އޮފީސް ހިންގުމާއި ބޭސްފަރުވާގެ ފައިސާ ނުނެންގެވިޔަސް ގެކޮޅުގެ ހަރަދާއި މާލީ އިނާޔަތަށް ޔާމީނަށް ވެސް ކޮންމެ މަހަކު ދައުލަތުން ފައިސާ ދޫކުރޭ
ކުރީގެ ރައީސް ޔާމީން ޕީއެންއެފްގެ އެންމެ ފަހުގެ އިންތިހާބުގައި ވޯޓު ދެއްވަނީ.---ފޮޓޯ: ޕީއެންއެފް
28 ނޮވެމްބަރ 2025 - 08:33
އެ މަނިކުފާނުގެ ވެރިކަން ނޮވެމްބަރު 17، 2018 ގައި ބަދަލުވި ފަހުން، ކުރީގެ ރައީސުންގެ އޮފީސް ހިންގުމަށް ދައުލަތުން ދޫކުރާ ބަޖެޓުގެ ތެރެއިން އެއްވެސް ފައިސާއެއް ނުނަންގަވާ ކަމަށާއި ބޭސްފަރުވާ އަށް ވެސް ފައިސާ ނުހޯއްދަވާ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ޔާމީންގެ ޕީއެންއެފުން ބޭއްވި ބައްދަލުވުމުގައި އެ މަނިކުފާނު އެހެން ވިދާޅުވީ، ރައްޔިތުންގެ މަޖިލިހުގެ އިއްޔެގެ ޖަލްސާގައި ކުރި ބަހުސްގައި އިނގުރައިދޫގެ ދާއިރާގެ މެމްބަރު އަދި ޕީއެންސީގެ މެޖޯރިޓީ ލީޑަރު އިބްރާހިމް ފަލާހު ދެއްކެވި ވާހަކަތަކަކާ ގުޅިގެންނެވެ.
ކުރީގެ ރައީސުންނަށް ދައުލަތުން ދޭ ބައެއް އިނާޔަތްތައް ކުޑަކުރަން ސަރުކާރުން ހުށަހެޅި ބިލްގެ ބަހުސްގައި ޔާމީނަށް އަމާޒު ކުރައްވައި ފަލާހު ތުހުމަތު ކުރެއްވި ގޮތުގައި، ކުރީގެ ރައީސުންގެ އޮފީސް ހިންގުމަށް ކޮންމެ ބޭފުޅަކަށް ދައުލަތުން ކަނޑައަޅާފައިވާ 175،000ރ. ބޭނުން ނުކުރެއްވިޔަސް ޔާމީންގެ ގެކޮޅުގައި ސިޔާސީ މަސައްކަތް ކުރަނީ ދައުލަތުން ފައިސާ ލިބިގެންނެވެ.
"އެހެންވީމާ ހަގީގަތުގައި އެ ގޭގޭގައި ވެސް މި އިނާޔަތް ނުދިން ކަމުގައި ވިޔަސް އޮފީސް ހިންގުމަކީ ހަމަ ދައުލަތުން ފައިސާ ދީގެން އޮފީސް ހިންގުން ކަމަށް ރައްޔިތުންނަަށް ބެލެވެނީ،" ފަލާހު ވިދާޅުވި އެވެ.
އަދި ޔާމީންގެ ގެކޮޅަކީ "ނުހައްގު" ފައިސާގެ އިމާރާތެއް ކަމުގެ ތުހުމަތު ވެސް ޔާމީންގެ އިސްތަށިފުޅުގައި ފަލާހު އެޅުވި އެވެ.
މި އަހަރުގެ އޮކްޓޫބަރު މަހުގެ ނިޔަލަށް ހުރި ހިސާބުތަކަށް ބަލާއިރު ޔާމީން ދިރިއުޅުއްވާ ތަނުގެ ހަރަދާއި މާލީ އިނާޔަތުގެ ގޮތުގައި 8.1 މިލިއަން ރުފިޔާ ވަނީ ދޫކޮށްފަ އެވެ.
އެ ވާހަކަތައް ރައްދު ދެއްވަމުން ޔާމީން ރޭ ވިދާޅުވީ، އޮފީސް ހިންގުމުގެ ހަރަދަށް ދައުލަތުން "އެންމެ ލޯ ލާރިއެއް" ވެސް އެ މަނިކުފާނު މިދިޔަ ހަތް އަހަރު ނުނަންގަވާ ކަމަށެވެ.
"ސަރުކާރުގެ ބަޖެޓުން ރައީސްކަން ކޮށްފައި ތިބި މީހުންނަށް އޮވޭ ބޭސްފަރުވާގެ އިނާޔަތް ލާފައި. ހަތް އަހަރު މިދަނީ ބޭސްފަރުވާއެއް އަޅުގަނޑު ކޮށްފައި ނޫނިއްޔާ އަޅުގަނޑުގެ އަންހެނުން ކޮށްފައި ނޯންނާނެ އާސަންދައަކަށް ނުވަތަ ސަރުކާރުގެ އެއްވެސް ފަރާތަކަށް ބިލެއް ފޮނުވާފައެއް،" ދިފާއުގައި ޔާމީން ވިދާޅުވި އެވެ.
ކުރީގެ ރައީސުންނަށް އިނާޔަތްތަކެއް ދިނުމަށް ގާނޫނުގައި ބަޔާންކޮށްފައި އޮތަސް އެ މަނިކުފާނު ވިދާޅުވި ގޮތުގައި ހުރިހާ ރައީސުން އެ އިނާޔަތްތައް ނުނަންގަވަ އެވެ.
"ހަމަ ޔަގީނުން ވެސް މި ރައީސެއް ނުނަގަން،" އަމިއްލަ ނަފުސަށް އިޝާރާތް ކުރައްވަމުން ޔާމީން ވިދާޅުވި އެވެ.
އޮފީސް ހިންގުމުގެ ހަރަދަށާއި ބޭސްފަރުވާ އަށް ދައުލަތުން ފައިސާ ނުނަންގަވާ ކަމަށް ޔާމީން ވިދާޅުވި ނަމަވެސް އެހެނިހެން މާލީ އިނާޔަތްތައް އެ މަނިކުފާނަށް ދައުލަތުން ދޫކުރަމުން އަންނަކަން ފިނޭންސް މިނިސްޓްރީގެ ރެކޯޑުތަކުން ދައްކަ އެވެ. އެ ގޮތުން ދިރިއުޅުއްވާ ތަނުގެ ހަރަދާއި މާލީ އިނާޔަތް ކޮންމެ މަހަކު ނަންގަވަ އެވެ.
މި އަހަރުގެ އޮކްޓޫބަރު މަހުގެ ނިޔަލަށް ހުރި ހިސާބުތަކަށް ބަލާއިރު ޔާމީން ދިރިއުޅުއްވާ ތަނުގެ ހަރަދާއި މާލީ އިނާޔަތުގެ ގޮތުގައި 8.1 މިލިއަން ރުފިޔާ ވަނީ ދޫކޮށްފަ އެވެ. ވެރިކަން ބަދަލުވި ފަހު އަހަރު ކަމަށްވާ 2019 އިން ފެށިގެން ދިިއުޅުއްވާ ތަނުގެ ހަރަދަށް ކޮންމެ އަހަރަކު 600،000ރ. ޔާމީނަށް ދައުލަތުން ދޫކޮށްފައި ވެ އެވެ. އަދި މާލީ އިނާޔަތަށް ވެސް ކޮންމެ އަހަރަކު ހަމަ އެ ވަރަށް އަންނަނީ ފައިސާ ދޫކުރަމުންނެވެ.
ކުރީގެ ރައީސުންގެ ގޮތުގައި މިހާރު ތިއްބެވި ފަސް ބޭފުޅުން (ކ-ވ) ޔާމީން، ނަޝީދު، އިބްރާހިމް މުހައްމަދު ސޯލިހު، މައުމޫން އަދި ވަހީދު
ވެރިކަން ބަދަލުވި އަހަރު ވެސް ދިރިއުޅުއްވާ ތަނުގެ ހަރަދަށް 73،000ރ. އަދި މާލީ އިނާޔަތަށް ވެސް 73،000ރ. ދައުލަތުން ޔާމީނަށް ދޫކޮށްފައި ވެ އެވެ.
ކުރީގެ ރައީސުންގެ ރެކޯޑުތަކަށް މިހާތަނަށް ބަލާއިރު ބޭސްފަރުވާގެ ހަރަދު އެއްވެސް ވަރަކަށް ދައުލަތުން ނުހޯއްދަވަނީ ޔާމީންގެ އިތުރުން ރައީސް މުހައްމަދު ވަހީދު އެކަންޏެވެ. އެކަމަކު، އޮފީސް ހިންގުމުގެ ހަރަދު ޔާމީން ފިޔަވައި ކުރީގެ ހުރިހާ ރައީސުން ނަންގަވަ އެވެ.
ސަރުކާރުގެ ފަރާތުން ހުޅުދޫ ދާއިރާގެ މެމްބަރު މުހައްމަދު ޝާހިދު ރައްޔިތުންގެ މަޖިލިހަށް ހުށަހެޅުއްވި ބިލް ފާސްވެއްޖެ ނަމަ ކުރީގެ ރައީސުންގެ އޮފީސް ހިންގުމަށް ދައުލަތުން ދޫކުރާ ހުރިހާ ފައިސާއެއް ދިނުން ހުއްޓާލަން ޖެހޭނެ އެވެ.
ކުރީގެ ރައީސުންނަށް އިނާޔަތް ދިނުމުގެ ގާނޫނުގެ 8 ވަނަ މާއްދާގައި ބުނެފައި ވަނީ އެ ބޭފުޅުން މުޖުތަމައަށް ފައިދާހުރި އިޖުތިމާއީ މަސައްކަތެއް ކުރެއްވުމަށްޓަކައި ބޭނުންފުޅުވެއްޖެ ހާލަތެއްގައި މަސައްކަތް ކުރައްވާނެ އޮފީހަކާއި މުވައްޒަފުންނާއި އެހެނިހެން ކަންކަން ހަމަޖެއްސުމަށްޓަކައި ކޮންމެ މަހަކު 175،000ރ. އާ ހަމައަށް ދައުލަތުން ފައިސާ ހަމަޖައްސައިދޭން ވާނެ ކަމަށެވެ.
ނަމަވެސް ޝާހިދު ހުށަހެޅުއްވީ އެ މާއްދާ އުވާލާށެވެ. އެހެންވެ، ބިލް ފާސްވެ ތަސްދީގު ކުރުމާ އެކު، ކުރީގެ ރައީސުންނަށް ދައުލަތުން ދޫކުރާ ފައިސާ އެއްކޮށް ކެނޑޭނެ އެވެ.
ބިލްގައިވާ ގޮތުން ކުރީގެ ރައީސުން އިތުރު ދައުރަކަށް ހޮވިއްޖެ ނަމަ ނުވަތަ ދައުލަތުގެ އެހެން މަގާމެއް އަދާކުރައްވާ ނަމަ އެ މުއްދަތަށް ކުރީގެ ރައީސުންގެ އިނާޔަތުން މަހުރޫމްވާނެ އެވެ. ހަމަ އެ އުސޫލު ކުރީގެ ނައިބު ރައީސުންނަށް ވެސް ހިނގާ ގޮތަށް ގާނޫނު އިސްލާހު ކުރަން ސަރުކާރުން ވަނީ ހުށަހަޅައިފަ އެވެ.
ކުރިއާ ހިލާފަށް، ކުރީގެ ރައީސުންގެ ބިލްގައި ވަނީ ކުރީގެ ނައިބު ރައީސުންނަށް ދައުލަތުން މާލީ އިނާޔަތާއި ރައްކާތެރިކަން ދިނުމުގެ ބާބެއް ވެސް އިތުރުކޮށްފަ އެވެ.
ކުރީގެ ނައިބު ރައީސަށް ކަނޑައަޅާފައި ވަނީ މާލީ އިނާޔަތަށް ކޮންމެ މަހަކު 25،000ރ. ދޭށެވެ. އެކަމަކު، މިހާރު ތިއްބެވި ކުރީގެ ނައިބު ރައީސުންގެ ތެރެއިން އެ އިނާޔަތަށް ޝަރުތު ހަމަވަނީ އެމްޑީޕީގެ ފަހު ވެރިކަމުގައި އެ މަގާމު ފުރުއްވި ފައިސަލް ނަސީމަށް އެކަންޏެވެ.
އެއީ ކުރީގެ ނައިބު ރައީސުންގެ ތެރެއިން މާލީ އިނާޔަތާއި ރައްކާތެރިކަން ލިބޭނީ ގާނޫނުއަސާސީގައިވާ ގޮތަށް ފަސް އަހަރުގެ ރިޔާސީ ދައުރެއް ފުރިހަމަ ކުރައްވާފައިވާ ބޭފުޅުންނަށް ކަމަށް ގާނޫނަށް ހުށަހެޅި އިސްލާހުގައި ބަޔާންކޮށްފައި ވާތީ އެވެ. ފައިސަލް ފިޔަވައި ހުރިހާ ނައިބު ރައީސުންނަށް ވަނީ އެކި ސަބަބުތަކާ ހެދި ދައުރުގެ ވަކި ހިސާބަކުން މަގާމު ގެއްލިފަ އެވެ.
ކުރީގެ ރައީސުންނަށް ދައުލަތުން އިނާޔަތާއި ރައްކާތެރިކަން ދިނުމުގެ ގާނޫނުގައިވާ ގޮތުން މަގާމުގައި ތިއްބެވި އިރު، ޖިނާއީ ކުށެއް ކުރި ކަން ޝަރީއަތަށް ސާބިތުވާ ވަގުތުން ފެށިގެން އޭނާ އާއި އަނބިމީހާ ނުވަތަ ފިރިމީހާ އަށް ގާނޫނުގެ ދަށުން ލިބިދޭ ރައްކާތެރިކަމާއި އިނާޔަޔްތަކުން މަހުރޫމް ވާނެ އެވެ. ކުރީގެ ރައީސުންގެ ގާނޫނަށް ގެންނަން ހުށަހެޅި އިސްލާހުތަކުގައި ކުރީގެ ނައިބު ރައީސުންގެ އިނާޔަތުގެ ވާހަކަ ހިމަނާފައި ވާތީ އެ ބޭފުޅުންނަށް ވެސް އެ އުސޫލު ހިންގާނެ އެވެ.
ކުރީގެ ރައީސުންނަށް ދައުލަތުން މާލީ އިނާޔަތާއި ރައްކާތެރިކަން ދިނުމުގެ ބިލް ރައްުޔިތުންގެ މަޖިލިހަށް އިއްޔެ ބަލައިގަނެ ވަނީ ދިރާސާ ކުރަން ކަމާ ގުޅޭ ކޮމިޓީ އަށް ފޮނުވައިފަ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
މީނައަށް އިތުބާރުނުކުާތި
29 November 2025
ފުރަތަމަ ކަމަކީ ތި ހެދީ ބޮޑު ދޮގެއް. ފިނޭންސުން އެ ބުނަނީ އެބައޮތޭ އެދިފަ . އެ ވެސް ބެކްޑޭޓްކޮށް. ދެން ބޮޑޫ 2 ރަށްޓެހިން، ވިޔަފާރީގެ ޕާރޓުނަރުން. ތިކަން ހަމަޖެހޭނެ
ޒާތީ
28 November 2025
ގަބޫލުކުރިޔަސް ނުކުރިޔަސް މި ގައުމު މިހާރު މިއޮތް އަނދަވަޅުން އެރުވޭނެ ހަމައެކަނި މީހަމީ ރައީސް ޔާމީނު. ނުބުނަން އެއީ ފޮތެކޭ. އެކަމަކު އިގްތިޞާދީ ހަރުދަނާ ސިޔާސަތުތަކެއް ގެންގުޅޭ މީހެއް އެއީ.
ކިންގިޑޮނާޑު
28 November 2025
ވެރިކަމުގައި ހުރި އެއް އިރެއްގައި ވިދާޅުވި މުސާރަވެސް ނުނަގަމޭ. މިއީ އަތުން އަތަށް ދޭ އެއްޗެއް ވިއްޔަ. ރަނގަޅަށްވިއްޔާ "ނުވެސް އެނގި" ހުންނާނީ ޖަމާކޮށްދީފަ ފެށުނީއްސުރެ މަހުން މަހަށް.
މަނީމަނީ
28 November 2025
އެންމެ ލޯ ލާރިއެއްވެސް ދޭންޖެހޭ ކަމަކަށް ނުދެކެން. އެއީ އެއަށްވުރެ މާ ގިނައިން ރައްޔިތުންގެ ފައިސާއިން ނެގިކަން ސާބިތު ވާތީ. އަދި އެތައް ނުހައްގު ފައިސާގެ ޑީލްތައް ހަދާފައިވާތީ
އަދާލަތު
28 November 2025
މިވަރުންދަންޏާ ޔާމީނުގެމަސްކޮށާގެންވެސް ފަލާޙުމެންކާނެ. މަޖިލިސްމެމްބަރުން މަޖިލީހުންވަކިވީމައި އެ ދެނީ ކޮންޕެންޝަނެއްތޯ؟ 38-40 ހަކަށްއަހަރު ޚިދުމަތްކޮށްފައިނުކުތީމައިވެސް ލިބެމުންއައި ޕެންޝަންފައިސާކޮޅު ކަނޑާލާފައި، ޕެންޝަންސްކީމުން 5000 ރުފިޔާލިބޭތީ ދައުލަތުން އެއްމެލާރިއެއްވެސްނުދޭ. ޕެންޝަން ސްކީމްގައިހުންނާނީ އެމީހެއްގެ އަމިއްލަފައިސާ. މިއީ ހަމަހަމަ ޤާނޫނު.
ދޮޅި ހުސޭނު
28 November 2025
ލަދެއް ހަޔާތެއް ނެތުނީމަ މިކަހަލަ ވާހަކަ ވެސް ދައްކާނެ!!
ހުސޭނާ
28 November 2025
ލާރިޔާ ހެދި ބޫތުކައެފަ ހުންނަ މީހެއް
ޑރ ވާންޗޯ
28 November 2025
ހެޔޮވެރިކަމެއް ކުރުމަކީ އަބަދުވެސް ސިޔާސީމީހުން ކުރީގެ ވެރިންނަށާ ސަރުކާރުތަކަށް ބެވުންބާ؟. އެސަރުކާރުތަކުން ކުރާކަންތަކުގެ ގޯސްވާހަކަ ދައްކައިގެން ވެރިކަން ލިބިއްޖެނަމަ ރަންއިލޮށިން ކަދުރުކާންދިނުމަށް ވައުދެއްނުވަންތޯ؟.
ނުކުރެވުނޭދޯ
28 November 2025
ރައީސް ޔާންޓޭ ހީއެއްނުވޭ ދައުލަތުން ދޭ އިނާުޔަތް ނުލިބިގެން ފަޔަށް ހިނިއަރައިގަނެގެން އުޅޭގޮތަށް އުޅޭނެހެން ކުރީގެ 3 އަހަރު ރައީސް ކަން ކުރި މީހަކު އަމިއްލަ އަށް އެދިގެން އިނާޔަތް އޭނާ ހޯދީ އެއީ ބަޚީލު އަދި އަތުން ފައިން މަސައްކަތް ނުކޮށް އުމުރުގައި ވެސް ކައިގެން ބޮއިގެން އުޅޭ މާލޭ މީހުންގެ މޮޑެލްގެ ދާދާ އެބާވަތުގެ މީހުން އުޅޭނެ ދައުލަތް ފެލާލަން ރައީސް ޔާމީންގެ ގޯތި އެކަނި ދޯ 25 ބުރިއަށް ހެދީ އަމިއްލަ ފައިސާ ގައި ދެން އެކަކަށް ވެސް އެވަރުވެސް
ގައުމުގެ ވިންދު
28 November 2025
ކުރީގެ ރައީސުންނަށް އިނާޔަތް ދިނުމުގެ ގާނޫނުގެ 8 ވަނަ މާއްދާގައި ބުނެފައި ވަނީ އެ ބޭފުޅުން މުޖުތަމައަށް ފައިދާހުރި އިޖުތިމާއީ މަސައްކަތެއް ކުރެއްވުމަށްޓަކައި ބޭނުންފުޅުވެއްޖެ ހާލަތެއްގައި ކޮން ރައީސެއްތޯ މިކަންތައް ކުރައްވަނީ، މި އިނާޔަނަތަކީ ވަކި ކަމެއް ފުރިހަމަ ވުމުން ދޭންޖެހޭ އިނާޔަތަކަށްވާއިރު މި ކަންތައް ނުކުރައްވާ ރައީސުންނަށް މި އިނާޔަތްދިނުމަކީ ކޮރަޕްޝަން، ނުކުރާ މަސައްކަތަށް ލާރިދިނުން ކަހަލަ ކަމެއްހަމަ،