ބްރިޖް ހުރަސްކޮށް ކުރި ދަތުރު: "މިއީ މުޅިން ތަފާތު އިހުސާސެއް"

"މިހާރު އިހުސާސެއް ނުވޭ މިތިބެނީ ރާއްޖޭގައި ކަމެއް. މިއީ މުޅިން ތަފާތު އިހުސާސްތަކެއް،" މާލޭ/ހުޅުލޭ ބްރިޖް މަތިން ދަތުރުކުރަމުން ދިޔަ އެމްޕީއެލްގެ ބަހުގައި އިންނެވި އެ ކުންފުނީގެ އިސް ވެރިޔަކު ވިދާޅުވި އެވެ.

ރައީސް އަބްދުﷲ ޔާމީންގެ ވެރިކަމުގެ އެންމެ ބޮޑު އެއް މަޝްރޫއު ކަމަށްވާ މާލޭ/ހުޅުލޭ ބްރިޖުގައި ފުރަތަމަ ފަހަރަށް ދަތުރުކުރާ ކޮންމެ މީހަކަށް ވެސް އެ އިހުސާސްތައް ކުރެވޭނެ އެވެ. ދެ ރަށުގެ ދެމެދުގައި އޮތް ކަނޑޮއޮޅީގައި ޖަހާފައިވާ ބިޔަ ތަނބުތަކުގެ މަތީގައި، ގާތްގަނޑަކަށް 210 މިލިއަން ޑޮލަރު ހޭދަކޮށްގެން ޗައިިނާ އިން ހެދި ބްރިޖްގައި ދަތުރުކުރުމަކީ، މީގެ ކުރިން ދިވެހިން ކުރި ތަޖުރިބާއެއް ނޫނެވެ.

ބްރިޖް ހުރަސްކޮށް، މާލެ އާއި ހުޅުލޭ އަދި ހުޅުމާލެ އަށް ބަހުގެ ހިދުމަތް ދިނުމާ ހަވާލުވި އެމްޕީއެލްގެ ބަސްތަކުގެ ޓެސްޓް ދަތުރުގައި ބައިވެރިވެވަޑައިގެންނެވި އެ ކުންފުނީގެ އޮފިޝަލް ވިދާޅުވީ ބްރިޖް މަތިން ދާއިރު ފެންނަ މަންޒަރުތަކުން ކޮންމެ މީހަކު ވެސް ހިތްހަމަޖެހޭނެ ކަމަށެވެ.

އޭނާގެ އެ ވާހަކައަށް އެމްޕީއެލްގެ އެހެން މުވައްޒަފަކު ވެސް ތާއީދުކުރި އެވެ.

"މިއީ ބްރިޖަށް އަރާ ކޮންމެ މީހަކު ވެސް ބަލަން ބޭނުންވާނެ މަންޒަރުތަކެއް. މާލޭގެ ބޭރުން ފެންނަ މަންޒަރުތައް ރޭގަނޑު ވަރަށް ހިތްގައިމު. އަދި ހެނދު އިރުއަރައިގެން އަންނަ ވަގުތު ވެސް ވަރަށް ހިތްގައިމުވާނެ،" އެމްޕީއެލްގެ އެ މުވައްޒަފު ބުންޏެވެ.

އެމްޕީއެލުން ވަނީ ދަތުރުތަކަށް ތައްޔާރުވެފަ އެވެ. އެގޮތުން އެކަމަށް ނުވަ ބަސް ގެނެފައިވެ އެވެ. ބައެއް ބަސްތަކުގައި ރޭ ވަނީ އެމްޕީއެލްގެ ބައެއް މުވައްޒަފުންނާ އެކު "މިހާރު"ގެ ނޫސްވެރިޔަކު ވެސް ބައިވެރިކޮށްފަ އެވެ.

.

ގާތްގަނޑަކަށް ގަޑިއަކު 10 ކިލޯމީޓަރުގެ ބާރު މިނުގައި ދުއްވައިގެން ބްރިޖް ހުރަސް ކުރެވުނީ ގާތްގަނޑަކަށް ފަސް މިނިޓުންނެވެ. އަދި ހުޅުލެއިން ހުޅުމާލެއަށް ހަދާފައިވާ އާ ލިންކް ރޯޑުގައި ގަޑިއަކު 60 ކިލޯމީޓަރުގެ ބާރު މިނުގައި ދުއްވާފަައި ގޮތަސް ހުޅުމާލެ ފެށޭ ކޮޅުގައި ހަދާފައިވާ ޓާމިނަލަށް ފޯރީ 10 ވަރަކަށް މިނިޓުންނެވެ.

ބްރިޖްގެ ދަތުރުތަކަށް އެމްޕީއެލް ތައްޔާރު

"ސިނަމާލެ ބްރިޖް"ގެ ނަމުގައި މިރޭ ބްރިޖް ހުޅުވާއިރު ދަތުރުފަތުރަށް ނަގާނެ އަގުތައް އަދި އިއުލާނެއް ނުކުރެ އެވެ.

އެމްޕީއެލްގެ އިސް އޮފިޝަލަކު ވިދާޅުވީ ބްރިޖް އާއްމުންނަށް ހުޅުވާލާ ދުވަހުން ފެށިގެން ދަތުރުތައް ވެސް ފަށާނެ ކަމަށެވެ. އެކަމަކު ބަހުގެ އަގުތައް މުޅިން އަދި ފައިނަލް ނުވާ ކަމަށް ވިދާޅުވި އެވެ.

ބަސް ދަތުރުގެ ހިދުމަތަށް ފައިސާ ދައްކަން އެމްޕީއެލް އިން ބޭނުންކުރަން ނިންމާފައި ވަނީ މުޅިން އާ ނިޒާމެކެވެ. "ޓަޗް ލިންކް"ގެ ނަމުގައި ތައާރަފްކުރާ ނިޒާމުގައި ބޭނުންކުރަނީ އިލެކްޓްރޯނިކް ކާޑެވެ. މި ކާޑް ޓޮޕަޕްކޮށްގެން ގިނަ ދުވަހަށް ބޭނުންކުރެވޭނެ ކަމަށް އެމްޕީއެލްގެ އޮފިޝަލް ވިދާޅުވި އެވެ.

"މި ހިދުމަތުގައި ކާޑު ބޭނުންކުރަން ނިންމާފައި ވަނީ ހަމައެކަނި ބަހަށް އަރާއިރު. އަގު ނަގާނީ މާލެ އާއި ހުޅުމާލެއާ ދެމެދު ކުރާ ދަތުރުތަކަށް ވަކި އަގެއް. ހުޅުލެއަށް ކުރާ ދަތުރުތަކަށް ވަކި އަގެއް،" އޭނާ ވިދާޅުވި އެވެ.

ބްރިޖްގެ ދަތުރުތަކުގައި ބޭނުންކުރާ ބަސްތަކުގައަި ސެކިއުރިޓީ ކެމެރާ ވެސް ވަނީ ހަރުކޮށްފަ އެވެ. އަދި ނުކުޅެދޭ މީހުން ބޭނުންކުރާ ފުރޮޅުލީ ގޮނޑިއާ އެކު ވެސް ބަހަށް އެރޭނެ އެވެ. ފުރޮޅުލީ ގޮނޑީގައި އުޅޭ މީހުން ބަހަށް އަރަން ބަސް އަރިކޮށްލެވެ އެވެ. އަދި އެތެރޭގައި އަންހެނުންނަށް ހާއްސަ ސީޓްތަކެއް ވެސް ހުރެ އެވެ.

އެމްޕީއެލް އިން ބަހުގެ ހިދުމަތް ފަށާއިރު ބަސް ދަތުރާ ބެހޭ ހުރިހާ މައުލޫމާތެއް ލިބޭ ގޮތަށް ހާއްސަ ފޯނު އެޕްލިކޭޝަނެއް ވެސް ވަނީީ ތައްޔާރުކޮށްފަ އެވެ.

"މޮބައިލް އެޕުން ޝެޑިއުލާއި ލޮކޭޝަން ބަލައިލެވޭނެ. އަދި ކުރިމަގުގައި އިތުރު ހިދުމަތްތައް ވެސް އެ އެޕްލިކޭޝަނުން ލިބެން ހުންނާނެ،" އޮފިޝަލް ވިދާޅުވި އެވެ.