނެ ކަމަށެވެ.

މި އަހަރުގެ އޮކްޓޫބަރު މަހުގެ ނިޔަލަށް ހުރި ހިސާބުތަކަށް ބަލާއިރު ޔާމީން ދިރިއުޅުއްވާ ތަނުގެ ހަރަދާއި މާލީ އިނާޔަތުގެ ގޮތުގައި 8.1 މިލިއަން ރުފިޔާ ވަނީ ދޫކޮށްފަ އެވެ. ވެރިކަން ބަދަލުވި ފަހު އަހަރު ކަމަށްވާ 2019 އިން ފެށިގެން ދިިއުޅުއްވާ ތަނުގެ ހަރަދަށް ކޮންމެ އަހަރަކު 600،000ރ. ޔާމީނަށް ދައުލަތުން ދޫކޮށްފައި ވެ އެވެ. އަދި މާލީ އިނާޔަތަށް ވެސް ކޮންމެ އަހަރަކު ހަމަ އެ ވަރަށް އަންނަނީ ފައިސާ ދޫކުރަމުންނެވެ.

ވެރިކަން ބަދަލުވި އަހަރު ވެސް ދިރިއުޅުއްވާ ތަނުގެ ހަރަދަށް 73،000ރ. އަދި މާލީ އިނާޔަތަށް ވެސް 73،000ރ. ދައުލަތުން ޔާމީނަށް ދޫކޮށްފައި ވެ އެވެ.