ބާޒާރުމަތީ ފިހާރައަކަށް ލޮރިއަކުން ބިސް ކޭސްތަކެއް ބާލަނީ. ފޮޓޯ: ނިޝާން އަލީ /މިހާރު
29 ޖޫން 2017 - 14:49
17 comments
ބާޒާރުގައި އާޓިފިޝަލް ބިސް ވިއްކާކަމަށް ބުނެ ފަތުރާ ވާހަކަތަކާ ގުޅިގެން މިހާތަނަށް ބެލިބެލުމުން އެފަދަ ބިހެއް ފެންނަން ނެތް ކަމަށާއި އެކަން ކަށަވަރުވާނީ ސާމްޕަލް ނެގި ބިސްތަކުގެ ނަތީޖާ އަންނަ ހަފުތާގައި ލިބިގެން ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.
އެ މިނިސްޓްރީގެ އެގްޒެކްޓިވް ކޯޑިނޭޓަރު އަބްދުﷲ ޝިޔާޒް މިއަދު ވިދާޅުވީ އާޓިފިޝަލް ބިސް ވިއްކާ ކަމަށް ކުރި ޝަކުވާއާ ގުޅިގެން ރާއްޖެއަށް އާއްމުކޮށް ބިސް އެތެރެކުރާ ފިހާރަތަކަށް އެ މިނިސްޓްރީން ދިޔަ ކަމަށެވެ. އަދި އާޓިފިޝަލް ބިސް ވިއްކި ކަމަށް ސޯޝަލް މީޑިއާގައި ޝައްކުރި ފިހާރައަށް ވެސް މިނިސްޓްރީން ދިޔަ ކަމަށް ވެސް އޭނާ ވިދާޅުވި އެވެ.
"އޭގެ އެއްވެސް ފިހާރައެއްގައި ނެތް އެބުނާ ކަހަލަ ބިހެއް ފެންނަން. އެތަން ތަނުން ވެސް ބުނީ އެ މީހުން ބިސް ގެންނަނީ އާއްމުކޮށް އެތެރެކުރާ ތަންތަނުން ކަމަށް،" ޝިޔާޒް ވިދާޅުވި އެވެ.
އޭނާ ވިދާޅުވީ މިނިސްޓްރީއަށް ހުށަހެޅި ޝަކުވާއާ ގުޅިގެން ނެގި ސާމްޕަލްތައް ފުޑް އެންޑް ޑްރަގް އޮތޯރިޓީން ޓެސްޓްކުރަމުން އަންނަ ކަމަށެވެ. އަދި އެފަދަ ބިހެއް ރާއްޖެ ގެނެސް ނުވިއްކާކަން ކަށަވަރުކުރެވޭނީ އެ ސާމްޕަލްތަކުގެ ނަތީޖާ ލިބިގެން ކަމަށް ވެސް ޝިޔާޒް ވިދާޅުވި އެވެ.
އެ މިނިސްޓްރީން ވަނީ އެކަމާ ގުޅޭ ގޮތުން ހަގީގަތް އޮޅޭ ގޮތަށް މައުލޫމާތު ނުފެތުރުމަށް އިލްތިމާސްކޮށްފަ އެވެ. އަދި އެކަމާ ގުޅޭ ޝަކުވާއެއް އޮތް ނަމަ އެކަން ކަމާ ބެހޭ އިދާރާތަކަށް ހުށަހެޅުމަށް އިކޮނޮމިކް މިނިސްޓްރީން އެދިފައިވެ އެވެ.
ރާއްޖޭގައި ވެސް އާޓިފިޝަލް ކުކުޅު ބިސްތަކެއް ގެނެސް ވިއްކާ ކަމަށް ބުނެ ސޯޝަލް މީޑިއާގަ އާއި ބައެއް ނޫސްތަކުގައި ވެސް ޖަހާފައިވެ އެވެ. ސޯޝަލް މީޑިއާގައި ދައުރުވަމުންދާ ޕޯސްޓެއްގައި ބުނެފައި ވަނީ ރާއްޖެ އަށް ގިނަ އަދަދަކަށް ކުކުޅު ބިސް އިންޑިއާ އިން ފޮނުވާ އެޖެންޓެއް ކަމަށްވާ ފިނެސް މާކެޓް ލިންކްގެ ބައެއް ކޭސްތަކުގައި ޕްލާސްޓިކް ބިސް ހުންނަ ކަމަށެވެ.
ޕްލާސްޓިކް ބިސް ކަމަށް ބުނެ ސޯޝަލް މީޑިއާގައި ޕޯސްޓްކޮށްފައި ހުންނަ ބައެއް ފޮޓޯ އާއި ވީޑިއޯއަށް ބަލާއިރު، އެ ބިސް ފެނުކެއްކުމުން، ބިހުގެ ހުދުބައި ހުންނަނީ ޕްލާސްޓިކް ވިރުވުމުން ހުންނަ ކަހަލަ ގޮތަކަށެވެ. އަދި އެ ހުދުބައިގައި އަލިފާން ޖެއްސުމުން ވިރިފައި ހުންނަ ތަން ވެސް ބައެއް ވީޑިއޯތަކުން ފެނެ އެވެ.
ދާދި ފަހުން ޗައިނާގައި ޕްލާސްޓިކް ހަނޑޫ އުފައްދައިގެން ވިއްކާ ކަމަށް ބުނެ ވީޑިއޯ އާއި ފޮޓޯތަކެއް ސޯޝަލް މީޑިއާގައި ދައުރުވެފައިވެ އެވެ. އެކަމަކު އެފަދަ ހަނޑުލެއް ރާއްޖޭގައި ނުވިއްކާ ކަމަށް ވެސް އިކޮނޮމިކް މިނިސްޓްރީން ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ްޤުއްޓޭ
30 June 2017
ޤައުމު މި އޮތީ ހަލާކުވެ އިންތިހާ އަށް ކޮރަޕްޓް ވެފާ! ވިޔަފާރި ވެރިންވެސް މިހާރު ނަމޫނާ އަކަށް އެ ނެންގެވީ މި ސަރުކާރު. ވާނެ ހަތަރެތި މި އޮތީވެ ނިމިފާ! ރާކަނި މަސް ކެވިއްޖެ އެންނު.
ޗިކުސް
29 June 2017
ފޭކް ބިސް ދައުރުވަމުން އެބަދޭ . ސަމާލް ވެ ތިބުން ބުއްދިވެރި. ހެކިވެސް ދެއްކިދާނެ.
އަލީ
30 June 2017
ކޮންތާކުން ހެކި ނެރެވޭނި. ނުނެރެވޭނެ. މޮޅެތި ވާހަކަ ފަތުރަން ނޫޅެ އަމިއްލައަށް ހޭލުންތެރި މީހަކަށް ވެވޭތޯބަލާ.
އަހުމަދުބެ
29 June 2017
ރައްޔިތުން ބިރު ގަނެ ފާނެތީ ސިއްރު ނުކުރާށެވެ.
ޢަލީ
29 June 2017
މަ ދޭނަން 100% ރާއްޖޭގައި ޕްލާސްޓިކް ބިސް ގެނެސްގެން ނުވިއްކާކަން. އަސްލުވާގޮތަކީ ކުކުޅުބިސް އެކިފަހަރު އެކި ޓެމްޕްރެޗަރގައި ސްޓޯކޮށް ހެދުމުން ބިސް ނުބައިވަނީ. ގިނަފަރަށް އަވީގަވެސް އެބަބަހައްޓަ. ދެން ބިސް ނުބައިވާއިރު ބިހުގެ ތޮށިގަނޑާއި ޖެހިގެން އިންނަބައި ހަރުވެފަ އިންނަ ލޭޔަރެއް އުފެދެނީ. މިއީ އިންޑިއާގަވެސް މިމައްސަލަ އުފެދިގެން އެތާގެ ފުޑް ސޭފްޓީ އޮފިސަރުން ލެބްގަ އެތަކެތި ޓެސްޓްކޮއްފަ ބުނެދީފަވާގޮތް. އަމިއްލައަށް ވާހަކައެއް ހަދައިގެން ދައްކަނީއެއްނޫން. ބިހަކީ އަސްލު ބިސް، އެކަމަކު ޓެންޕްރެޗަރ އަންނަ ދަބަލަކުން ނުބައިވެފަ ހުންނަ ބިސް.
ބަކޫ
30 June 2017
މާ ބޮޑަށް އިނގިފަ ތި އޮތީ ކޯޑިނޭޓަރޫ
ކަނޑުކޮސް
29 June 2017
އަނެއްހެން ރަނގަޅު ވާހަކައެއް. މަނަމަ ސޯޝަލް މީޑިއާ ބޭނުންނުކޮށް ވަގުތުން ބިސްތައް ހިފައިގެން ގޮސް ދައްކާނީ އެއަށްފަހު ސޯޝަލް މީޑިއާއަށް އިންޖެކްޓް ކުރާނީ. އޭރުން ފުޑް އެން ޑްރަގް އޮތޯރިޓީއަށް އެކަން ދޮގެއް ނުކުރެވޭނެ އެންނު.
ޕްރިންސެސް
30 June 2017
ރަގަޅު ގޮތެއް..
ހަސަންބެ.
29 June 2017
ތިޔަ ބުނާ ޕްލާސްޓިކް ބިހެއް ނޫނީ ހަޑުލެއް ލޮލުން ދުއް އެކަކުވެސް މިރާއްޖޭގައި ނޫނީ ދުނިޔެއަކުވެސް ނެތް. ހިތައް އަރަނީ ދޮޅުރުފިޔާ އަށް ލިބޭ ކުކުޅު ބިސް ގޮތަށް ބިހެއް ހަދައިގެން އޭތި ވިއްކުންތޯ އަސްލުބިހެއް ވިއްކުންހޭ ފައިދާ ބޮޑީ.
ވާލުސޮރު
29 June 2017
ހަސަންބެ އަދި ޅައީ. ފޭކް ބިސް އުފައްދަނީ ރެސްޓޯރަންޓް ފަދަ ތަންތަނުން ބާކީވެގެން އުކާލާ ތަކެތިން. ގިނައިން ބިސް އަޅާ ކުކުޅެއްގެ މުޅި އުމުރުގަ އަޅާހާ ބިހުގެ އެތައް ހާސްގުނައެއްގެ ބިސް އެންމެ ދެތިން މިނިޓް ތެރޭ މެޝިނަކުން ނެރެވޭ. ދެން އެހެންވީމަ ބަލާ ފައިދާބޮޑީ ކޮން ގޮތެއްތޯ. ފޭކްބިސް ކާބަޔަކަށް ގެއްލުންވިޔަސް އޭގެ ވިޔަފާރިކުރާ މީހުންނަށް މިލިއަނުން ވާނީ ފައިދާ.
ށށށ
30 June 2017
އަހަރެން މިއުޅެނީ ޗައިނާގަ، މިތަނުގެ ތިކަހަލަ އެތައް ފޭކު އެއްޗެއް ހަދާ. މިހާރު ރާއްޖެއަށް އެންމެ ގިނައިން މުދާ ގެންނަ އެއް ގައުމު ޗައިނާއަކީ. އެހެންވީމަ ރާއްޖޭގައިވެސް ފޭކު ބިސް ކަހަލަ އެއްޗެހި ހުރުން އެކަށީންވެ.
ރަދީފް
29 June 2017
ޕްލާސްޓިކް ބިސް ނެތް ކަން 100% ޔަގީން ވާނެ ގޮތަކީ ކޮންމެ ގެއެއްގަ ކުކުޅު ގެންގުޅެންވީ ، ގައިމު އެކުކުޅު އަޅާ ބިސް އެއީ 100% ނެޗުރަލް އެއްޗަކަށް ވާނެ. ކޮން ސާމްޕަލް އެއްތަ. ވ.ވެދުން
މޫސާބޭ
29 June 2017
ފުރިހަމަ އިތުބާރު އެބައޮތް ރާއްޖޭގެ ވިޔަފާރި ވެރިންނަށާއި މުއައްސަސާތަކަށް، އަޅުގަނޑުމެންގެ ވެލްފެއަރ އާއިމެދު. އިންވެސްޓިގޭޓް ކުރައްވާނެ އަދި މީޑިއާ އާއި އެހެން އެންމެހާ ވަޞީލަތްތައް މެދުވެރިކޮށް އިންފޯމް ކުރައްވާނެ.
ސައްދާމް
29 June 2017
"އޭގެ އެއްވެސް ފިހާރައެއްގައި ނެތް އެބުނާ ކަހަލަ ބިހެއް ފެންނަން. އެތަން ތަނުން ވެސް ބުނީ އެ މީހުން ބިސް ގެންނަނީ އާއްމުކޮށް އެތެރެކުރާ ތަންތަނުން ކަމަށް،"..................... ކުރިން އެނގިފައި ދެން ޕުލާސްޓިކް ކަން ދެނެގަތުމަށް ހަފްތާއެއް ކީއްކުރަން ؟
ކެއްގަދަ އާސްތު
29 June 2017
ކޮބާ ޕްލާސްޓިކް ހަނޑޫ ޓެސްޓް ކުރުން. ކޮބާ ޕްލާސްޓިކް ކެބެޖް، ކޮބާ ޕްލާސްޓިކް ޓޮމާޓޯ. ކޮބާތަ އިހައްދުވަހު ބާޒާރަށް ގެނެސްގެން ވިއްކި ކުލަ ފޭރުތައް؟ ކޮބާތަ ފުޑް އެންޑް ޑްރަގް އޮތޯރިޓީ؟ އޭޝިއާ ގައުމުތަކަށް ރޯދައިރުވެސް ސައުދީއަށް ހަނދު ފެނުނީމަ ހަނދު ސާބިތުކުރާހެން އެހެންގައުމުތަކުގެ ސަމާލުކަމަށް މިކަން އަންނާނެ އިރެއްގެ އިންތިޒާރުގަ ތިބީތަ؟
ރަދީފް
29 June 2017
ރޯދަމަހު ފަހު ދިހައިގެ ދުވަހެއްގަ މާރުކޭޓަށް ދިޔަތަނުން އެތާއިން ބަންގްލަދޭޝް ސޭޓް ބޮޑެތި އާފަލު ދައްކާފަ މިބުނަނީ އެޕަލް މެންގޯ އޭ.އަސްލު އޮޅުންފިލުވިއިރު އެއާފަލްގަ ރަހަ އެއީ އަނބާ އެއްގޮތްރަހަ ހުންނައެއްޗެއް.އެޕަލްމެންގޯ އޭ. ކިހަ ދެރަކަމެއް. ޕްލާސްޓިކް އާފަލް ވެސް އަދި ފެންނާނެ. ވ.ވެދުން