ޖީއެމްއާރުގެ ޕްލޭންގައި ނެތް ރަންވޭ އެ ހެދީ އެމްއޭސީއެލް އިން!

ވެލާނާ އިންޓަނޭޝަނަލް އެއާޕޯޓަށް ބޮޑު ތަރައްގީއެއް ގެންނަ ކަމަށް ވާ ނަމަ، އާ ރަންވޭއެއް ނެތި އެ މަޝްރޫއު ފުރިހަމައެއް ނުވާނެ އެވެ. ރާއްޖޭގެ އިގުތިސާދުގެ މައި ތަނބަކީ ޓޫރިޒަމް ކަމަށް ވެފައި، ރާއްޖޭގެ އެންމެ ބޮޑު އެއާޕޯޓަކީ ވެލާނާ އިންޓަނޭޝަނަލް އެއާޕޯޓް ކަމުން، އެތަނުގެ ރަންވޭ ވެސް ޒަމާނީ ވާން ޖެހެ އެވެ.

އެކަމަކު އެ މުހިންމު ބައި، އެމްޑީޕީ ސަރުކާރުން އިންޑިއާގެ ޖީއެމްއާރުއަށް އެއާޕޯޓް ކުއްޔަށް ދޫކުރި އިރު، ހިމަނާފައެއް ނުވެ އެވެ. ވެލާނާ އިންޓަނޭޝަނަލް އެއާޕޯޓްގައި އޮތީ، މީގެ 50 އަހަރު ކުރިން އެޅި އަދި އޭގެ ފަހުން ތަފާތު ފަހަރުމަތިން ބޮޑުކޮށްފައިވާ ރަންވޭއަކަށް ވުމުން، އެތަނުގައި ބޮޑެތި މައްސަލަތަކެއް ހުއްޓެވެ. ދިވެހިން ގައުމީ މަސައްކަތެއްގެ ގޮތުގައި ކޮށް ނިންމައި، އެޕްރީލް 12، 1964 ގައި ރަންވޭ ހުޅުވީ، އޭރު ލިބެން ހުރި މަދު ސާމާނު ބޭނުންކޮށްގެންނެވެ. އެހެންކަމުން އެއީ އެހާ ފެންވަރު މަތިކޮށް ހެދުނު ތަނެއް ނޫނެވެ.

މިދިއަ 50 އަހަރުގެ ތެރޭގައި އަދި ހާއްސަކޮށް 1980 ގެ އަހަރުތަކުގެ ކުރީކޮޅު ރަންވޭއަށް ބައެއް ބަދަލުތައް ގެނެސް، މަތީ ފަށަލަ ރަނގަޅުކުރި އެވެ. އެކަމަކު ޖީއެމްއާރުން އެއާޕޯޓްގެ ތަރައްގީއާ ހަވާލުވި އިރު ވެސް ރަންވޭގެ ހާލަތު ދަށެވެ. ހާއްސަކޮށް 2004 ގެ ސުނާމީގައި ލިބުނު ގެއްލުންތަކާ ހެދި ރަންވޭގެ ބައެއް ތަން އަބަދު އޮންނަނީ މަރާމާތުކުރަން ޖެހިފަ އެވެ. އެހެންކަމުން އެއާޕޯޓްގައި އާ ޓާމިނަލެއް އަޅާ ނަމަ، އެއާ އެކު އާ ރަންވޭއެއް ނެތި، މުސްތަގުބަލެއް ނެތް ކަމަށް، އޭރު ވެސް އެމްއޭސީއެލްގެ ބައެއް ވެރިން ގަބޫލުކުރެއްވި އެވެ.

އޭގެ ތެރެއިން އެއް ބޭފުޅަކީ އޭރު އެމްއޭސީއެލްގެ ފައިނޭންސް ބައިގައި އިސްކޮށް އުޅުއްވި އަދި މިހާރުގެ މެނޭޖިން ޑިރެކްޓަރު އާދިލް މޫސާ އެވެ. ޖީއެމްއާރުން އެއާޕޯޓް ހިންގި އިރު ވެސް އާދިލް އަކީ އެމްއޭސީއެލްގެ އިސް މުވައްޒަފެކެވެ. އެ ދެ އަހަރު އެމްއޭސީއެލްގެ މައިގަނޑު މަސައްކަތަކީ، ޖީއެމްއާރުން ސަރުކާރަށް ދައްކަން ޖެހޭ ބައެއް ފައިސާއާ ހަވާލުވުމެވެ. އެއާޕޯޓް ހިންގުމުގެ އެއްވެސް ދައުރެއް ނޯވެ އެވެ.

އާދިލް ވިދާޅުވި ގޮތުގައި ޖީއެމްއާރާ ވެލާނާ އިންޓަނޭޝަނަލް އެއާޕޯޓް ހަވާލުކުރި އެއްބަސްވުމުގައި އާ ރަންވޭއެއްގެ ވާހަކަ ނެތީ އެއީ "ދުރު މުސްތަގުބަލަށް ބަލާފައި މާސްޓަޕްލޭނެއް ހެދިފައި ނެތުމުންނެ"ވެ.

"ރަންވޭއަކީ ތާރުގަނޑެއް ވީމާ އެއިން މާ ބޮޑު އާމްދަނީއެއް ލިބޭނެ ކަމަށް ނުބެލިފައި އޮތީ. އޭގެ ބަދަލުގައި ޓާމިނަލެއް ހަދައިގެން ކޮމާޝަލްކޮށް އިތުރު ކަންކަން ކޮށް، ފައިސާ ހޯދޭނެ،" އާދިލް ވިދާޅުވި އެވެ.

އެކަމަކު އޭނާ ވިދާޅުވި ގޮތުގައި އާ ރަންވޭއެއް ނެތި، އާ ޓާމިނަލެއް ހަދައިގެން ދުރު މުސްތަގުބަލުގައި ނެގޭނެ ފައިދާއެއް ނޯންނާނެ އެވެ. އޭގެ ސަބަބަކީ ޖީއެމްއާރުން ހަވާލުވި އެއާޕޯޓްގައި އޮތް ކުރީގެ ރަންވޭ ބޭނުންކޮށްގެން ބޭރުގެ ފްލައިޓްތައް އިތުރުކުރެވެން ނެތުމެވެ. ފްލައިޓް އިތުރުނުކޮށް، ރާއްޖޭގެ ޓޫރިޒަމް ފުޅާވާނެ ގޮތެއް ނޯންނާނެ ކަމަށް އޭނާ ވިދާޅުވި އެވެ.

އޭރުގެ ސަރުކާރާ އެކު ވީ އެއްބަސްވުމުގައި އާ ރަންވޭއެއްގެ ވާހަކަ ނެތަސް، އެއާޕޯޓް ހިންގުން އަނބުރާ ސަރުކާރަށް ނަގާފާނެކަން ޔަގީންވަމުން ދިޔަ ދުވަސްވަރު، ޖީއެމްއާރުގެ ވާހަކަ ބަދަލުވި އެވެ. އެގޮތުން އާ ރަންވޭއެއް ހަދަން ތައްޔާރު ކަމަށް އެ ކުންފުނިން ބުނެފައިވެ އެވެ. އެގޮތަށް ނިންމީ، އެއާޕޯޓްގެ ތަރައްގީއަށް ބޭނުންވެފައި އޮތް އެންމެ މުހިންމު ބައި ނެތި، ހަމައެކަނި ޓާމިނަލެއް އެޅުމަކީ، ލިބޭނެ ކުރިއެރުމެއް ނޫން ކަމަށް، އާންމުން ވެސް ގަބޫލުކުރާތީ އެވެ.

ބާ ރަންވޭގައި ހުރި މައްސަލަތައް ގިނަކަމުން، ބައެއް ދުވަސް ދުވަހު އޮޕަރޭޝަން މެދުކަނޑާލަން ޖެހިފައިވެ އެވެ. އަނެއް ބައި ފަހަރަށް މަތިންބޯޓަށް ވެސް ގެއްލުންތައް ލިބެ އެވެ. އެހެންކަމުން ރާއްޖޭގެ އިގުތިސާދު ހުއްޓުމަކުން ސަލާމަތްކުރަން އާ ރަންވޭއެއްގެ މުހިންމުކަން، ރައީސް އަބްދުﷲ ޔާމީނަށް އެނގިވަޑައިގަނެ އެވެ. އެމަނިކުފާނުގެ ސަރުކާރުން އެކުލަވާލި ވެލާނާ އިންޓަނޭޝަނަލް އެއާޕޯޓްގެ ތަރައްގީގެ މަޝްރޫއުގައި އާ ރަންވޭ ހިމެނީ އެހެންވެގެންނެވެ.

މިއަދު އެ ވަނީ އެކަން ހާސިލްކޮށްފަ އެވެ. އާ ރަންވޭއަށް ޖެއްސި ފުރަތަމަ ޓެސްޓް ފްލައިޓަކަށް ވެސް ވީ ދުނިޔޭގައި މިހާރު ދުއްވާ އެންމެ ބޮޑު މަތިންދާބޯޓު ކަމަށް ވާ އޭ380 އެވެ. މިއިން ދައްކައިދެނީ ކުރިމަގުގައި ރާއްޖޭގެ ޓޫރިޒަމަށް ދިރުން ގެނެސްދޭން، އެކި އެއާލައިންތަކުން އޭ380 ގެ މަރުކާގެ ބޯޓުފަހަރު ވެސް ވެލާނާ އިންޓަނޭޝަނަލް އެއާޕޯޓަށް ޖައްސާނެ ކަމެވެ.

އާދިލް ސިފަކުރެއްވި ގޮތުގައި މިއީ ވަރަށް ބޮޑު ކުރިއެރުމެކެވެ. އަދި މިއީ އެއާޕޯޓްގެ ކުރިމަގަށް ސަރުކާރުން އެޅި ވަރަށް ބޮޑު ފިޔަވަޅެކެވެ.

"އާ ރަންވޭއެއް ނެތި ރާއްޖޭގެ އިގުތިސާދު ކުރިއަށް ނުދާނެކަން އެއީ ޔަގީންކަމެއް،" އާދިލް ވިދާޅުވި އެވެ.

ޖީއެމްއާރު އަތުން އެއާޕޯޓް އަތުލުމަކީ ގައުމަށް ލިބުނު ވަރަށް ބޮޑު ފައިދާއެއް ކަމަށް، ރައީސް އަބްދުﷲ ޔާމީން އަބަދުވެސް ވިދާޅުވެ އެވެ. އަދި އެއާޕޯޓަކީ ވިއްކާނުލައި، ސަރުކާރަށް ހިންގޭނެ ތަނެއް ކަމަށް ވެސް އެމަނިކުފާނު ގަބޫލުފުޅުކުރެއްވި އެވެ.

މިއަދަކީ އެ ޔަގީންކަން އަނެއްކާވެސް ދިވެހިންނަށް ލިބުނު ދުވަހެކެވެ. އެމްއޭސީއެލްގެ ހަޔާތަށް ވެސް އައި ވަރަށް ތާރީޚީ ދުވަހެކެވެ. ދިވެހިން ފަޚުރުވެރިވާން ހައްގު ތަރައްގީއެއް ގެނެސްދިން ދުވަހެކެވެ.