ޓޫރިސްޓް ރިސޯޓްތައް 99 އަހަރަށް ކުއްޔަށްދެވޭ ގޮތަށް ޓޫރިޒަމްގެ ގާނޫނު ބަދަލުކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައިކަން ހަނދާންކޮށްދެއްވަމުން، ޔާމީންގެ އިންޒާރުތަކަށް ބަންޑާރަ ނައިބު އަހްމަދު އުޝާމް ރައްދު ދެއްވައިފި އެވެ.
"މޯލްޑިވްސް ވޯޓާ ފްރަންޓް އެންޑް މެރީނާ ޕްރޮޖެކްޓް"ގެ ނަމުގައި ރަސްމާލޭގައި ހިންގަން އުޅޭ މަޝްރޫއުއާ ވަރަށް ބޮޑަށް ދެކޮޅުހައްދަވަމުން ގެންދަވާ ޔާމީން ވަނީ އެއީ ގައުމު ވިއްކާލުން ކަމަށް ސިފަކުރައްވައި އެކަމާ ގުޅިގެން އެޓާނީ އުޝާމަށާއި ހައުސިން މިނިސްޓަރު ޑރ. އަބްދުﷲ މުއްތަލިބާ ގާނޫނު އަރައި ހަމަކުރާނެ ކަމަށް ވިދާޅުވެ އިންޒާރު ދެއްވައިފި އެވެ.
އެ މަޝްރޫއުގެ ކޮމާޝަލް ޓާމްސް އެއްބަސްވުމުގައި ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއާ އެކު ސަރުކާރުން މިހާރު ވަނީ ސޮއިކޮށްފަ އެވެ.
އީގަލް ހިލްސްއަށް ރަސްމާލޭގެ 500 ހެކްޓަރުގެ ބިން ދެނީ އާއްމުކޮށް ރާއްޖޭގައި ޓޫރިޒަމަށް ރަށްތަކާއި ފަޅުތައް ދޫކުރާ ގޮތަށް، 99 އަހަރަށް ކަމަށް ވިޔަސް އެއީ އެ ބިން ވިއްކާލުން ކަމަށް ވެސް ޔާމީނު ސިފަކުރެއްވި އެވެ.
ޔާމީނުގެ އެ ވާހަކަފުޅަށް ރައްދުދެއްވައި އެކްސްގައި ކުރެއްވި ޕޯސްޓެއްގައި އުޝާމް ވިދާޅުވީ ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ޔާމީނުގެ ވެރިކަމުގައި ކަމަށާއި އޭގެ ކުރިން ރަށްތައް ދޫކުރަމުން އައީ 50 އަހަރަށް ކަމަށެވެ.
"ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ގާނޫނެއް އެކުލަވާލެވުނީ 1999 ވަނަ އަހަރު. އޭރު ގާނޫނުގެ ދަށުން ޓޫރިސްޓް ރިޒޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށް. ގާނޫނަށް ގެނެވުނު އިސްލާހަކުން އެމުއްދަތު 50 އަހަރަށް އިތުރުކޮށްފައިވަނީ 2010 ވަނަ އަހަރު ރައީސް [މުހައްމަދު] ނަޝީދުގެ ވެރިކަމުގައި. އަދި އެއަށްފަހު މިމުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައި،" އެކްސްގައި ކުރެއްވި ޕޯސްޓްގައި އުޝާމް ވިދާޅުވި އެވެ.
އޭޖީ ވިދާޅުވި ގޮތުގައި 99 އަހަރަށް ރަށްތައް ދޫކޮށްގެން ތަރައްގީކުރާ ރިސޯޓްތަކުގެ މުއްދަތު ހަމަވެގެން ވަކިކުރާ އިރު އިންވެސްޓްމެންޓްގެ އަގުން ބަލަށް ކަނޑާފައި ޖެހޭ އަގު ސަރުކާރުން ދައްކަން ވެސް ޖެހޭ ކަމަށެވެ.
އެކަމަކު ރަސްމާލޭގައި ހިންގަން އުޅޭ މަޝްރޫއުގައި އަމަލުކުރާނީ އެގޮތަށް ނޫން ކަމަށް އުޝާމް ވިދާޅުވި އެވެ.
"މިއާ ހިލާފަށް ރަސްމާލޭގައި ހިންގުމަށް ރާވާފައިވާ މަޝްރޫއު ގަވަންކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން،" އުޝާމް ވިދާޅުވި އެވެ.
ރަސްމާލެ މަޝްރޫއު ހިންގަން އީގަލް ހިލްސްއާ އެކު އަދި ސޮއިކުރީ ކޮމާޝަލް ޓާމްސް އެގްރިމެންޓެއްގައިކަން ވެސް އުޝާމް ފާހަގަކުރެއްވި އެވެ.
އެ މަޝްރޫއު ފެށުމުގެ ކުރިން ޑެފިނިޓިވް އެގްރިމެންޓްތަކެއްގައި ސޮއިކުރަން ޖެހޭނެ ކަމަށާއި އޭގެ ކުރިން އެކަމާ ގުޅޭ ގާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށް ވެސް އުޝާމް ވިދާޅުވި އެވެ.
އުޝާމް ވިދާޅުވީ މި މަޝްރޫއު ކުރިއަށް ގެންދިއުމުގައި ރާއްޖޭގެ ގާނޫނުއަސާސީ އާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށެވެ.