"މޯލްޑިވްސް ވޯޓާފްރޮންޓް އެންޑް މެރީނާ މަޝްރޫއު" ހިންގަން އީގަލް ހިލްސްއާ އެކު ސޮއިކުރީ ކޮމާޝަލް ޓާމްސް އެގްރިމެންޓެއްގައި ކަމަށާއި ނަމަވެސް އެ މަޝްރޫއު ފަށާނީ އިތުރު އެއްބަސްވުންތަކެއްގައި ސޮއިކޮށްގެން ކަމަށް އެޓާނީ ޖެނެރަލް އަހުމަދު އުޝާމް މިއަދު ވިދާޅުވެއްޖެ އެވެ.
އެ މަޝްރޫއު ހިންގަން ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއަށް ރަސްމާލެއިން 500 ހެކްޓަރުގެ ބިން 99 އަހަރަށް ކުއްޔަށް ދިނުމަކީ އެ ބިން ވިއްކާލުން ކަމަށް ކުރީގެ ރައީސް އަބްދުﷲ ޔާމީނު ރޭ ސިފަކުރެއްވި އެވެ.
ޔާމީންގެ އެ ތުހުމަތަށް ރައްދު ދެއްވައި، އެކްސްގައި ކުރެއްވި ޕޯސްޓެއްގައި އުޝާމް ވިދާޅުވީ ރަސްމާލެ މަޝްރޫއު ފެށުމުގެ ކުރިން "ޑެފިނިޓިވް އެގްރިމެންޓްތަކެއް" ގައި ސޮއިކުރަން ޖެހޭނެ ކަމަށާއި އޭގެ ކުރިން އެކަމާ ގުޅޭ ގާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށެވެ.
"ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން. މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓާ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި. މަޝްރޫއު ފެށުމުގެ ކުރިން މި އެގްރީމެންޓްގައިވާ ޓާމްސްތަކުގެ މައްޗަށް ބިނާކޮށް އިތުރަށް މަޝްވަރާ ކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން މިކަމާ ގުޅުން ހުރި ގާނޫނުތައް މަޖިލީހުން ފާސްކުރަންޖެހޭނެ،" އެ ޕޯސްޓްގައި އޭޖީ ވިދާޅުވި އެވެ.
ރަސްމާލޭގައި ހިންގަން އުޅޭ މަޝްރޫއުއާ ވަރަށް ބޮޑަށް ދެކޮޅު ހައްދަވަމުން ގެންދަވާ ޔާމީން ވަނީ އެއީ ގައުމު "ވިއްކާލުން" ކަމަށް ސިފަކުރައްވައި އެކަމާ ގުޅިގެން އެޓާނީ އުޝާމަށާއި ހައުސިން މިނިސްޓަރު ޑރ. އަބްދުﷲ މުއްތަލިބަށް ގާނޫނީ ފިޔަވަޅު އެޅޭނެ ކަމަށް ވިދާޅުވެ އިންޒާރު ދެއްވައިފި އެވެ.
އީގަލް ހިލްސްއަށް ރަސްމާލޭގެ 500 ހެކްޓަރުގެ ބިން ދެނީ އާއްމުކޮށް ރާއްޖޭގައި ޓޫރިޒަމަށް ރަށްތަކާއި ފަޅުތައް ދޫކުރާ ގޮތަށް، 99 އަހަރަށް ކަމަށް ވިޔަސް އެއީ އެ ބިން ވިއްކާލުން ކަމަށް ވެސް ޔާމީން ސިފަ ކުރެއްވި އެވެ.
ޔާމީންގެ އެ ވާހަކަފުޅަށް ރައްދު ދެއްވައި، އުޝާމް ވިދާޅުވީ ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ޔާމީންގެ ވެރިކަމުގައި ކަމަށާއި އޭގެ ކުރިން ރަށްތައް ދޫކުރަމުން އައީ 50 އަހަރަށް ކަމަށެވެ.