ކޯޓަށް ވަޑައިގަތުމަށް މައުމޫން މިއަދު މާލޭގައި: ޝަރީއަތް ނިމެންދެން އެމަނިކުފާނު ބަންދުގައި ބަހައްޓަން ވަނީ އަމުރުކޮށްފައި. --ފޮޓޯ: ހުސެއިން ވަހީދު/މިހާރު
25 މާޗް 2018 - 15:38
9 comments
ޓެރަރިޒަމްގެ ތުހުމަތުގައި ހައްޔަރުކުރި ކުރީގެ ރައީސް މައުމޫން އަބްދުލްގައްޔޫމާއި ދެ ފަނޑިޔާރުންނާއި ސިޔާސީ ގިނަ ބޭފުޅުންތަކެއް މާފުށީ ޖަލަށް ބަދަލުކޮށްފި އެވެ.
މައުމޫންގެ އިތުރުން، އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާއި ކުރީގެ ޕޮލިސް ކޮމިޝަނަރު އަހުމަދު އަރީފާއި މައުމޫންގެ ދަރިކަލުން، ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ދަނގެތި ދާއިރާގެ މެމްބަރު އިލްހާމް އަހުމަދާއި ޔުމްނާ މައުމޫންގެ ފިރިކަލުން މުހައްމަދު ނަދީމް މާފުށީ ޖަލަށް ބަދަލު ކުރި ކަން ވަނީ ކަށަވަރުވެފަ އެވެ.
މި ހުރިހާ ބޭފުޅުންގެ މައްޗަށް ވެސް ޕީޖީން ކުރަނީ ޓެރަރިޒަމްގެ ދައުވާ އެވެ.
ބަންދުގެ މުއްދަތު ޖެހުމަށް ކްރިމިނަލް ކޯޓަށް ވަޑައިގަތުމަށްޓަކައި ފާރިސް (ކުރީގައި) އާއި ސިޔާދު (ފަހަތުގައި) ޕޮލިސް ލޯންޗުން ފައިބައިވަޑައިގަންނަވަނީ.---ފޮޓޯ: މިހާރު
އެކަމަކު މިކަމާ ގުޅިގެން މޯލްޑިވްސް ކަރެކްޝަނަލް ސާވިސްގެ ބަހެއް ވަނީ ލިބޭ ގޮތް ނުވެފަ އެވެ.
މީގެއިތުރުން ޓެރަރިޒަމްގެ އުފުލާފައިވާ ކުރީގެ ޕޮލިސް ކޮމިޝަނަރު އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒް ވެސް މީގެކުރިން ވަނީ މާފުށީ ޖަލަށް ބަދަލުކޮށްފަ އެވެ. ޓެރަރިޒަމްގެ ދައުވާ އުފުލާފައިވާ ބޭފުޅުންގެ ތެރެއިން އެނގިފައިވާ ގޮތުގައި މާފުށީ ޖަލަށް ބަދަލު ނުކުރަނީ މައްޗަންގޯޅީ ދެކުނު ދާއިރާގެ މެމްބަރު އަބްދުﷲ ސިނާން އެކަންޏެވެ. ސިނާން މި ވަގުތު ހުންނެވީ ދޫނިދޫ ޖަލުގައި ކަމަށްވެ އެވެ.
ރިޝްވަތު ދިނުމުގެ ތުހުމަތުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ދަރިކަލުން ސިޔާދު ގާސިމް ހައްޔަރުކޮށްފައި ވާއިރު، އޭނާ ވެސް ވަނީ މާފުށީ ޖަލަށް ބަދަލުކޮށްފަ އެވެ.
އުއްތަމަ ފަނޑިޔާރު އަބްދުﷲ ސައީދު ފުލުހުންގެ ލޯންޗެއްގައި ދޫނިދޫއަށް ގެންދަނީ. --ފޮޓޯ: މިހާރު
ރިޝްވަތު ހިފުމުގެ ދައުވާ އާއި ގާނޫނު ހިންގުމަށް ހުރަސްއެޅުމުގެ ތުހުމަތުގައި ހައްޔަރުކުރި ޗީފް ޖުޑީޝަލް އެޑްމިނިސްޓްރޭޓަރު ހަސަން ސައީދު އަދި ހުންނެވީ ދޫނިދޫގަ އެވެ.
ސަރުކާރު ވައްޓާލަން އުޅުމުގެ ތުހުމަތުގައި ހައްޔަރުކުރުމަށް ފަހު، ރާއްޖޭގެ ސިޔާސީ އަދި ޝަރުއީ ދާއިރާގެ އިސް ބައެއް ބޭފުޅުންގެ މައްޗަށް ޓެރަރިޒަމްގެ ދައުވާކުރަން މިހާރު ވަނީ ކޯޓަށް ފޮނުވައިފަ އެވެ. އަދި އެ ބޭފުޅުން ޝަރީއަތް ނިމެންދެން ބަންދު ކުރަން ކްރިމިނަލް ކޯޓުން ވަނީ އަމުރުކޮށްފަ އެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން ކުރިން ބުނި ގޮތުގައި އިދިކޮޅު ސިޔާސީ ލީޑަރުން ހިމެނޭ ގޮތަށް ނުވަ ގައިދީއަކު ދޫކޮށްލުމަށް ސުޕްރީމް ކޯޓުން މިދިޔަ މަހުގެ 1 ގައި ނެރުނު އަމުރަކީ ސަރުކާރު ވައްޓާލުމުގެ ބޭނުމުގައި ދުރާލައި ރާވައިގެން ނެރުނު އަމުރެއްކަން ސާފުވެ އެވެ.
ބައެއް ބޭފުޅުންގެ މައްޗަށް ޓެރަރިޒަމްގެ ދައުވާ ކުރާއިރު، ޓެރަރިޒަމްގެ ކުށެއް ސާބިތުވެއްޖެ ނަމަ އެންމެ ކުޑަވެގެން ވެސް 10 އަހަރުގެ ޖަލު ހުކުމެއް އަންނާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހިމާޔަތް!~
26 March 2018
بِسْمِ اللَّهِ الرَّحْمَنِ الرَّحِيم ، އަޅުގަނޑު މިކަމުގަ ބުނާނީ ފުރަތަމަވެސް 30 އަހަރުގެ ވެރިޔާ ތައުބާވާން ވީއޭ ވާންޖެހޭގޮތައް މިހެންބުނީމަ މިކިޔާ ހުރިހާ އިންސާނުންނައް ވެސް ހަޖަމުވާނެ ކަމައް ! ދެންބަލާތި ކުރިއައް އޮތްތަނުގަ އެކަނިވީ މީހަމަ %100 ޔަގީން ކަމެކޭ ބުނިކަމުގަ ވިޔަސް ދޮގަކައް ނުވާނެ މިހެަމިވަނީ ކަމެއް ނުވެއެއްނޫން އިގިދާނެތާ ބަލަާތި ! ﷲއިރާދަފުޅުކުެރެއްވިއްޔާ ދެރަގޮތެއް ވުމަކައް ނޭދެން ، ، إن شاء الله ،،.
ތުނިޔަ
26 March 2018
ހުރިހާ ޓެރަރިސްޓުން އެއްތާކަށް ލިޔަސް ސަރުކާރަށް ދެނެއް ހަމަ ނޭވާއެއް ނުލެވޭނެ އިންޝާﷲ
ދަތްނެތްކުއްޖާ
25 March 2018
މަމެން ދެކޭ ގޮތުގައި މިއީ ސިޔާސީ ކަންތައް ގަޑެކެވެ. މިގޮތުގައި މި ވެރިން ރިޔާސީ އިންތިޙާބު ނިމެންދެން ޝަރިއަޔަތް ތައް ކުރިއަށް ގެންދާނެއެވެ. އޭގެ ފަހުން މި ރައީސް 2018 ގައި ހޮވިއްޖެ ނަމަ މި ހުރިހާ ސިޔާސީ ވެރިން އެވެރިން ކުރި ކުއްތަކަކީ ދަޢުލަތައް ސާބިތު ނުކޮއްދެވޭ ކުއްތަކެއްގެ ގޮތުގައި ހަދާ މި ހުރިހާ ވެރިންވެސް ދޫކުރާނެ ކަމާއި މެދަކު މަމެން އެއްވެސް ޝައްކެތް ނުކުރަމެވެ.
ފޮނިޓައްޕު ހަސަނު
25 March 2018
ވަރަށް ދެރަވޭ މައުމޫނު ފަދަ އުމުރުން ދޮށީ އަދި މިގައުމުގައި ރައީސްކަން ދިގުމުއްދަކަށް ކުރެއްވި ބޭފުޅަކަށް ތިގޮތަށް ޖަލުގެ އަހުވަ ދައްކަމުންދާތީ. ތިކަމަކީ އަޅުގަނޑު ހުވަފެނަކުންވެސް ފެނިދާނެކަމެއްކަމކަށް ގަބޫލެއް ނުކުރަން. ނަމަވެސް މައުމޫނުގެ ވެރިކަމުގަ އިންސާފުން ބޭރުން ކިތައް މީހުންނަށް ނުހައްގު އަދަބު ލިބިގެން ދިޔަކަން ކިތައްމީހުން މިއަދު ހަނދާން ކުރާނެ ބާ؟
އަޙްމަދް.
25 March 2018
ރަނަގަޅު: ނުރައްކާތެރި ޒަޢީމު ހިއްވަރު ދައްކަން ޖަލުގައި ބަހައްޓާލާ! ހެހޭ
ބެމްބޫ
25 March 2018
އިރާދަ ކުރެއަވިއްޔާ ހުކުމެއް ނީއްވޭނެ. ރާއްޖެ މިހިސާބަށް ގެނެސްދިން މާލިމީ ޓެރަރިސްޓަކަށް ހަދަން އުޅުނަސް އެކަމެއް ހަމަ ހިލާ ނުވާނެ.
ރަދީފް
25 March 2018
މިއަދު ވެރިކަމުގަ ތިބި ފަރާތްތައް ހަމަ ތި ޖަލުތަކުގަ އަދި ތިބޭނެ.އިންޝާﷲ
ވާނުވާ ބަނދި
25 March 2018
ބޭރު ބަޔަކު ރާއްޖެ އަށް އަންނަން އުޅޭނަމަ "ބުޅާތަށް ހަތް ހާލި އަށް" ލާނެއެވެ..އަނބަދު މި ޖެހެނީ ކޮންމެވެސް ޖަރީމާއެއް ފޮރުވަން އުޅޭށެވެ
ސިއާ
25 March 2018
އަނިޔާވެރިކަން ހައްދުފަހަނައަޅާފައި ﷲ އިރާދަކުރެއްވިއްޔާ މިއަނިޔާ ވެރިކަން ދާދިއަވަހަށް ނިމި, ކުށެއްނެތް ރައްޔިތުން މިނިވަންވާނެ, އަނިޔާވެރިން ހިތިގޮތަކަށް ނިމިގެންދާނެ! ﷲ ނަޞްރުދެއްވާނީ ހައްގަށް, އެކަން ވަރަށް އަވަހަށް ފެންނާނެ! އަނިޔާ ލިބެމުންދާ އަޅުންގެ ދުޢާ ހުރަހެއްނެތި އިޖާބަވާނެ, ވަގުތު ވަނީ ކުޑަތަންވެފައި, ތިމާމެންގެ އެއްވެސް ބާރެއްނެތް, މިރޭ ނިދާފައި ހޭލެވޭނެ ކަމުގެ އެއްވެސް ޔަގީން ކަމެއް އެއްވެސް ފަރާތަކަށް ނެތްއިރު, ރައްޔިތުންނަށް އަނިޔާދިނުމަކީ ކޮންފަދަ ނުބައިކަމެއްބާ?