ގޮނޑިތައް ހުސްވިކަމާ މެދު އިދިކޮޅު ފަރާތްތަކުން ސުވާލު އުފައްދާފައި ވަނިކޮށް، ހަތަރު ދާއިރާއެއްގެ ބައި އިލެކްޝަން ބާއްވަން އިލެކްޝަންސް ކޮމިޝަނުން ކުއްލިއަކަށް ނިންމައި މިއަދު އެކަން އިއުލާންކޮށްފި އެވެ. އެކަމަކު އިންތިހާބުތައް ބާއްވާނެ ވަކި ތާރީހެއް ކަނޑައެއް ނާޅަ އެވެ.
އެ ކޮމިޝަނުން ނެރުނު ބަޔާނެއްގައި ބުނެފައިވާ ގޮތުގައި މަޖިލިހުގެ ގޮނޑި ގެއްލިފައި ވަނީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ލޯޔަރު ވައްޑެ) އާއި މަޑުއްވަރި ދާއިރާގެ މެމްބަރު މުހައްމަދު އަމީތު އާއި ވިލިނގިލި ދާއިރާގެ މެމްބަރު ސައުދު ހުސެއިން އަދި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދުގެ އެވެ.
އިލެކްޝަންސްގެ ނިންމުން މިއައީ އެ ހަތަރު މެމްބަރުން ޕީޕީއެމުން ވަކިކޮށް، ގޮނޑި ގެއްލިފައިވާ ކަން، ރޭ ޕީޕީއެމުން ބޭއްވި ކައުންސިލް ބައްދަލުވުމުގައި ރައީސް އަބްދުﷲ ޔާމީން އިއުލާންކުރައްވާފައި ވަނިކޮށެވެ.
ކޮމިޝަންގެ އިއުލާނުގައި ބުނީ އެ ހަތަރު ދާއިރާގެ ބައި އިލެކްޝަން ބާއްވަން ނިންމީ މެމްބަރުންގެ ގޮނޑި ގެއްލުމާ ގުޅޭ ގޮތުން ސުޕްރީމް ކޯޓުން ނެރުނު ހުކުމަށް ރިއާޔަތްކުރުމަށް ފަހު ކަމަށެވެ. އިލެކްޝަނުން މިހެން ބުނި ނަމަވެސް، މާޒީވެފައިވާ ކަމަކަށް އެ ހުކުމް ނުހިނގާނެ ކަމަށް ވެސް ސުޕްރީމް ކޯޓުގެ އަމުރުގައިވެ އެވެ.
ސުޕްރީމް ކޯޓުގެ ހުކުމުގެ ކުރިން އެ މެމްބަރުން ވަނީ ޕީޕީއެމުން ވަކިވެވަޑައިގެންފަ އެވެ. އެހެންވެ، ބައި އިލެކްޝަން ބާއްވަން އިލެކްޝަނުން ނިންމީ، ގާނޫނާ ޚިލާފަށް އިންސާފުން ބޭރުން ކަމަށް ވެސް މެމްބަރުން ގެންދަވަނީ ވިދާޅުވަމުންނެވެ.
މެމްބަރެއްގެ ގޮނޑިއާ މެދު ހިލާފު އުފެދިއްޖެ ނަމަ، އެކަމާ މެދު ގޮތެއް ނިންމުމުގެ ބާރު ގާނޫނުއަސާސީން ދީފައި އޮތީ ސުޕްރީމް ކޯޓަށެވެ. އަދި ސުޕްރީމް ކޯޓަށް މައްސަލަ ހުށަހަޅާނެ ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ.