ހުޅުމާލޭގައި އެމްޓީސީސީގެ ބަހެއް ދުއްވާފައި ދަނީ: ބަސްތައް ދުއްވުމުގެ ގަވައިދު މުރާޖައާ ކުރަމުން އަންނަ ކަމަށް އެ ކުންފުނީގެ ސީއީއޯ ޝާހު ވިދާޅުވޭ.---ފޮޓޯ: ނިޝާން އަލީ/މިހާރު
15 މެއި 2019 - 11:43
8 comments
މި ރޯދަ މަހުގެ ފުރަތަމަ ދުވަހު ހުޅުމާލޭގައި ދުއްވާފައި ދިޔަ އެމްޓީސީސީގެ ބަހެއްގެ ދަށުވެ، ޔުކުރެއިނުގެ ޓޫރިސްޓު އަންހެން މީހާ މަރުވި މައްސަލަ އަށް ފަހު، ބަސްތައް ދުއްވުމުގެ ގަވައިދުތައް މުރާޖައާ ކުރަމުން އަންނަ ކަމަށް އެ ކުންފުނީގެ ސީއީއޯ ހަސަން ޝާހު އިއްޔެ ވިދާޅުވެއްޖެ އެވެ.
މިދިޔަ ހަފުތާގެ ހޯމަ ދުވަހު ހެނދުނު ހިނގާލަން ނުކުމެ އުޅުނު އުމުރުން 31 އަހަރުގެ އަންހެން މީހާ ބަހުގެ ދަށުވީ ޑްރައިވަރު ނިދީގައި ހުރެ ދުއްވުމުން ކަަމަށް ފުލުހުން ވަނީ ބުނެފަ އެވެ. މި މައްސަލައިގައި ބަސް ޑްރައިވަރު ވަނީ ތަހުގީގަށް ބަންދުކޮށްފަ އެވެ.
އެ އެކްސިޑެންޓަށް ފަހު، "މިހާރު" އަށް ދެއްވި އިންޓަވިއުއެއްގައި ޝާހު ވިދާޅުވީ، އަލަށް ގެންނަ ބަދަލުތަކުގެ ތެރޭގައި ބަސް ދުއްވުމަށް ވަކި ލޭނުތައް ހެދުމާއި ޑްރައިވަރުންނަށް ކޮންމެ އަހަރަކު ދޭ މެޑިކަލް ޝެކްއަޕް މެންޑޭޓަރީ ކުރުމާއި އެ މީހުންނަށް އިތުރު ތަމްރީނުތައް ދިނުން ހިމެނޭ ކަމަށެވެ.
"ކްރައުޑް މެނޭޖްމެންޓް، އެންގާ މެނޭޖްމެންޓް، ފަޔާ ފައިޓިން ކަހަލަ އެއްޗެއްހި ޑްރައިވަރުންނަށް ދަސްކޮށްދެމުން މިދަނީ،" އޭނާ ވިދާޅުވި އެވެ.
އެމްޓީސީސީގެ ސީއީއޯ ޝާހު: އެ ކުންފުނީގެ ބަސްތަކުގައި ކެމެރާ ހަރުކުރާނެ ކަމަށް ވިދާޅުވި.---ފޮޓޯ: ހުސައިން ވަހީދު/މިހާރު
ޝާހު ވިދާޅުވި ގޮތުގައި، ސަރުކާރު އަދި އެމްޓީސީސީން ވެސް އާންމުންގެ ރައްކާތެރިކަމަށް ހާއްސަ ސަމާލުކަމެއް ދެ އެވެ.
އެހެންވެ، އެމްޓީސީސީގެ މުވައްޒަފުންގެ ތެރޭގައި އެހެން ތަނެއްގައި ވަޒީފާ އަދާކުރާ ބަޔަކު އުޅޭތޯ ބަލަމުން އަންނަ ކަމަށް އޭނާ ވިދާޅުވި އެވެ. އެކަމަކު، ޝާހު ވިދާޅުވީ އެމްޓީސީސީގެ ބަސް ޑްރައިވަރުންގެ ތެރޭގައި ދާއިމީކޮށް ޓެކްސީ ކުރާ ބަޔަކު ތިބިކަން މިހާތަނަށް ފާހަގަ ކުރެއްވިފައި ނުވާ ކަމަށެވެ.
"ޓްރާންސްޕޯޓް އޮތޯރިޓީއާ ގުޅިގެން ދަނީ ހުރިހާ ޑްރައިވަރުންގެ ޕޮލިސީ ރެކޯޑްސް ވެސް ބަލަހައްޓަމުން،" އޭނާ ވިދާޅުވި އެވެ.
ޝާހު ވިދާޅުވި ގޮތުގައި، ބަސް ޑްރައިވަރުންގެ ލައިންސެންސް ވެރިފައި ކުރުމާއި ބަހުގައި ކެމެރާތައް ހަރުކޮށް، ކޮންޓްރޯލް ރޫމުން ޑްރައިވަރުންގެ އަމަލުތައް ވަގުތުން ބަލައިލެވޭނެ އިންތިޒާމުތައް ވެސް އަންނަނީ ހަމަޖައްސަމުންނެވެ.
އެކްސިޑެންޓުތައް ތަކުރާރުވިޔަ ނުދިނުމަށްޓަކައި، ބަސް ޑްރައިވަރުން ކޮންމެ ދުވަހަކު ވެސް ބަހަށް އެރުމުގެ ކުރިން ޑިކްލެރޭޝަން ފޯމެއް ނުވަތަ ކޮންސެންޓް ފޯމެއް ފުރާގޮތަށް ހަމަޖައްސާނެ ކަމަށް ޝާހު ވިދާޅުވި އެވެ.
އެމްޓީސީސީގެ ބަސް ޑްރައިވަރުން ޑިއުޓީ އަދާކުރަން ޖެހެނީ އަށް ގަޑިއިރަށެވެ. އެކަމަކު، ބަސް ދުއްވުމުގައި އެ މީހުން އާންމުކޮށް ހޭދަކުރަނީ އޭގެ ތެރެއިން ހަތަރު ގަޑިއިރެވެ.
އެމްޓީސީސީގައި 31 ބަސް ޑްރައިވަރުން ތިބޭއިރު ބަސް ކޮންޑަކްޓަރުންގެ އަދަދަކީ 30 އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޢެޑްމުންޑޯ
15 May 2019
ޙެޔޮނުވާނެ ތިވަރުގަދަ ނުކުރޭ ، ވަރުގަދަ ކުރާވަރަކަށް ބަސްތަކުގެ ޑްރައިވަރުންގެ ނުރައްކާ ބޮޑުވާނެ
ޒެކް ބުޝް
15 May 2019
އެމްޓީސީސީގެ ބަސް ޑްރައިވަރުންގެ ތެރޭގައި ދާއިމީކޮށް ޓެކްސީ ކުރާ ބަޔަކު ތިބިކަން މިހާތަނަށް ފާހަގަ ކުރެއްވިފައި ނުވާ ކަމަށެވެ. އެޖެންޑާ 19 ގެ ބުހުތާނު ބޮޑުވެގެންވާ ދޮގެއް. ގިނައިން ތިބީ އަމިއްލަ ޓެކްސީ ގަ ޓެކްސީ ކުރާ މީހުން ރެސްޓް ކުރަން ބަހައް އަރަނީ
ސާއިދް
15 May 2019
ބަހުގެ ހިދްމަތް ބަރާބަރަށްހޯދަމުން ދިޔަމީހެއްމީ, ބަސްޑްރައިވަރު ތިބުނާ 5 ގަޑިއިރަކަށް ނުހުއްޓާ ނުދުއްވާނެ! ކޮންމެބަސްހުއްޓިއަކަށް މަޑުކޮއްފަ, ނިންމާބަސްހުއްޓީގައި 5 މިނެޓަށް މަޑުކުރާނެ! އެހެންވީމަ ސީދާނުބުނެވޭނެ އެމީހުން އެދުއްވަނީ 5 ގަޑިއިރުކަމަށް! މީގަ މުހިއްމު ތަންކޮޅަކީ އެއްވެސް މުވައްޒަފަކު މީހާ ރޯފިލާވަރަށް މަސައްކަތް ނުކުރުން. ކުރާމަސައްކަތަށް ހަމައަގުނުލިބެނީ ގާނޫނީ މައްސަލަތަކެއްހުރުމުން.
މުޙައްމަދުފުޅު
15 May 2019
ވަރުގަދަ ކުރަންވީ ޑްރައިވަރުންނެއްނޫންތޯ؟ ބަސް ދުއްވަން ތިބެ، ވަރުބަލިވެ، ނިދިޖެހިގެން އެކްސިޑެންޓު މިހިގަނނީ އެހެންވެ ވިއްޔަ..
ހުސޭނު
15 May 2019
އަނގައިން....
ޢާދަނު
15 May 2019
ޢަސްލު ހުރިހާވެސް މައްސަލަޔަކީ ތަންތަނުގަ މަސަތްކަތް ކުރާ މުވައްޒަފުންނަކީއެތްވެސް ބައެތްކަމަށްނުބެލުން ވެރިން ތިބެނީ ޓައީއަޅާފަ ފިނި ކޮޓަރީގަ މުވައްޒަފުން އުޅޭހާލެތްބަލައެތްނުލާ ނިކަމެތި މުވައްޒަފު މީހާ ރެޔާދުވާލު ހެސްކިޔާފަ މަސަތްކަތް ކުރަނީ ވެރިންނަށް ވާ ކަމެތްނޫން ކަމެތްދިމާވީމަ ތަންތަނުގަ ވެރިން ބޯދަމައިގަންނާނެ ނިކަމެތި މުވައްޒަފުމީހާ ކުއްވެރިވަނީ މީމަގައުމުގަ ކަންކަންވާގޮތް ހަގީގަތް
ފުންއަސަރު
15 May 2019
މިހާރުވެސް ނިޒާމް ވަރުގަދައޭ. އެކަމަކު އެކަންކުރަން ތިބީމީހުންގެ ވިސްނުމާ ފަރުވާކުޑަކަން އިންތިހާއޭ. ކަމަށްކަމޭހިތިމާ މިކުރެވެނީ ކިހާވަރެއްގެ ކަމެއްކަން އެނގި، މަސައްކަތްކުރާ ހަމައިން ކަންނަން ރަނގަޅުވާން ފަށާނެ. ހަމައެކަނި ފައިސާ ހޯދަންކުރާ މަސައްކަތަކަށްވުރެ އެހެންމީހުންތަކެއްގެ ޒިންމާވެސް ތިމާގެބޮލުގާ އޮތްކަން ހަނދާނުގާ ބަހައްޓާނަމަ ރަނގަޅުވާނެ. އެމްޓީސީސީ އަށް ހަމަޖެހޭ އަމާން ރަނގަޅު ދުވަސްތަކަކަށް އެދެން.
ޖައުދަތު
15 May 2019
ޝާހު ތިހެންބުންޔަސް އެެއްވެސް މީހެއް ގަބޫލެއް ނުކުރާނެ.. ތި މީހުން ބޭނުން ވަނީ މަގާމް ދިފާއު ކުރަން... ޑްރައިވަރުން ދުއްވަން ޖެހެނީ 4 ނޫނީ 5 ގަޑި އިރު..