ލޯކަލް މާރުކޭޓުގައި ވިއްކަން ބަހައްޓާފައި ހުރި ކަރާތަކެއް: ކަރާގެ އަގު އަންނަނީ ވަރަށް ބާރަށް އުފުލެމުން. ފޮޓޯ: ނިޝާން އަލީ /މިހާރު
18 މެއި 2018 - 20:37
11 comments
ކަރާ ހެއްދުމަށް މަޝްހޫރު އއ. ތޮއްޑޫން ކަރާ ގެންނަ އަދަދު މަދުވުމުން، މާލޭގެ ބާޒާރުގައި ކަރާ ކިލޯއެއްގެ އަގު 40ރ. އަށް އުފުލިއްޖެ އެވެ.
ލޯކަލް މާރުކޭޓުގެ ގޮޅިއެއް ހިންގާ މީހަކު މިއަދު ބުނީ މިއަދުން ފެށިގެން ކަރާ ކިލޯއެއްގެ އަގު 40ރ. އަށް އުފުލިފައިވާ ކަމަށެވެ. މާލޭގެ ބާޒާރުގައި ކަރާ ކިލޯއެއްގެ އަގު 35ރ. އިން 40ރ. އަށް އުފުލުނުއިރު ހުޅުމާލޭގައި ހުންނަ މާރުކޭޓުގައި މިހާރު ކަރާ ކިލޯއެއްގެ އަގު ވަނީ 45ރ. އަށް ބޮޑުވެފަ އެވެ. އަދި މާލެއިން އެހެން ރަށްރަށަށް ގެންދާ ކަރާގެ އަގު ވަނީ 50ރ. އަށް އުފުލިފަ އެވެ.
"ތޮއްޑޫން ކަރާ މިފަހަރު ގެންނަ އަދަދު މަދުވީމަ އެހާ ބޮޑަށް އަގު އުފުލެނީ. ރޯދަ މަސް ފެށުނު ފަހުން ވެސް ވަރަށް މަދުމަދުން ކަރާ ގެންނަނީ،" އޭނާ ބުންޏެވެ.
އޭނާ ބުނީ ތޮއްޑޫގެ އިތުރުން އެހެން ރަށްރަށުން ވެސް ކަރާ ގެންނަ އަދަދު މިފަހަރު ވަރަށް ބޮޑަށް މަދުވެފައިވާ ކަމަށެވެ. އަދި ރާއްޖެއިން ބޭރުން ވެސް ގެންނަ އަދަދު މަދުވުމުން ކަރާގެ އަގު ބޮޑުވާން ޖެހުނު ސަބަބެއް ކަމަށް ވިޔަފާރިވެރިން ބުންޏެވެ.
މުލަ ރޯދަ ދުވަހު ލޯކަލް މާރުކޭޓުގައި ވިއްކަން ބަހައްޓާފައި ހުރި މޭވާތަކެއް މީހަކު ބަލަނީ: ގިނަ ބާވަތްތަކުގެ އަގު މިހާރު ވަނީ ކޮންޓްރޯލްވެފައި.---ފޮޓޯ: ނިޝާން އަލީ/މިހާރު
"ތޮއްޑޫގައި ކަރާ އެބަހުރި ކަމަށް އަޅުގަނޑުމެންނަށް މައުލޫމާތު ލިބޭ. އެކަމަކު ނުގެންނަނީ ކީއްވެގެން ކަމެއް ނޭނގެ. މިތަނަށް ގެންނައިރަށް އޮންނަނީ ވިކި ހުސްވެފައި،" އެ މީހާ ބުންޏެވެ.
ރޯދައާ ދިމާކޮށް އަގު އުފުލުނު އެހެން ބާވަތްތަކުގެ އަގުތައް މިހާރު ވަނީ ހިފެހެއްޓިފަ އެވެ. ކަރާގެ އަގު އުފުލެމުންދިޔަ ނަމަވެސް ކުރުނބާ، ގަބުޅި، ދޮންކެޔޮ، މިރުސް ފަދަ ބާވަތްތަކުގެ އަގުތައް ހުރީ ކޮންޓްރޯލްވެފަ އެވެ.
"ކަރާ ފިޔަވައި އެހެން ބާވަތްތައް ބާޒާރުގައި އެކަށީގެންވާ މިންވަރަށް މިވަގުތު ލިބެން އެބަހުރި. ނަމަވެސް އަންނަ ހަފުތާގައި މޫސުމް ގޯސްވެއްޖެ ނަމަ އަގު އުފުލުން އެކަށީގެންވޭ،" މާރުކޭޓުގެ ގޮޅިއެއްގައި ހުރި މީހަކު ބުންޏެވެ.
ބާޒާރުގައި ދޮންކެޔޮ ވަކެއްގެ އަގު މިހާރު ވަނީ ފަސް ރުފިޔާއަށް ދަށްވެފަ އެވެ. ހެޔޮވަރު ސައިޒުގެ ދޮންކެޔޮގަނޑެއް މިހާރު ލިބެނީ 200ރ. އާއި 500ރ. އާ ދެމެދުގެ އަގެއްގަ އެވެ. އަދި ބާޒާރުގައި މިހާރު އެވްރެޖްކޮށް މިރުހުގެ އަގު އުޅެނީ ކިލޯއެއް 150 އާއި 450ރ. އަށެވެ. އަދި ފުވައްމުލަކު އަނބެއްގެ އަގު އުޅެނީ 20ރ. އަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ކަރާބެ
22 May 2018
ފަގީރު ދަނޑުވެރިމީހާ މީހާ އަހަރަކު އެއްފަހަރު އެއްޗެއް އަގުބޮޑު ކޮއްލާ އިރައް މިއޮއް ވާގޮތެއް. މާލޭ މީހާ ކުލި ކިތަންމެ އަގުބޮޑުކުރިއަސް ހަމަ އޯކޭ؟
ޙުސީ
20 May 2018
މަށަށް މި ނޭނގިގެން އުޅޭ ކަމަކީ ކަރަޔާއި އަނބުފަދަ ތަކެތި މަދުވާއިރަށް އެތަކެތީގެ އަގު ބޮޑުވާންވީ ސަބަބެއް. މިތަކެއްޗަކީ ހުރިހާ އެންމެން ބޭނުންކުރާ ތަކެއްޗެއްވެސް ނޫން. މަށަށްހީވާ ގޮތުގައި ތަކެތި މަދުވެއްޖިއްޔާ ކުރަންޖެހޭ ކަމަކީ ކޮންމެ މީހަކަށް ވިއްކާ މިންވަރު ކޮންޓްރޯލްކުރުން. އެއީ ވީހަވެސް ގިނަބަޔަކަށް އެވިއްކުމަށްޓަކައި. އެކަމަކު މާރުކޭޓުގޮޅީގައި އިންނަ މީހާ މިހަދާގޮތަކީ ހެސްކިޔާފައި އަގުބޮޑުކުރަނީ. ދެވަނަކަމަކު ނޫން. ނާޖާއިޒުފައިދާ ނަގަން.
ފުވައްމުލައް
19 May 2018
މަގޭ ހިތަށް އަރާ ފުވައްމުލަކު އަނބާއި އެހެން އަތޮޅު ތަކުގެ އަނބުގެ ތަފާތަކީ ކޮބައި ބާވައޭ... އަހަންނަށް ހީވާގޮތުގަ އެއީ ހަމަ ބޯދާ ވިސްނުން... ނަން އެގޮތަށް މަސްހޫރުވެފަ އޮންނަނީ.. ދިއްގަރު ރިހާކުރު ، ތޮއްޑޫ ކަރާ ، ފުވަައްމުލަށް އަނބު ... ގައިމު ދިއްގަރު ރިހާކުރަށްވުރެ މީރުކޮށް އެހެން ރައްރަށުގަވެސް ރިހާކުރު ހަދާ .. ރަހަ ބަލާފަ މި ބުނީ .. މި އުޅޭ ދިވެހިންގެ އާދަ 7 ފެނުގަ ކެއްކިޔަސް ކަނޑުވައެއް ނުލެވޭނެ ..
ފުވައްމުލަކު މީހާ.
19 May 2018
ނޫން ތަފާތެއްހުރޭ. އެކަން އެންމެ ބޮޑަށް އެގޭނީ ފުވައްމުލަކަށް އައިސް ތާޒާ އަނބެއްގެ ރަހަބަލާލީމާ.
ރަދީފް
19 May 2018
ކޮންމެ ރަށެއްގަ އޮންނަ ދަނޑުތަކުގެ ކޮންޓްރޯލް އޮންނަނީ ބަންގްލަދޭޝް ރައްޔަތުން އަތުގަ.މާލޭގެ މާރުކޭޓްތަކުގެ ކޮންޓްރޯލް ވެސް އެމީހުން އަތުގަ އޮންނައިރު ޕްރޮޑަކްޝަން ޕޮއިންޓުން ލޮޖިސްޓިކް ޕްރޮސެސްއަށް ދާއިރު އޮންނަނީ އެތިކޮޅު ވިކިވަ.ދެން ގޮޅި ތަކުގަ އެމީހުން ބޭނުން އަގެއް ޖަހައިގެން ތިބެ އެކިފަހަރު އެކި އަގުތަކުގަ ވިއްކާނީ.އަގުޖަހާފަ ހުންނަން ޖެހޭނީ ހުރިހާއެއްޗެއްގަ ، މިހެން ނުވުމުގެ ސަބަބުން ހިތަށް އެރިއަގެއްގަ ވިއްކުމުގެ ފުރުސަތު އެމާކެޓް ކޮންޓްރޯލްކުރާ މީހުންނަށް އެއޮންނަނީ ލިބިފަ.ކުއްވެރިންނަކީ އަހަރުމެން ދިވެހިން.ވަރަށް ދިގުކޮށް ލިޔަންޖެހޭތީވެ ކުރުކޮއްލަން.ވ.ވެދުން. -™ރަދީފް®-
ތުނިޔަ
19 May 2018
އެއްޗިހި މަދުވީމަ އަގުބޮޑު ކުރުމަކީ އޭގެ ސަބަބުން މަދުވި އެއްޗިހި އިތުރުވާ ކަމެއްތޯ؟
ބަނޑިޔާ
19 May 2018
ތޮއްޑޫ އިން ކަރާ ނުގެންނަ ސަބަބު އިގޭ !!ކަރާގަތުން މެދުކަނޑާލަންވީ އެއިރުން ކަރާހެއްދި މީހުންނަޢް އިގޭނީ ކޮންބައެއްކަން ކުރިހޯދީ ..
އަލިފުއަލިފު2017
19 May 2018
ތިވަރުން ކަރާ ނުގަތީމަ ވީއެއްނު. ގައިމު ނުވިކެންޏާ އަގުތިރިވާނެ
އަބްދުﷲ
18 May 2018
ކަރާގެ އަގު ތިރިވުމުންނޫނީ އަޅުގަނޑު ކަރާ ނުގަންނާނަމެވެ.
ރަބަރޭ
18 May 2018
މަ މިހުރީ ރޯދަ އަށް.. ...
ގުންގުނާ
18 May 2018
އެއްޗިހިމަދޭ ކިޔާފަ އަގުބޮޑުކޮށް ނުވިއްކޭނެ