ރައްޔިތުންގެ މަޖިލިހުގެ ޖަލްސާއެއް ކުރިއަށް ދަނީ. --- ފޮޓޯ: މަޖިލިސް
17 ޖުލައި 2019 - 13:57
11 comments
ސުޕްރީމް ކޯޓްގެ ފަނޑިޔާރުންގެ އަދަދު ކުރިއެކޭ އެއްގޮތަށް ހަތަކަށް އިތުރު ކުރަން ސަރުކާރުގެ ފަރާތުން ކޯޓުތަކުގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލިހުން މިއަދު ފާސްކޮށްފި އެވެ.
އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ހުށަހެޅުއްވި އިސްލާހު ފާސްވީ ވޯޓުގައި ބައިވެރިވެވަޑައިގެންނެވި 74 މެމްބަރުންގެ އިއްތިފާގުންނެވެ. މި ބިލް ދިރާސާ ކުރި ޖުޑިޝަރީން ވަނީ ބިލަށް އެއްވެސް ބަދަލެއް ނުގެންނަން ނިންމައި ބިލް ފާސްކޮށްފަ އެވެ.
އާޒިމް ކޯޓުތަކުގެ ގާނޫނަށް ހުށަހެޅުއްވި އިސްލާހުގައި ވަނީ ސުޕްރީމް ކޯޓުގެ ފަނޑިޔާރުންގެ އަދަދަކީ އުއްތަމަ ފަނޑިޔާރު ހިމެނޭ ގޮތުން ހަތް ފަނޑިޔާރުން ކަމަށެވެ. ސުޕްރީމް ކޯޓުގައި މިހާރު ތިއްބަވަނީ އުއްތަމަ ފަނޑިޔާރު ހިމެނޭ ގޮތަށް ފަސް ފަނޑިޔާރުންނެވެ.
އާޒިމް އެގޮތަށް ހުށަހެޅި ސަބަބެއްގެ ގޮތުގައި އެ ބިލުގައި ވަނީ ދާއިމީ ސުޕްރީމް ކޯޓުގައި ހަތް ފަނޑިޔާރުން ތިއްބަވަނިކޮށް 2014 ވަނަ އަހަރު ސިޔާސީ މަގްސަދެއްގައި ކޯޓުތަކުގެ ގާނޫނަށް އިސްލާހު ގެނެސް، ދެ ފަނޑިޔާރު ވަކި ކޮށްފައިވާތީ ކުރިން އޮތްގޮތަށް ބަދަލު ކުރުމަށެވެ.
ސުޕްރީމް ކޯޓު ފުރަތަމަ އުފެއްދި އިރު އެ ކޯޓުގެ ފަނޑިޔާރުންގެ އަދަދަކީ ފަހެކެވެ. އެހެން ނަމަވެސް 2010 ވަނަ އަހަރު އެކޯޓްގެ ފަނޑިޔާރުންގެ އަދަދު ހަތަކަށް އިތުރުކުރި އެވެ. އޭގެ ފަހުން 2014 ވަނަ އަހަރު ކުރީގެ ރައީސް އަބްދުﷲ ޔާމީންގެ ސަރުކާރުން ހުށަހަޅައިގެން ފަނޑިޔާރުންގެ އަދަދު ފަހަކަށް ބަދަލުކުރީ އެވެ. އޭރު އެގޮތަށް ބަދަލު ކުރީ ކުރީގެ އުއްތަމަ ފަނޑިޔާރު އަބްދުﷲ ފާއިޒާއި ފަނޑިޔާރު އަހުމަދު މުއުތަސިމް އަދުނާންގެ މަގާމު ގެއްލުވައިލަން ކަމަށް އޭރުގެ އިދިކޮޅު ފަރާތްތަކުން ތުހުމަތު ކުރި އެވެ.
ސުޕްރީމް ކޯޓުގެ ފަނޑިޔާރުންގެ އަދަދު އިތުރުކުރުމުގެ މައްސަލަ މަޖިލީހުގައި ކުރިއަށް ދާއިރު އެ ކޯޓްގެ ފަނޑިޔާރުންނާ ގުޅޭ މައްސަލަތަކެއް ޖުޑިޝަލް ސާވިސް ކޮމިޝަން (ޖޭއެސްސީ) އިން އަންނަނީ ބަލަމުންނެވެ.
ސުޕްރީމް ކޯޓްގެ ބެންޗު ހަތަކަށް އިތުރު ކުރަން މަޖިލިހުގެ އެމްޑީޕީގެ މެމްބަރުން ވަނީ ތާއީދު ކުރައްވައިފަ އެވެ. އެކަމަކު، ފަނޑިޔާރުންގެ އަދަދު ހަތަކަށް އިތުރު ކުރުމުން އަހަރަކު 7.9 މިލިއަން ރުފިޔާ ހަރަދު ކުރަން ޖެހުމަކީ ވިސްނާލަން ޖެހޭ ކަމެއް ކަމަށް ބައެއް މެމްބަރުން ވަނީ ވިދާޅުވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އިސްމާލި
18 July 2019
ސާފު ސަބަބެެއް ނެތި ހަމައެކަނި ކުރިން އޮތް ގޮތޭ ކިޔައި 7 ފަނޑިޔާރުންނަށް ބަދަލު ކުރީ ވަފާތެރިންގެ ވީހާ ގިނަ މީހުން ތިތަނަށް ލުމަށް. އެނޫން ސަބަބެއް ނުފެނޭ. ކާބަފައިން އަޅުކަން ކުރީ ބުދަށޭ ކިޔައި އެކަމާ ވެސް އުޅެންވީނު!
ބޮޑުމީހާ
18 July 2019
މަރުހަބާ މެމްބަރުން! ދައުލަތުގެ ބަޖެޓުން ކޮންމެ އަހަރަކު 7.9 މިލިިއަން ރުފިޔާ ޚަރަދުކުރަން ތި ފާސްކުރީ. ދެން ބާރަށް އަތްޖަހާ!!!
ނެގުނުކަތީބު
18 July 2019
ބަޖެޓްކަށް ވެސް ބެލުމެއްނެތި އެބަޔަކު ކުރަން ބޭނުންވީމާ ފަޓާސްބަރި ނުވަތަ ހަވާރާޖާހެން އެދަނީ، ކޮބައިތޯ ރައްޔިތުންގެ ޙައްޤުތަށް؟ ކިތަށް ރަށު ނަރުދަމާ ބޯފެން ފޯރު ނުކޮށްދެވި އެބައޮތްތޯ؟ ކޮބައިތޯ އެ ދާއިރާތަކުގެ މެމްބަރުން؟
އަޔޫ
18 July 2019
ބަލަ މިހާރުވެސް ޕެންޝަންގެ ނަމުގައި ވަކި ކުރި 2 ފަނޑިޔާރުންނަށް މުސާރަ އާއި އެއްވަރަށް ދައުލަތުން ފައިސާ ދޭ، ދެން 7 އަށް ނަހަދްނަ ވީ ކީއްވެ. ފަނޑިޔާރުންގެ ޕެންޝަން ސްކީމް މިހާރުން މިހާރަށް އެހެން މުވައްޒަފުންނާ އެއްގޮތަށް ބަދަލުކުރުން މުހިއްމު. އަދި ފުލުހުންނާ ސިފައިންގެ ޕެންޝަން ވެސް.
ދަވޭއޭ
17 July 2019
ސަރުކާރު ހިންގާ ޕާޓީއަށް ކިރިޔާ ވެސް ރައްޔިތުން ރުހޭ ގަޔާވާ ކަމެއް މި ނިންމަނީ މަޖިލިސް ހިންގާ ފަރާތުގެ މަސައްކަތުން. ސަރުކާރު ހިންގަން ތިބި މީހުން ފަރާތުން އަދި މި ފެންނަނީ ސިޔާސީ ގޮތުން ވެސް ގައުމީ ގޮތުން ވެސް ގެއްލުން ވާތަން. ދީބާޖާ، ލުތުފީ، ސީލައިފް، ކަސްޓަމު ޓެކުސް މައްސަލަ، ބިގަށް ދިން ބަދަލު، އޭޖީ ގެ ބޯދާ ނިންމުންތައް، ކޮން ސަކަރާތެއް ތޯ މިއީ! ރައީސް ނަޝީދު ނޫނީ އަދި ރައްޔިތަކަށް ހެވެއް އެދޭ މީހެއް ނެތް. ތި ޕާޓީ އަދި އެހެން ޕާޓީއެއްގަވެސް
ޑރ.ފަޒުނާ/ހިތަދޫ/ސ.އެފުރިކާ
17 July 2019
ސުޕުރީމް ކޯޓުގެ ފަނޑިޔާރުންގެ ކޮލިފިކޭޝަންސް ތައް ތިޔަ ބިލުގައި ނެތުމަކީ ހިތާމަ ހުރިކަމެއް، އެއްމެ ދައްވެގެން ( އެމް އެލް ބީ ) ގަނޫނީ ދާއިރާ ތަކުން ދުނިޔެ ގަބޫލުކުރާ ޔުނިވަރސިޓީ އެއްގެ މާސްޓާރސް އޮވެ މަދުވެގެން 15 އަހަރުގެ ތަޖުރިބާ ހުރުން ޝަރުޠުކުރެއްވުނަމަ ތިޔަ ބިލް ވަރަށް ފުރިހަމަވީސް... ބައެއް މެމްބަރުން ޕުރައުޑު ވުމާއި އެކު އެބަ ވިދާޅުވޭ ސަރުކާރުން ބިލް ހުށައެޅި ގޮތަށް އެއްވެސް ބަދަލެއް ނުގެނަސް ފާސްކުރިވާހަކަ، ލަދުވެތިވަން މިފަދަ މީސްމީހުން
މުހައްމަދު..
17 July 2019
ސްޕްރީމް ކޯޓް އިސްލާހުވެ ނިމުނީ، އެމްޑީޕީ ބޭނުންވާ ގޮތަށް އަމުރު ނެރެދޭނެ، ފަނޑިޔާރުން ކޯޓަށްލާ 7 ހަމަކުރީމަ ނިމުނީ، ޖޭއެސްސީގަ އެމްޑީޕީ ސިޔާސީ އެކްޓިވިސްޓުން ތިބެ އެހެން ހުރިހާ ފަޑިޔާރުން ބިރުދައްކާފައި، ހަންމަތަކުރީމަ، ދެން އެއޮތީ ޖުޑީސަރީވެސް އިސްލާހުވެ، ޑިމޮކްރަސީގެ އެންމެ ފުރިހަމަ މާނައިގައި މިނިވަންވެނިމިފަ، ދެން ޖޭއެސްސީގައި ސިޔާސީ އެކްޓިވިސްޓުން ތިބުންވެސް އެއީ އެންމެ މާތްވެފައި އެންމެ ރަނގަޅުގޮތް.
ދޭވާ
17 July 2019
ތީ ހީވާ ގޮތް. މިއީ ހެޔޮ ބަދަލެއް. ޕޮޒިޓިވް ކޮށް ވިސްނަމާ.
އަލީ އަލީ
17 July 2019
ފަނޑިޔާރުންގެ އަދަދު މަދު ކުރަން ހުށައެޅި ރައީސް ޔާމީނެއްނޫން! އެގޮތަށް ހުށައެޅީ މަވޯޓާ ސަރީފް!
އަހްމަދުކަލޯ
17 July 2019
މީ މަނީ ބިލެއް ނޫން އޯކޭ ވާނެ ފަހުންނު ލާރިދޭން ޖެހޭނީ
ހަސަނު.
17 July 2019
''ފަނޑިޔާރުންގެ އަދަދު ހަތަކަށް އިތުރު ކުރުމުން އަހަރަކު 7.9 މިލިއަން ރުފިޔާ ހަރަދު ކުރަން ޖެހުމަކީ ވިސްނާލަން ޖެހޭ ކަމެއް ކަމަށް ބައެއް މެމްބަރުން ވަނީ ވިދާޅުވެފަ އެވެ.'' މަޖްލީހުގެ ދޮރުން ވަދެވޭ ކޮންމެ މީހެއްގެ ޢުމުރު ދުވަހަށް އެ ދޭ ފައިސާގެ ވާހަކަ ދައްކަން ނުކެރެނީ ކީއްްވެ؟ ކޮން ހަމައެއް ލަމަޔަކުން ކުރާ ކަމެއް އެއީ؟ އެކަމަށް ޖަވާބެއް ދީބަލަ އަމިއްލަ އަށް މުސާރަ ކަނޑައަޅާ މީހުން.