މަޝްހޫރު "ބާގަ ކިންގް" އާއި "ކޮފީ ކްލަބް" މާލޭގައި ހުޅުވައި، މިއަދު ހިދުމަތް ދޭން ފަށައިފި އެވެ.
ވެލާނާ އިންޓަނޭޝަނަލް އެއާޕޯޓުގައި ވެސް އެ ދެ ތަން ހިންގާ ތައިލެންޑްގެ މައިނާ އިންޓަނޭޝަނަލްގެ ސަބްސިޑިއަރީއެއް ކަމަށްވާ މައިނާ ފުޑްސް އިން މާލޭގައި ފުރަތަމަ ފަހަރަށް ބާގަ ކިންގާއި ކޮފީ ކްލަބް ހުޅުވީ ހުޅުމާލޭ ފެރީ ޓާމިނަލް މަތީގަ އެވެ. ކުރިން އޯޝަން ބްރީޒް ރެސްޓޯރަންޓް ހިންގި ތަނުގައި މި ދެ ތަން ހިންގުމަށް، ބޭރަށް ބައެއް ވަނީ އިތުރުކޮށްފަ އެވެ.
"މިހާރު" އަށް އެނގިފައިވާ ގޮތުގައި 70 މީހުންގެ ޖާގައިގެ ބާގާ ކިންގާއި 66 މީހުންގެ ޖާގައިގެ ކޮފީ ކްލަބް މިއަދު ވަގުތީ ގޮތުން ހުޅުވި ނަމަވެސް، ރަސްމީކޮށް ހުޅުވަން ފަހުން ހަފުލާއެއް ބާއްވަން ވަނީ ހަމަޖައްސައިފަ އެވެ. އެހެންވެ އެތަނާ ބެހޭ އެއްވެސް މައުލޫމާތެއް މިވަގުތު ދޭން މައިނާ އިން ބޭނުމެެއްނުވި އެވެ.
މާލޭގައި ހުޅުވި ބާގަ ކިންގަށް ދިޔަ މީހަކު ބުނީ އެތަނުން ވިއްކާ ބާގަތަކުގެ އެއާޕޯޓުގައި ވިއްކާ އަގަށްވުރެ ހެޔޮ ކަމަށެވެ.
މައިނާ ފުޑްސް އިން ވަނީ އަރަބިއްޔާ ކުރިން ހިންގި މާލޭ ގްރޭންޑްގައި ޕިއްޒާ ވިއްކަން "ޕިއްޒާ ކޮމްޕެނީ"ގެ އައުޓްލެޓެއް ވެސް ހުޅުވައިފަ އެވެ.
އެއާޕޯޓުގެ ޑިޕާޗާ ހޯލުގެ ބޭރުގަ އާއި އެތެރޭގައި ހަދާފައިވާ ފުޑް ކޯޓުގައި މައިނާ ފުޑްސް އިން ބާގަ ކިންގާއި ކޮފީ ކްލަބާއި ތައި އެކްސްޕްރެސްގެ އައުޓްލެޓްތައް ހުޅުވީ ޖުލައި 2013ގަ އެވެ. އަދި އޭގެ ފަހުން އެ ކުންފުނިން ވަނީ އެތަނުގައި ޕިއްޒާ ކޮމްޕެނީގެ އައުޓްލެޓެއް ވެސް ހުޅުވައިފަ އެވެ.
މިދިޔަ ހަފުތާގައި މާލޭގައި ވަނީ ޕިއްޒާ ހަޓް ވެސް އަލަށް ހުޅުވައިފަ އެވެ. އަދި މިރޭ ގްލޯރިއާ ޖީންސް ކޮފީއާ އެކު ރަސްފަންނުގެ ޕެވިލިއަން ހުޅުވަން ވަނީ ހަމަޖެހިފަ އެވެ.
