ސުއޫދު: ސުޕްރީމް ކޯޓުގެ ފަނޑިޔާރުން މަގާމުން ދުރު ކުރަންޖެހޭ ކަމަށް ވިދާޅުވި --ފޮޓޯ/މިހާރު
23 އެޕްރީލް 2019 - 13:46
29 comments
ސުޕްރީމް ކޯޓުގެ ފަނޑިޔާރުންގެ މައްޗަށް އިތުބާރު ނެތް ކަމަށާއި އެ ހުރިހާ ފަނޑިޔާރުން މަގާމުން ދުރުކުރަން ޖެހޭ ކަމަށް ކުރީގެ ބަންޑާރަ ނައިބު ހުސްނުއްސުއޫދު ވިދާޅުވެއްޖެ އެވެ.
ރާއްޖެ ޓީވީގެ ޕްރޮގްރާމެއްގައި ރޭ ވާހަކަ ދައްކަވަމުން ސުއޫދު ވިދާޅުވީ ޝަރުއީ ދާއިރާ އިސްލާހުކުރުމަށްޓަކައި ދަށު ކޯޓުތަކުން ފެށިގެން ސުޕްރީމް ކޯޓާ ހަމައަށް ވެސް ބަދަލުތަކެއް އަންނަންޖެހޭ ކަމަށެވެ. އަދި ސުޕްރީމް ކޯޓުން މިދިޔަ އަހަރުގެ ފެބްރުއަރީ މަހު ނެރުނު އަމުރަށް ފަހު ހިނގައިދިޔަ ކަންކަމަށް ފަހު ސުޕްރީމް ކޯޓުގެ ފަނޑިޔާރުންނަށް އިތުބާރު ނެތް ކަމަށާއި އެހެންވެ އެ ހުރިހާ ބޭފުޅުން ވެސް އެ މަގާމުން ދުރުކުރަން ޖެހޭނެ ކަމަށް ގަބޫލުކުރައްވާ ކަމަށް ސުއޫދު ވިދާޅުވި އެވެ.
"ސުޕްރީމް ކޯޓުގެ ފަނޑިޔާރުންގެ މައްޗަށް އެއްވެސް އިތުބާރެއް ނެތް. ސުޕްރީމް ކޯޓުގެ ފަނޑިޔާރުން ހަމަ ހުރިހާ ބޭފުޅުން ވެސް އެބަޖެހޭ ކަމަށް އަޅުގަނޑު ގަބޫލު ކުރަނީ،" ސުއޫދު ވިދާޅުވި އެވެ.
ސުއޫދު ވިދާޅުވީ ސުޕްރީމް ކޯޓުގެ ފަނޑިޔާރުން ވިޔަސް، މަގާމުން ދުރުކުރާ ނަމަ އެކަން ކުރަން ޖެހޭނީ އޮންނަ އިޖްރާއާތުތައް ފުރިހަމަ ކުރުމަށް ފަހު ހާމަކަން ބޮޑުކޮށް ކަމަށެވެ. އެގޮތުން ގާނޫނުތަކާ އެއްގޮތަށް އެ ބޭފުޅުންނަށް ޖަވާބުދާރީވުމުގެ ފުރުސަތު ދިނުމާއި ފަނޑިޔާރު ކަމަށް ގާބިލްތޯ ބެލުމަށް ކަނޑައެޅޭ ވަކި އުސޫލުތަކެއްގެ މަތިން ބެލުންތައް ބަލަން ޖެހޭނެ ކަމަށް އޭނާ ވިދާޅުވި އެވެ.
"މި ނޫން ގޮތަކަށް އެކަން ކުރާކަށް އަޅުގަނޑުމެންނަށް އެއްބަހެއް ނުވެވޭނެ. އަޅުގަނޑުމެން ދުށިން 2014 ވަނަ އަހަރުގެ ޑިސެމްބަރު މަހުގެ ތެރޭގައި ފަނޑިޔާރުން ބަދަލު ކުރެވިގެން ދިޔަ ތަން. ދެ ފަނޑިޔާރަކު ސުޕްރީމް ކޯޓުން ވަކިކުރެވުނުތަން އަޅުގަނޑުމެން ދުށިން. އެ ބޭފުޅުންނަށް ޖަވާބުދާރީވާން އެއްވެސް ފުރުސަތެއް ނުލިބޭ. އެހެންވީމަ އެ އުސޫލުން ދެން ކަން ކުރެވިގެން ނުވާނެ،" ސުއޫދު ވިދާޅުވި އެވެ.
ސުއޫދު ވިދާޅުވި ގޮތުގައި ފަނޑިޔާރުންނާ މެދު ހުރި ޝަކުވާތައް ބެލުމަށްޓަކައި ޖުޑިޝަލް ސާވިސް ކޮމިޝަން (ޖޭއެސްސީ) އިން އާންމުކޮށް، ޝަކުވާ ހުށަހަޅަން ފުރުސަތު ހުޅުވާލަން ޖެހޭނެ އެވެ. އަދި އެ ޝަކުވާތައް ބެލުމުގެ ނިޒާމު ކުރިއަށް ގެންދަންވާނީ ބޭރުގެ ޖަމާއަތްތަކުގެ ބެލުމުގެ ދަށުން ކަމަށާއި އެހެން ނޫން ނަމަ، އެއީ ސިޔާސީ ގޮތުން ކުރިކަމެއްގެ ގޮތުގައި ބެލެވޭނެ ކަމަށް ސުއޫދު ވިދާޅުވި އެވެ.
"ސިޔާސީ ގޮތުން އެމްޑީޕީ ސަރުކާރުން އައިސް ހުރިހާ ފަނޑިޔާރުންތައް ބޭރުކޮށްލީއޭ، އެހެން ބުނެ ތުހުމަތު ކުރާނެ ޖާގަ ދީގެން ނުވާނެ. އޭގެ ބަދަލުގައި އެކަން ކުރާ ނަމަ، ކުރަންވާނީ ބޭރުގެ އެކްސްޕާޓުންގެ ބެލުމުގެ ދަށުން އޮބްޖެކްޓިވް ކްރައިޓީރިއާއެއް ކަނޑައެޅިފައި، ޝަކުވާތައް ގާނޫނާއި ގަވާއިދާ އެއްގޮތަށް ބެލިގެން އެކަން ކުރަންވާނީ،" ސުއޫދު ވިދާޅުވި އެވެ.
އޭނާ ވިދާޅުވި ގޮތުގައި އަލުން ފަނޑިޔާރުން އައްޔަންކުރާ ނަމަ، އެކަން ކުރަން ޖެހޭނީ ވެސް ވަރަށް ހާމަކަން ބޮޑު ގޮތެއްގަ އެވެ. އަދި ވަކި ބަޔަކު ބޭނުންވާ ފަނޑިޔާރުން އައްޔަންކުރީ ކަމުގެ ތުހުމަތު ކުރެވޭނެ ޖާގަ ދީގެން ނުވާނެ ކަމަށް ވެސް އޭނާ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޙުސެން
24 April 2019
ފަނޑިޔާރުގެ ތަކައް އިތުބާރު ނުކުރަނީ އެމް ޑީ ޕީ މީހުން އެކަނިކަމަށް ގިނަބަޔަކޔ ބުނަނީ
ރޯނާ
24 April 2019
ތިޔަފަނޑިޔާރުންނަކީ ހާދަ މުޑުދާރު ކަންތައްތަކެއް ކޮށްފަ ތިބި ބަޔެކޭ. އަދިވެސް އިސްތިއުފާދޭކަށް ނުވޭބާ. މިކަންކަމާމެދު މި ގައުމުގެ ދީނީ ފުންނާބުއުސް އިލްމްވެރިން ވިދާޅުވަނީ ކީކޭބާ.
ބިރު
23 April 2019
ސޫދު ހަމަ ބަރާބަރު.
އަލިފްހާ
23 April 2019
ކޮންމެހެން ކުރަންޖެހޭ ކަމެއް
ކަންއޮތްގޮތް
23 April 2019
މިފަހަކަށް އައިސް މިއީ ތާއަބަދު އެކިމީހުންގެދުލުން ބޭރުކުރާބަހެކެވެ. އިވޭއަޑެކެވެެ. ދިވެހި ރައްޔިތުން ފަނޑިޔާރުގެތަކަށް އިތުބާރުކުރޭތޯ ނުވަތަ ނުކުރޭތޯބަލަން ޢާންމުކޮށް ފެންނަ ނުފެންނަ ވޯޓެއް ނަގަންވެއްޖެކަހަލައެވެ. މިކަމަށް ޙައްލެއް ހޯދަންއެބަޖެހެއެވެ. މިނިސްޓްރީއެއް ޖަވާބުދާރިކުރުވުމަށް މީހަކުމެރުމުގެތުހުމަތުގައިހުރި މުޖުރިމަކު ދޫކޮށްލިހިސާބުން އިތުބާރުވަނީ ގެއްލިފައެވެ.
ބަދަލް
23 April 2019
މާލަސް ވެއްޖެ މިހާރުވެސް
އައްޔުބެ
23 April 2019
ސްޕްރީމް ކޯޓުގެ ފަނޑިޔާރަކަށް އަހަރެން ހުށަހަޅަނީ އުއްތަމަ ފަނޑިޔާރަކަށް އައްޝެއިޚް މުޙައްމަދު މޫސާ ނައިފަރު އަދި ފަނޑިޔާރުންނަށް ކުރީގެ އުއްތަމަ ފަނޑިޔާރު އަލްއުސްތާޛު އަޙުމަދު ފާއިޒް ހުސައިން ވައިކަރަދޫ، އުސްތާޛު ޝާހީން ޙަމީދު، އުސްތާޛު މުޙައްމަދު ނަޝީދު، ކުރީގެ ޕީޖީ މުއިއްޒު، ކުރީގެ އެޓަރނީ ޑރ. ހަސަން ސައީދު. މިގޮތް ރަނގަޅުވާނެ އިންޝާﷲ
ލަބީބު
23 April 2019
ސުއޫދު ވިދާޅުވީ ގާނޫނުތަކުގައި ހުރި ގޮތަށް އިޖުރާއަތްތައް ފުރިހަމަކޮށްގެން އެމީހުން ވަކި ކުރަންޖެހޭ ވާހަކަ. މާނައަކީ ޖޭއެސްސީއިން ފާސްކޮށް ރައްޔިތުންގެ މަޖިލީހުގެ ވޯޓަކުން އެކަން ކުރާ ވާހަކަ. މިއީ ސުއޫދަށް ބިރުދައްކަން ކޯޓުން ބަލަންޖެހޭ ކަމެއް ނޫން. ކޮންމެ މަގާމެއްގައި ހުންނަ މީހަކުވެސް ގާނޫނީ ހަމަތަކުގެ މަތިން ވަކި ކުރެވިދާނެ. އަދި އެކަމަށް ގޮވާވެސް ލެވިދާނެ. އެއީ ހުއްދަ ކަމެއް.
ޝޮކްތެރަޕީ
23 April 2019
ﷲ ބިރުވެތިވަމީހުން ފަނޑިޔާރުންނަ ލާންވީ އޭރުން މިކަން ރަގަޅުވާނީ. ނަޝީދު ދައްކާމީހަކު ލީމަ ކަމަކުނުދާނެ.
މައްނޫބުރި
23 April 2019
80% ދިވެހިން ތިޔަކަމަށް ވަރަށްވެސް ތާއީދު.
ބަހަނާ
23 April 2019
ކޮރަޕްޝަން ހިމެނޭ ގޮތަށް ނުހައްގުން ފްލެޓް ބެހި މީހުންނާ ދޭތެރޭ ފިޔަވަޅު އަޅައި ފްލެޓް ދޫކުރުމުގައި އިންސާފުވެރި ނިޒާމެއް ގާއިމްކުރުމަކީ، ރައީސް އިބްރާހިމް މުހައްމަދު ސޯލިހްގެ ވެރިކަމުގެ މަސައްކަތުގެ ފުރަތަމަ 100 ދުވަހުގެ ތެރޭގައި ފުރިހަމަ ކުރައްވަން ވެވަޑައިގަތް ވައުދެއ