އޮފީސް ހިންގުމުގެ ހަރަދަށް ޖެހޭ 14.7 މިލިއަން ރުފިޔާ އެއްފަހަރާ ހޯއްދަވަން ޔާމީން ފިނޭންސަށް ސިޓީއެއް ފޮނުއްވީ މި މަހުގެ 10 ގައި.
ކުރީގެ ރައީސް އަބްދުﷲ ޔާމީން ޖަލްސާއެއްގައި ވާހަކަ ދައްކަވަނީ: ކުރީގެ ރައީސުންގެ އޮފީސް ހިންގުމުގެ ހަރަދަށްވާ ފައިސާ މިހާތަނަށް ވެސް ޔާމީނަށް ދީފައި ނުވާތީ އެ ފައިސާ ހޯދަން ވަނީ ހުށަހަޅުއްވާފައި. - ފޮޓޯ: ނިޝާން އަލީ / މިހާރު
28 ނޮވެމްބަރ 2025 - 18:02
ކުރީގެ ރައީސް އަބްދުﷲ ޔާމީންގެ ވެރިކަން ނިމުނު ހިސާބުން ފެށިގެން މިއަދާ ހަމަޔަށް، ކުރީގެ ރައީސްގެ އޮފީސް ހިންގުމުގެ ހަރަދަށް ޖެހޭ 14.7 މިލިއަން ރުފިޔާ އެއްފަހަރާ ލިބޭނެ ގޮތް ހަމަޖައްސައި ދިނުމަށް އެދި ފިނޭންސް މިނިސްޓްރީ އަށް އެ މަނިކުފާނު ހުށަހަޅުއްވާފައިވާކަން އެނގިއްޖެ އެވެ.
ރައީސުލްޖުމްހޫރިއްޔާކަން ކުރައްވާފައިވާ ބޭފުޅުންނަށް ރައްކާތެރިކަމާއި އިނާޔަތް ދިނުމުގެ ގާނޫނުގެ ދަށުން ދޫކުރާ މި ފައިސާ އާއި ބޭސްފަރުވާ އަށް ވެސް ނޮވެމްބަރު 17، 2018 ގައި ވެރިކަން ނިމުނީންސުރެ ދައުލަތުން ފައިސާ ނުނަންގަވާ ކަމަށް ވިދާޅުވެ، ޕީއެންއެފްގެ ރޭ ޖަލްސާގައި ޔާމީން ވަނީ ދިފާއުވެ ވާހަކަފުޅު ދައްކަވައިފަ އެވެ.
މައުލޫމާތު އެނގިވަޑައިގަންނަވާ ބޭފުޅަކު މިއަދު ވިދާޅުވީ ޔާމީން އޮފީސް ހިންގުމުގެ ހަރަދަށް ފައިސާ ހޯއްދަވަން ހުށަހެޅުއްވީ މި މަހުގެ 10 ވަނަ ދުވަހު ސީދާ ޔާމީން ސޮއިކުރައްވައި ފިނޭންސް މިނިސްޓްރީ އަށް ފޮނުއްވި ސިޓީއެއްގައި ކަމަށެވެ.
އިޖުތިމާއީ ކަންކަން ކުރުމަށް ކުރީގެ ރައީސުންގެ އޮފީސް ހިންގުމަށް ދައުލަތުން ފައިސާ ދޫކުރަނީ އެކަމަށް ފައިސާ ހޯދަން އެ ބޭފުޅަކު ހުށަހެޅުއްވުމުންނެވެ. އެހެންވެ، މިހާތަނަށް ވެސް ޔާމީން ހުށަހަޅުއްވާފައި ނުވާތީ އެ ފައިސާ ދޫކޮށްފައެއް ނުވެ އެވެ.
އެނގިފައިވާ ގޮތުގައި އެ ފައިސާ، ބެކްޑޭޓް ކޮށްފައި ދޫކުރުމާ ބެހޭ ގޮތުން ގާނޫނީ ލަފާ ހޯދަން ފިނޭންސް މިނިސްޓްރީން މިހާރު ވަނީ ބަންޑާރަ ނައިބުގެ އޮފީހުގައި އެދިފަ އެވެ. އެ ލަފަޔަށް އެދިފައިވާކަން ބަންޑާރަ ނައިބުގެ އޮފީހުން "މިހާރު" އަށް މިއަދު ކަށަވަރު ކޮށްދިނެވެ.
"އެފަދަ ލަފަޔަކަށް ވަނީ ފިނޭންސުން އެދިފައި. އެކަމަކު މިހާތަނަށް އަދި އެކަމުގައި ލަފައެއް ނުދޭ،" ބަންޑާރަ ނައިބުގެ އޮފީހުގެ އޮފިޝަލަކު ވިދާޅުވި އެވެ.
ކުރީގެ ރައީސުންގެ އޮފީސް ހިންގުމަށް ކޮންމެ ބޭފުޅަކަށް ދައުލަތުން މަހަކު 175،000ރ. ލިބޭނެ އެވެ. މި ރޭޓުން ބަލާއިރު ޔާމީނަށް 14.7 މިލިއަން ރުފިޔާ ލިބިވަޑައިގަންނަވާނެ އެވެ.
ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނުގައި ބުނެފައި ވަނީ ރައީސްކަން ކުރައްވާފައިވާ ބޭފުޅަކު މުޖުތަމައަށް ފައިދާ ހުރި އިޖުތިމާއީ މަސައްކަތްތައް ކުރުމަށްޓަކައި އެ ބޭފުޅަކު ބޭނުންވެއްޖެ ނަމަ މަސައްކަތް ކުރާނެ އޮފީހަކާއި މުވައްޒަފުންނާއި އެހެނިހެން ކަންކަން ހަމަޖައްސަން ކޮންމެ މަހަކު 175،000ރ. އާ ހަމައަށް ދައުލަތުން ފައިސާ ދޭން ވާނެ ކަމަށެވެ.
ނަމަވެސް ޖަލުގައި ގިނަ ދުވަސްތަކެއް ވެސް ހޭދަކުރައްވާފައިވާ ޔާމީން މި މަހުގެ 10 ވަނަ ދުވަހާ ހަމައަށް އޮފީސް ހިންގުމުގެ ހަރަދު ހޯއްދަވަން ދައުލަތުގައި އެދިވަޑައިގެންފައި ނުވާ ކަމަށް އެނގިފައިވެ އެވެ.
ކުރީގެ ރައީސުންގެ އޮފީސް ހިންގުމުގެ ހަރަދު ނުނަންގަވާ ކަމަށް ވިދާޅުވެ، ދިފާއުގައި ޔާމީން ރޭ ވާހަކަ ދެއްކެވިއިރު އެ ހަރަދަށް މިހާތަނަށް ޖެހޭ 14.7 މިލިއަން ރުފިޔާ ހޯއްދަވަން ފިނޭންސް މިނިސްޓްރީ އަށް ސިޓީފުޅެއް ފޮނުއްވި ވާހަކަ ވެސް ހާމައެއް ނުކުރައްވަ އެވެ.
އޮފީސް ހިންގުމުގެ ހަރަދާއި ބޭސްފަރުވާއަށް ދައުލަތުން ފައިސާ ނުނަންގަވާ ކަމަށް ޔާމީން ރޭ ވިދާޅުވީ ރައްޔިތުންގެ މަޖިލިހުގެ އިއްޔެގެ ޖަލްސާގައި އިނގުރައިދޫގެ ދާއިރާގެ މެމްބަރު އަދި ޕީއެންސީގެ މެޖޯރިޓީ ލީޑަރު އިބްރާހިމް ފަލާހު ޔާމީނަށް ދެއްވި ބަހުގެ ހަމަލާތަކާ ގުޅިގެންނެވެ.
ކުރީގެ ރައީސުންނަށް ދައުލަތުން ދޭ ބައެއް އިނާޔަތްތައް ކުޑަކުރަން ސަރުކާރުން ހުށަހެޅި ބިލްގެ ބަހުސްގައި ފަލާހް ވިދާޅުވީ ކުރީގެ ރައީސުންގެ އޮފީސް ހިންގުމަށް ދައުލަތުން ކަނޑައަޅާފައިވާ ފައިސާ ބޭނުން ނުކުރެއްވިޔަސް ޔާމީންގެ ގެކޮޅުގައި ސިޔާސީ މަސައްކަތް ކުރަނީ ދައުލަތުން ފައިސާ ލިބިގެން ކަމަށެވެ.
"އެހެންވީމާ ހަގީގަތުގައި އެ ގޭގޭގައި ވެސް މި އިނާޔަތް ނުދިން ކަމުގައި ވިޔަސް އޮފީސް ހިންގުމަކީ ހަމަ ދައުލަތުން ފައިސާ ދީގެން އޮފީސް ހިންގުން ކަމަށް ރައްޔިތުންނަަށް ބެލެވެނީ،" ޔާމީންގެ ގެކޮޅަކީ ނުހަައްގު ފައިސާއިން ބިނާކުރެއްވި ތަނެއް ކަމަށް ތުހުމަތުކުރައްވަމުން ފަލާހު ވިދާޅުވި އެވެ.
އޮފީސް ހިންގުމުގެ ހަރަދާއި ބޭސްފަރުވާއަށް ޔާމީން ފައިސާ ނުނެންގެވި ނަމަވެސް ގާނޫނުގައި ބުނާ އެހެން އިނާޔަތްތައް ޔާމީނަށް ދައުލަތުން ދެ އެވެ.
މި އަހަރުގެ އޮކްޓޫބަރު މަހުގެ ނިޔަލަށް ހުރި ހިސާބުތަކަށް ބަލާއިރު ޔާމީން ދިރިއުޅުއްވާ ތަނުގެ ހަރަދާއި މާލީ އިނާޔަތުގެ ގޮތުގައި 8.1 މިލިއަން ރުފިޔާ ވަނީ ދޫކޮށްފަ އެވެ. ވެރިކަން ބަދަލުވި ފަހު އަހަރު ކަމަށްވާ 2019 އިން ފެށިގެން ދިިއުޅުއްވާ ތަނުގެ ހަރަދަށް ކޮންމެ އަހަރަކު 600،000ރ. ޔާމީނަށް ދައުލަތުން ދޫކޮށްފައި ވެ އެވެ. އަދި މާލީ އިނާޔަތަށް ވެސް ކޮންމެ އަހަރަކު ހަމަ އެ ވަރަށް އަންނަނީ ފައިސާ ދޫކުރަމުންނެވެ.
ވެރިކަން ބަދަލުވި އަހަރު ވެސް ދިރިއުޅުއްވާ ތަނުގެ ހަރަދަށް 73،000ރ. އަދި މާލީ އިނާޔަތަށް ވެސް 73،000ރ. ދައުލަތުން ޔާމީނަށް ދޫކޮށްފައި ވެ އެވެ.
މަނީ ލޯންޑަރިން އާއި ޚިޔާނާތުގެ ކުށުގައި ޔާމީން ޖަލުގައި ބަންދުކޮށްފައި ހުރި ދެ އަހަރުގެ މުއްދަތުގައި ނުލިބި އޮތް 2.4 މިލިއަން ރުފިޔާ ވެސް ޔާމީން ވަނީ އިސްތިއުނާފް މަރުހަލާގައި ޖަލުން ސަލާމަތްވުމާ އެކު ހޯއްދަވައިފަ އެވެ. އެ ފައިސާ ހޯދަން ހުށަހެޅުއްވުމުން ޖެނުއަރީ 2022 ގައި ޔާމީން އޭރުގެ ސަރުކާރުގައި ވަނީ ފައިސާ ދޫކޮށްފަ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
ްއަންދަލޫސިޔާ
29 November 2025
އަޖައިބެއްނު. ޖަލަށް ލާއިރަށް ވަގުތުން އިނާޔަތް ކަނޑާލާ. ޖަލުން ދޫކޮށް ސްޕްރީމް ކޯޓުން ޙުކުމް ބާޠިލްކުރީމާ ވަގުތުން އެ ފައިސާ ދޭން ވެސް ފަށަންޖެހޭނެ.
ރައީސުލް
29 November 2025
ޔާމީނެއްނޫން. މައުމޫނަށްވެސް، އަންނިއަށްވެސް އަދި ވަހީދަށްވެސް މިވަރަށް ލާރިދޭކަށްނުޖެހޭ. މިއިން ކޮންމެމީހެއްގެ ގެދޮރު މާލޭގަހުރޭ. އަންނިވެސް އެއުޅެނީ ބޮޑުމުސާރަލިބޭ ޖޮބެއްގަ މިހާރުވެސް. ރައްޔިތުން ފަޤީރު ހާލުގަ އުޅޭއިރު މިމީހުން ދިރިއުޅެންޖެހެނީ ހާދަ ފެންވަރުގައޭދޯ. ދެރަކަމެއް. މިހެންވަނީ ރައްޔިތުން އިންތިޚާބުކުރާ މަޖިލިސް މެންބަރުން ހަދާ ޤަވާއިދުތަކުގެ ސަބަބުން. ރައްޔިތުން ތަންކޮޅެއް ހޭލުންވެރިވާންޖެހޭ
ތިމާވެށި
29 November 2025
ހާދަ ބޮޑު ހަރަދެއް ކުރީމަ އޭ މިވާހަކަ ފަލަ ސުރުހީ އަށް އަރާނީ މަގޭ ހިތައް އަރަ އެވެ. މޫނު މަތި ރީތި ކުރަނީ އެވެ.
ކޮރަލް
29 November 2025
މުއިއްޒި އާ ވާދަކުރެވޭނެ މީހަކަށް ހުރީ ޔާމީން އެވެ. އޭނަ ގެ ވެރިކަމުގަ ވޭތުވެދިޔަ 50 އަހަރު ނުވާ ވަރަށް ކަންކަން ކޮށްދީ ފެންނާން އެބަ ހުއްޓެވެ. ކުރީގެ ރައީސުން އޮފީސް ހިންގުމުގެ ހަރަދު ދިޔައީ ނަގަމުންނެވެ. ޔާމީން އެހޯދަން މަސައްކަތް ކުރަން ފެށި ހިސާބުން ގާނޫނެއް ހަދައިފި އެވެ. ސޯސަލް މީޑިޔާ އާ ހަބަރު ފަތުރާ ވަސީލަތް ތައް ބޭނުން ކޮށްގެން ޔާމީން އާ ދެކޮޅަށް އެންޓި ކެމްޕޭން ދަނީ ކުރަ މުންނެވެ.
ބަކަރިހަން
29 November 2025
ނުލިބޭ އެއްޗެއް ވާނީ ނުލިބޭ ކަމަށް. ސިޓީ އެއް ނޫން އީމެއިލް ކުރިޔަސް. ދިނީމަ ދޯ ބުނެެވޭނީ ހިފާފަ ބޭނުން އެބަ ކުރެޔޭވެސް. މީގެއިން ޔަގީންވަނީ ހަމަ އެއްވެސް ލާރިއެއް ނުލިބޭކަން.
ތުއްތު ކަލޯ
29 November 2025
ކަލޯ ތި މީހުން އަތުން ތިޔަ ލާރި ކޮޅު ލިބޭނެ ކަމުގެ ގެރެންޓީ ވަރަށް ކުޑަ! އެބައި މީހުންނަކީ މަނިކުފާނަށް އެ އޮންނަ ނަފުރަަތާއި ހަސަދަވެރި ކަމާއި ޒާތިވެގެން ތިބޭހާ ހިނދަކު ލާރިކޮޅު ވެސް ނުދިނުމުގެ ވިސްނުން ނެރެމުން ދަނީ
މުލޭ
29 November 2025
ރާއްޖޭގައި މިހިންގާ ސިޔާސީ މަސައްކަތަކީ މުޖުތަމަޢަށް ފައިދާހުރި ކަމެއް ނޫން. އެއީ މުޖުތަމަޢު ފަސާދަ ކުރާ ކަމެއް. މައުމޫން އެކަނި މުޖުތަމަޢަށް ފައިދާހުރި ކަމެއް ކުރަނީ. ސްކޮލަޝިޕް ދިނުމާއި ދީނީ ހޭލުންތެރިކަން އިތުރުކުރަން މައުމޫނު މަސައްކަތްކުރައްވާ. އެހެން އެއްވެސް ރައީސަކަށް ތިޔަ ޢިނާޔަތެއް ޙައްގެއް ނޫން. ޔާމީން ކޮންއިރަކުތޯ ތިޔަބުނާ އޮފީހެއް ހިންގީ. ނުޖެހޭނެ ތިޔަފައިސާ ދޭކަށް. ލަދެއްވެސް ނުގަނޭދ ފައިސާ ނުނަގަމޭކިޔާފައި އެތައް މިލިއަނަަށް އެދެން
ނަރީސު
29 November 2025
ބަލަ ޔާމީން އޮފީހެއް ހިންގާތަ؟ ރައީސްކަން ކުރައްވާފަ ދެންހާދަހާ އައްޗިކޮށޭ މިއުޅުއްވަނީ. ގަލަމެއް ޖެހުނަސް ފައިސާ، ޓައިޕު ކުރިޔަސް ފައިސާ. މައިކުން ވެސް ފައިސާ. އަބަދު ވެސް އެފައިސާ މިފައިސާ. މިއުޅޭ ގޮތުން ބޯހަލާކު.
ހަސީނައްތަ
29 November 2025
މިމީހާއަށް އަށް ނެތޭ މިނޫން ކަމެއް. އަބަދުވެސް އެފައިސާ މިފައިސާ.
ޖިބްރީލް އަމީން
29 November 2025
ޔާމީން އަމިއްލަފުޅަށް ޔާމީންގެ އަގު ވައްޓާލީ. ޔާމީނަށް އަދިވެސް ނޭނގެ ހެޔޮ އެދޭ މީހުންނާއި ބުރަކަށްޓަށް ވަޅި ހަރާ މީހުން ވަކި ކުރާކަށް. ޔާމީން އަބުރުވެރިކޮށް އުޅެންވީމަ ޖަމީލުގެ ފިތުނަވެރިކަމުގައި ޖެހި ހަސަދަވެރިކަމާއި ރުޅިވެރިކަމުގައި އެ އުޅުއްވެނީ.