ހަލީލާއި އިކުރާމް މަގާމުން ވަކިކުރަން ޝާޔަން އުޅުނު

ޕަބްލިކް ސާވިސް މީޑިއާ (ޕީއެސްއެމް)ގެ ޑެޕިއުޓީ މެނޭޖިން ޑައިރެކްޓަރު ޝާޔަން ޝާހިދު ސަސްޕެންޑް ކުރީ ޕީއެސްއެމްގެ އިސް ދެ މަގާމަކަށް ބަދަލު ގެންނަވަން އުޅުއްވުމުން ކަމަށް "މިހާރު" އަށް އެނގިއްޖެ އެވެ.

މި މަހުގެ ހަތް ވަނަ ދުވަހު ޝާޔަން ސަސްޕެންޑްކޮށް، ޕީއެސްއެމްގެ ހުރިހާ ސޯޝަލް މީޑިއާ ގުރޫޕުތަކުން ވެސް އޭނާ ވަނީ ބޭރުކޮށްފަ އެވެ. އަދި ޝާޔަންގެ ކެބިން ވެސް ވަނީ ތަޅުލައިފަ އެވެ.

އެނގިފައިވާ ގޮތުގައި ޕީއެސްއެމްގެ ޗެނަލްތަކުން ޕީޕީއެމް އެކަނި ޕްރޮމޯޓްކޮށް ކަވަރޭޖް ދޭތީ ޕީއެސްއެމްގެ ބޯޑުގެ ތެރޭގައި ވަނީ ދެބަސްވުންތަކެއް އުފެދިފަ އެވެ.

މިހާރު އަށް އެނގިފައިވާ ގޮތުގައި ޕީއެސްއެމްގެ މެނޭޖިން ޑައިރެކްޓަރު އިބްރާހިމް ހަލީލާއި ޑެޕިއުޓީ މެނޭޖިން ޑިރެކްޓަރު އިކްރާމް އަބްދުއްލަތީފް އެ މަގާމުތަކުން ބަދަލު ކުރައްވަން ޝާޔަން އިސްވެ ހުންނަވައިގެން ވަނީ މަސައްކަތް ކުރައްވައިފަ އެވެ.

ޕީއެސްއެމްގެ ބޯޑުގައި ހަތް މެމްބަރުން ތިއްބަވާއިރު، ހަލީލާއި އިކުރާމް މަގާމުން ބަދަލުކުރަން ބޯޑުގެ ގިނަ މެމްބަރުން އެކަމަށް އެއްބަސްވެ ވަޑައިގަތް ކަމަށް ވެސް ވެ އެވެ. މިކަން ހިނގި ކަމަށް ވަނީ ފެބްރުއަރީ 1 ގައި ސުޕްރީމް ކޯޓުގެ އަމުރު ނެރުމުގެ ފަހުންނެވެ.

ޕީއެސްއެމްގެ ޑެޕިއުޓީ މެނޭޖިން ޑައިރެކްޓަރު ޝާޔަން ޝާހިދު: ޝާޔަން ސަސްޕެންޑްކުރީ ހަލީލާއި އިކްރާމު މަގާމުން ވަކިކުރައްވަން އުޅުއްވުމުން -- ފޮޓޯ: ފޭސްބުކް

"ސުޕްރީމް ކޯޓުގެ އަމުރު ތަންފީޒު ނުކޮށް ކަންކަން ބަދަލުވީމަ މެމްބަރުންގެ އެކަން މަޑުޖައްސާލީ. އެކަން ކުރަން އުޅުނުކަން އިކުރާމާއި ހަލީލަށް އެނގުމުން ޝާޔަންއާ މެދު ފިޔަވަޅު އެޅީ،" މިހާރާ ވާހަކަ ދެއްކެވި ބޭފުޅާ ވިދާޅުވި އެވެ.

ޕީީއެސްއެމްގެ ގާނޫނު ބުނާ ގޮތުން ބޯޑުގެ މެމްބަރަކު މެމްބަރުކަމުން ވަކިކުރެވޭނީ ރައްޔިތުންގެ މަޖިލިހުންނެވެ. އެކަމަކު ބޯޑު މެމްބަރުންގެ ތެރެއިން ނަގާ މެނޭޖިން ޑިރެކްޓަރާއި ދެ ޑިޕިިއުޓީ މެނޭޖިން ޑިރެކްޓަރުން، ބޯޑުގެ ހަތް މެމްބަރުންގެ އަގުލަބިއްޔަތުން ވަކިކުރެވޭނެ އެވެ.

އެކަމާ ގުޅޭގޮތުން ޝާޔަން ވިދާޅުވީ އެފަދަ މައުލޫމާތެއް ލިބިވަޑައިގެންފައި ނުވާ ކަމަށެވެ. އިތުރު ސުވާލުތަކަށް ޖަވާބެއް ނުދެއްވި އެވެ.

ޕަބްލިކް ސާވިސް މީޑިއާގެ ގާނޫނު ބުނާގޮތުން ދައުލަތުން ހަރަދުކުރާ އެ މީޑިއާ ހިންގަން ވާނީ ނުފޫޒުން އެއްކިބާ ވެއޮވެ، ހަމަހަމަ ކަންމަތީ ކަމަށެވެ. އެކަމަކު ޕީއެސްއެމްގެ ޗެނަލްތަކުން އިދިކޮޅު އެއްވެސް ހަރަކާތެއް ނުދައްކަ އެވެ.

ޕީއެސްއެމްގެ އިސް މުވައްޒަފަކު ވިދާޅުވީ އެ ޗެނަލް ހިންގަމުން ދަނީ ޕީޕީއެމް ބޭނުންވާ ގޮތަށް ކަމަށެވެ. ޕީޕީއެމްގެ ހުރިހާ އިވެންޓެއް ލައިވް ކުރާއިރު ޕީޕީއެމުން އަންގާގޮތަކަށް ރިޕޯޓްތައް ހަދައި ބްރޯޑްކާސްޓް ކުރަމުންދާ ކަމަށް ވެސް އޭނާ ވިދާޅުވި އެވެ.

އެކަންކަމާ ގުޅޭގޮތުން ޕީއެސްއެމްގެ ކޮމެންޓެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.