މަތީ ތައުލީމް ހާސިލް ކުރެއްވި ދަރިވަރުންތަކެއްގެ ދަސްވެނިވުން-- ފޮޓޯ: މިހާރު
10 ޖެނުއަރީ 2019 - 10:44
9 comments
ރާއްޖޭގެ ޔުނިވާސިޓީތަކާއި ކޮލެޖުތަކުން ދަރިވަރުންގެ ފެންވަރު ބެލުމަށް އެސައިމަންޓަށް ބަރޯސާވުން އިތުރުކަން ފާހަގަކުރެވޭ ކަމަށާއި ކުރިއަށް އޮތްތަނުގައި އެކަން ހައްލުކުރަން، ކޯސްތައް އެޕްރޫވްކުރާއިރު ހާއްސަ ސަމާލުކަމެއް ދޭނެ ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) ގެ އާ ސީއީއޯ ޑރ. އަބްދުލް ހަންނާން މިއަދު ވިދާޅުވެއްޖެ އެވެ.
ރާއްޖޭން މަތީ ތައުލީމު ހާސިލުކުރާ ކުދިންގެ ފެންވަރު ދަށް ކަމަށް ވާހަކަ ދެކެވޭއިރު އެންމެ ގިނަ ބަޔަކު ފާހަގަކުރާ އެއް މައްސަލައަކީ ގޭގައި ހަދާ އެސައިމަންޓުތަކަށް ބަރޯސާވެ ސެޓްފިކެޓްތައް ދިނުމެވެ. ބައެއް ކޮލެޖްތަކުން ހަމައެކަނި އެސައިންމަންޓަށް މާސްކް ދީގެން ވެސް ސެޓްފިކެޓް ދެ އެވެ. ދަރިވަރުންގެ ނަމުގައި އެސައިމަންޓް ހަދައި ދިނުމަކީ ރާއްޖޭގައި މިހާރު ވިޔަފާރިއަކަށް ވެފައިވާ ކަމެކެވެ.
މަތީ ތައުލީމުގެ ފެންވަރު ކަށަވަރުކުރުމުގެ ދާއިރާއިން ޕީއެޗްޑީ ހާސިލްކުރައްވާފައިވާ، އެމްކިއުޔޫގެ ސީއީއޯ ހަންނާން "މިހާރު" އަށް ވިދާޅުވީ މަތީ ތައުލީމް ހާސިލްކުރާ ދަރިވަރުންގެ ފެންވަރު ރަނގަޅުކުރުމަށް އެ މީހުންގެ ފެންވަރު ބެލުމަށް ޓެސްޓްތައް ގިނަކުރަން މަސައްކަތް ކުރައްވާނެ ކަމަށެވެ.
"މާސްޓާސްއިން ދަށް ލެވަލްގައި އެސައިމެންޓްތަކަށް ވުރެ އެގްޒާމްތައް އިތުރުކުރުމަށް މަސައްކަތް ކުރާނަން،" ހަންނާން ވިދާޅުވި އެވެ.
ކޮލިފިކޭޝަން އޮތޯރިޓީގެ ސީއީއޯ ޑރ. އަބްދުލް ހަންނާނެ
"ކޯސްތައް އެޕްރޫވް ކުރާއިރު އެމްކިޔުއޭއިން ބަލަންޖެހޭ ކަންކަން ބަލާފަ ހުއްދަ ދިނީމަ އެ ކަންކަން ރަނގަޅު ކުރެވޭނެ."
އެމްކިޔުއޭގެ މަސައްކަތްތައް ހަރުދަނާކުރާނެ ގޮތްތަކާ ގުޅޭގޮތުން ހަންނާން ވިދާޅުވީ އެކަން ކުރާނީ ހަރުކަށިކަމާއެކު އަޅާ ފިޔަވަޅުތަކެއްގެ ބަދަލުގައި ޔުނިވާސިޓީތަކާއި ކޮލެޖުތަކުން ރަނގަޅުކުރަން ޖެހޭ ކަންކަމުގެ އިރުޝާދު ދީގެން ކަމަށެވެ.
"އެމްކިޔުއޭއިން ކޮލެޖްތަކަށް ދޭންޖެހޭ ގައިޑެންސް ފުރިހަމަ ކުރީމަ އެންމެން ގުޅިގެން އެކަންކަން ހައްލު ކުރާނީ. މިކޮޅުގެ ޒިންމާ ވަރަށް ބޮޑު. މިނިމަމް ސްޓޭންޓްތަކެއް [ގައުމީ ސަނަދުގެ އޮނިގަނޑު] އޮންނައިރު އެކިފަހަރު އެކި ޖަވާބު ދޭތީ ގޯސް ވަނީ. އޭގެ ބަދަލުގައި އެކަންކަން ތަންފީޒު ކުރަން މަސައްކަތް ކުރީމާ ހައްލުވާން އޮތީ،"
އެމްކިޔުއޭ ބާރުވެރިކޮށް ހަރުދަނާ ކުރުމަށްޓަކައި ހާއްސަ ބިލެއް މިސަރުކާރުން މަޖިލީހަށް ހުށަހަޅަން ނިންމާފައިވާއިރު ކުރިއަށް އޮތްތަނުގައި އެތަނުގެ މަސައްކަތްތައް ރަނގަޅު ވެގެން އަންނާނެ ކަމަށް ވެސް ހަންނާން ވިދާޅުވި އެވެ.
މަހަކު ދެތިން ދުވަހު ޔުނިވާސިޓީ ނުވަތަ ކޮލެޖަށް ކިޔަވަން އަންނަން ޖެހޭގޮތަށް ހިންގާ ބްލޮކް މޯޑް ކޯސްތަކާއި އޮންލައިންކޮށް ކިޔަވާ ވާޗުއަލް ކޯސްތައް ރާއްޖޭގައި ވަރަށް ގިނަ އެވެ. އެއީ އެކަށީގެންވާ ގޮތަކަށް ކިޔަވައިދިނުމުގެ ބަދަލުގައި ގިނަ ބަޔަކަށް ސެޓްފިކެޓު ދިނުމަށް ހިންގާ ކޯސްތަކެއް ކަމަށް ބުނެ ފާޑުކިޔުންތައް އިތުރެވެ.
އެ މައްސަލައާ ގުޅޭގޮތުން ހަންނާން ވިދާޅުވީ އެ ދެ ގޮތަށް ކިޔަވައިދިނުން ރާއްޖޭގައި މިހާރު އާއްމު ކަމަކަށް ހަދާފައިވާ ކަމަށާއި އެއީ ގަބޫލުކުރެވޭނެ ކަމެއް ނޫން ކަމަށެވެ. އެގޮތަށް ހިންގާ ކޯސްތަކުގައި ކިޔަވައިދިނުމުގައި ގަބޫލު ނުކުރެވޭ ކަންކަން ހުންނަ ކަމަށް ހަންނާން ވިދާޅުވި އެވެ.
"މަދު ދުވަހެއްގައި ކޮލެޖަށް ނުވަތަ ޔުނިވާސިޓީ އަށް އައިސް އެއްފަހަރާ ގިނަ އެއްޗެހިތަކެއް މިކިޔަވައި ދެނީ. ކުދިންނަށް އެ އެއްޗެހި އެނގުނުތޯ ނުވަތަ ނޭނގޭތޯ ރަނގަޅަކަށް ނުބެލޭ. އޭގެ ސަބަބުން ކުދިންގެ ފެންވަރު ދަށްކަމުގެ ވާހަކަ މިދެކެވެނީ. އެހެންކަމުން އެފަދަ ކޯސްތަކުގެ ނިސްބަތް މަދުކުރަން ޖެހޭ،" އެމްކިޔުއޭގެ އިސްމަގާމުތައް ވެސް ކުރިން ފުރުއްވާފައިވާ އަދި ޓިވެޓްގެ ސީއީއޯކަން ވެސް ކުރެއްވި ހައްނާން ވިދާޅުވި އެވެ.
ކިޔެވުމަށް ގިނަ ވަގުތު ދިނުމުގެ ބަދަލުގައި އެހެންކަންކަމުގައި އުޅެފައި ލިބޭ ހުސްވަގުތުގައި ކިޔަވާ ގޮތަށް އޮންނަ އޮތުން ބަދަލުކުރަން ޖެހޭ ކަމަށް ވެސް ހަންނާން ވިދާޅުވި އެވެ. އޭނާ ވިދާޅުވިގޮތުގައި ޔުނިވާސިޓީ ނުވަތަ ކޮލެޖުގައި ގިނަ ވަގުތު ހޭދަކުރާގޮތަށް ހިންގާ ކޯސްތައް އިތުރުކުރަންޖެހެ އެވެ.
އެކި މުއައްސަސާތަކުން ހިންގާ އިންސްޓްޓިއުޓްތަކުގައި ހިންގާ ކޯސްތަކުގެ ފެންވަރު ވެސް ޔަގީންކުރަން ޖެހިފައިވާ ކަމަށް، 2004 ވަނަ އަހަރުން ފެށިގެން މޯލްޑިވްސް އެކްރެޑިޓް ބޯޑުގެ މެމްބަރުކަން ވެސް ކުރައްވާފައިވާ ހައްނާން ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ވަހީދު
10 January 2019
ތީގަ މައްސަލަޔަކަށްވީ ވަހީދުކިޔާ މީހަކު މިއޮތްހާދުވަހު ތިތަނުގެ ސީ.އީ.އޯއަކަށް ހުރެ 2014 ވަނަ އަހަރު އިންސްޓިޓިއުޓެއް ހަދާ އެތަން 2016 ވަނަ އަހަރު ކޮލެޖަކަށް ބަދަލުކޮށްގެން ހިންގި ޖަރީމާ. އެތަން ހިންގަން މަގުފަހިވާގޮތައް ކަންތައް ކުރުމުގެ ނަތީޖާ މިހާރު މިފެންނަނީ. މިކަމަކީ ރާއްޖޭގެ ހުރިހާ ކޮލެޖެއްގެ ވެރިންނަށް އެނގޭ ކަންތައް. އެތަނުގެ ލެކްޗަރާއިން ކުދިންނަށް އެސައިމަންޓް ހަދާ ދެނީ. އް
ޕިޔާ
10 January 2019
ފެންވަރު ވަޒަންކުރުން ހަރުދަނާ ކުރާއިރު ކޮލެޖް އަދި ޔުނިވާސިޓީ ތަކުންދޭ ޓެސްޓް ތަކަކީ ކޮންފެންވަރެއްގެ ޓެސްޓް ތަކެއްތޯ ވަރަށް ރަނގަޅަށް ބަލަން އެބަޖެހޭ! މިހެން މިބުނީ ޑިގްރީއަށް ކިޔަވާ ކުދިންނަށް އޯލެވެލް ފެންވަރުގެ ޓެސްޓް ދިނީމައި ފެންވަރު ރަނގަޅު ކުރެވުނީ ކަމަކަށް ނުބެލެވޭނެ! އަދި ބައެއް ކޮލެޖް ތަކުން ޑިގްރީ ކޯސްތަކުގައި ކިޔަވައި ދެނީ އޯލެވެލް ފެންވަރުގެ ސިލަބަސް! ވީމާ މިކަންވެސް ވަރަށް ރަނގަޅަށް ބަލަން އެބަޖެހޭ!
ނޫސަންގު
10 January 2019
ކޮންމެ މީހަކަށްވެސް މިއެނގެނި ތިމާ ކިޔެވި ޔުނިވަރސިޓީ އެކަނި ނޫނީ އިތުރު ދެތަން. ދުރުން ދޭ ތަޢޮލީމަކީ މީގެ 30 އަހަރު ކުރިންވެސް ނަން މަޝްހޫރު ޔުނިވަރސިޓީ ތަކުން ކުރަމުން އައި ކަމެއް. ޓެކްނޮލޮޖީ އާ އެކު އެކަން މިއޮތީ ބަދަލުވެފައި. ކޯހުގެ ގޮތުން ހިންގާ މޯޑް ބަދަލު ކުރެވިދާނެ. އެއީ މައްސަލައެއް ނުން. ޙަންނާނު އަށް ދެވަނަ ފުރުސަތެއް ތި ލިބުނީ. ކުރިން ގެންގުޅުނު ވިސްނުން ގެންގުޅެގެން ކުރިއަކަށް ނުދެވޭނެ.
ކުރެވިދާނެ
10 January 2019
ހަންނާނު! މިހާރު ދީފައި ހުރި ސެޓްފިކެޓަށް ހަދާނީ ކިހިނެތްތަ؟ އެންމެންވެސް އެބަ ގަބޫލުކުރޭ އެސައިންމަންޓް ލިޔެ ދެނީ އެހެން ބައެއްކަން. ފުލް މާކްސް މިލިބެނީ އެހެން މީހަކު ލިޔެދިން އެއްޗަކުން ކަން. އެކަމަކު ސެޓްފިކެޓާއި މާކްސް ބަލާއިރު އެމީހާއަށް އެކްސެލެންޓް ލިބިފައި އޮންނަނީ. މިއަށް ބަލައިގެން ވަޒީފާވެސް މިދެނީ. ހަމައެކަނި ސެޓްފިކެޓް ދިނުމެއް ނޫން އިސްލާހުކުރަންވީ. ވަޒީފާދިނުންވެސް އިސްލާހުކުރަންޖެހޭ.
ސަކީނާ
10 January 2019
ރާއްޖޭގެ މަތީ ތައުލީމްގެ ފެންވަރު ރަގަޅުކުރުމަޓަހައި މޯލްޑިވްސް މެޑިކަލް އެސޯސިއޭޝަން އިން ޕްރީމެޑިސިން ހަދައިގެން ހަދާ މެޑިކަލް ޑްގްރީ ގަބޫލްނުކުރާ ގޮތަށް ހަމަޖެއްސި ނިއްމުމަކީ ވަރަށް ރަގަޅު ނިއްމުމެއް.
ނޫމަސް
10 January 2019
އެމްކިޔުއޭ އިން ވާޗުއަލްކޮށް، އޮންލައިންކޮށް ކިޔަވައިދިނުމަށް ހުއްދަދިނީ އޮނިގަނޑެއްނެތި، ބައެއް މީހުން ކޯސް ހިންގާފައި ދެން ދަނީ އެމްކިޔުއޭއަށް ހުއްދަނަގަން، ރާއްޖެތެރޭގައި ކިޔަވައިދޭ މަތީތައުލީމުދޭ އެއްވެސް މަރުކަޒެއް ދުވަހަކުވެސް ޑިޕާޓްމަންޓް އޮފް ހަޔާ އެޑިއުކޭޝަނުން ނުބަލާ، އެމްކިޔުއޭ އަކުން ނުބަލާ، ސެޓްފިކެޓްތަކުގައި ތައްގަނޑު ޖެހުން ހުއްޓާލިފަހުން މިހާރު އެއްވެސް ހަމައެއް ލަމައެއްނެތި ކައުންސިލްތަކުން އެދަނީ ސެޓްފިކްޓް ދޫކުރަމުން
ސޫސަން ހަބީބު
10 January 2019
ރާއްޖޭގެ މަތީތައުލީމުގެ ފެންވަރު ދަށްވީ ޑރ. ނަޒީރު އާއި އާމިރާ ޑިޕާޓްމަންޓް އޮފް ހަޔާ އެޑިއުކޭޝަނުގައި ހުންނަވައިގެން ހިންގި ޖަރީމާތަކުގެ ސަބަބުން، އެމީހުން ކޮލެޖުގެ ހުއްދަ އެބަދޭ އަލަށް އިންސްޓިޓިއުޓް ހަދާ ބަޔަކަށް ވަގުތުން، ދެން އެމީހުން ފެންނަނީ ފުރަތަމަވެސް މާސްޓާރސް ހިންގާތަން، ދެން ސިޓީ ކައުންސިލުން، އަދި އަތޮޅު ކައުންސިލުން ކޯސް ހިންގަން ފަށަނީ، މިހާރު ނެއެނގޭ ޗާންސެލަރުން އެއީ ކޮންބައެއްކަމެއް.
ފޫޅު
10 January 2019
ކޯޗެއް ތިޔަހަރަ އަމިއްލަ ކޮލެޖްތަކުން އެހިންގަނީ ކޯސްތައްތަ؟ އެއީ ފައިސާ އަށް ސެޓްފިކެޓް ވިއްކުން. އަހަރެން އަމިއްލައަށް ތަޖްރިބާކޮށްފަ މި ބުނަނީ އެއީ ފެންވަރުދަށް ކޯސްތަކެއް ހިންގާތަންތަން. ގައުމީ ޔުނިވަރސިޓީއާއި އިސްލާމިކް ޔުނިވަރސިޓީގައި ކިޔަވާ ދަރިވަރުންނަށް ހިލޭކިޔެވޭނެގޮތް ހައްދަވާ. ޓެކްސް ފައިސާއިން މިގޮތަށް އިސްރާފުކުރަން ހެޔޮނުވާނެ،
ޓީލާ
10 January 2019
ހުރިހާވެސް މައްސަލައެއް ގުޅިފައިމިވަނީ ދިރިއުޅުމުގެ ހާލަތާއެވެ. ގޭގެ ކުލި ދައްކަމުން ކިޔަވަމުން، ޔުނިވަރސިޓީ ނުވަތަ ކޮލެޖުތަކުގައި ގިނަވަގުތު ހޭދަކޮށްގެން ކިޔެވޭނެ ގޮތެއް ބުނެދެއްވަ ބައްލަވާށެވެ.