މާލޭގައި ހިނގި އަލިފާނުގެ ހާދިސާއެއް: ފަރިވާ ފިހާރާގައި ރޯވެ އެތަން އެއްކޮށް އަނދައިގެން ދިއުމުގައި ސްޓެލްކޯގެ އިހުމާލެއް އޮތްކަން ސާބިތުނުވާ ކަމަށް ހައި ކޯޓުން ވެސް ވަނީ ހުކުމް ކޮށްފައި -- ފޮޓޯ/މިހާރު
20 ޖުލައި 2019 - 12:58
6 comments
ފަރިވާ ފިހާރާގައި ރޯވެ ހިނގި އަލިފާނުގެ ހާދިސާ ހިނގީ ސްޓެލްކޯގެ އިހުމާލުން ކަން ސާބިތުނުވާ ކަމަށް ހައި ކޯޓުން ވެސް ހުކުމްކޮށްފި އެވެ.
ޖެނުއަރީ، 2016 ގައި ފާމުލަދޭރި މަގުގައި ހުރި ފަރިވާ ފިހާރާގައި ރޯވެ، އެތަން ވަނީ އެއްކޮށް އަނދައި، ހުލިވެފަ އެވެ. އެ މައްސަލާގައި އެ ފިހާރައިގެ ވެރިޔާ ހުސައިން ރަޝީދު ދައުވާ ކުރީ އެތަނުގައި އަލިފާން ރޯވީ އެ މަގުގައި ސްޓެލްކޯއިން ބަހައްޓާފައި ހުރި ކަރަންޓް ފޮށީގައި ރޯވެ، ފިހާރައާ ހަމައަށް އަލިފާން ގޮސްގެން ކަމަށްވާތީ ގެއްލުމުގެ ބަދަލަށް 33 މިލިއަން ރުފިޔާ ހޯދުމަށެވެ.
އެ މައްސަލާގައި ސިވިލް ކޯޓުން ކުރިން ނިންމާފައި އޮތީ އެ ފިހާރާގައި ރޯވީ ސްޓެލްކޯގެ ކަރަންޓް ފޮށީގެ ސަބަބުންކަން ސާބިތުނުވާ ކަމަށެވެ. އެ މައްސަލަ ހުސައިންގެ ފަރާތުން އިސްތިއުނާފް ކުރުމުން މިދިޔަ ބުރާސްފަތި ދުވަހު ހައި ކޯޓުން ވެސް ނިންމީ ދަށު ކޯޓުގެ ހުކުމް ރަނގަޅު ކަމަށާއި އެކަމުގެ ސްޓެލްކޯގެ އިހުމާލެއް އޮތްކަން ސާބިތުނުވާ ކަމަށެވެ.
ހައި ކޯޓުގެ ހުކުމުގައިވަނީ ކަރަންޓް ފޮށީގެ މަތީގައި ރޯވެފައި ހުއްޓާ ފެނުނު ކަމަށް ދަށު ކޯޓުގައި ތިން މީހަކު ހެކިބަސް ދީފައި ވިޔަސް، އެ ހާދިސާގައި އަލިފާން ރޯވެގެން އައީ އެ ފޮށި ތެރެއިން ކަން ހެކިންގެ ބަހުން އެނގެން ނެތް ކަމަށެވެ. އަދި އެ މައްސަލާގައި ފުލުހުން ހެދި ފޮރެންސިކް ރިޕޯޓުގައި، ކަރަންޓް ފޮށި ތެރޭގެ އެއްވެސް ކޭބަލެއްގައި ރޯވެފައި ނެތް ކަމަށާއި އެ ފޮށީގެ ތެރޭގައި ރޯވި ކަމަށް ނުބެލެވޭ ކަމަށް ބުނެފައި އެބައޮތް ކަމަށް ވެސް އެ ހުކުމުގައިވެ އެވެ.
ހުކުމުގައިވާ ގޮތުން އެ ހާދިސާގައި އަލިފާން ރޯވެގެން އައީ ކަރަންޓް ފޮށި ތެރެއިން ކަމަށް ބެލިޔަސް، އެކަމުގެ ޒިންމާ ސްޓެލްކޯއިން ނަގަން ޖެހޭނީ އެ ކުންފުނިން އަދާކުރަން ޖެހޭ ގާނޫނީ ވާޖިބެއް އޮތުމާއި އެ ވާޖިބާ އެ ކުންފުނިން ޚިލާފްވިކަން ސާބިތުވެފައިވާ ނަމަ އެވެ. އެކަމަކު އެ މައްސަލާގައި ހުށަހެޅި ހެކިތަކުން އެކަން ސާބިތުކޮށް ދެވިފައި ނެތް ކަމަށް ވެސް އެ ހުކުމުގައިވެ އެވެ.
އެހެންވެ، ދަށު ކޯޓުގެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށް އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި އެ ހުކުމުގައިވެ އެވެ.
އެ މައްސަލަ ބެއްލެވީ ފަނޑިޔާރު މުހައްމަދު ނިޔާޒާއި ފަނޑިޔާރު ހުސައިން ޝަހީދުގެ އިތުރުން ފަނޑިޔާރު ހަސަން އަލީ އެވެ. ރިޔާސަތު ބެލެހެއްޓެވީ ފަނޑިޔާރު ނިޔާޒެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ީފޮނިޓައްޕު ހަސަނު
21 July 2019
ސްޓެލްކޯއިން މާލޭއާއި ރާއްޖެތެރޭގެ ރައް ރަށުގައި ކަރަންޓު ދިނުމަށް ޖަހާފައިވާ ހޮޅިދަނޑީގައި އަތްލެވިގެން އެތަކެއް ބަޔަކު ވަނީ މަރުވެފައި. ހަމަ ޔަގީނުންވެސް ސްޓެލްކޯއަކުން އެކަމުގެ ޒިންމާއެއް ވެސް މިވީތަކަށް ނަގައިފައި ނެތް. ސަރުކާރުގެ ހޮސްޕިޓަލްތަކުގައި ޑޮކްޓަރުންގެ އިހްމާލުން އެތަކެއް ބައެއްގެ ފުރާނަ ގޮސްސައި އެބަހުރި އެކަމުގެ ޒިންމާ ނެގި ހޮސްޕިޓަލެއް މިރާއްޖެއަކު އަދި ނެތް. ހަރުދަނާ ގާނޫނު ތައް ނެތީމައި ރައްޔިތުންނަށް ގެއްލުންވަނީ.
އެމްސް
21 July 2019
ސާބިތުނުވާ ކިތައްމެ ޙަޤީގަތެއް އެބަހުރި! މިސާލަކަށް، ދައުލަތުގެ ބައިތުލްމާލު އެއްކޮށް ހުސްވާއިރުވެސް އެއިން އެއްޗެއް އެއްވެސްމީހަކު ނަގާކަމަކަށް ނުވޭ!
Mohamed ibrahim
20 July 2019
ހުސް ހައްޕުނޑު ވިއްކާ ތަނަކުންވެސް އެބުނީ 33މިލިއަނޯ......ހެ ހެ
ރާނާ
20 July 2019
ހަޤީޤަތަކީ ދިވެހި ފުލުހުންގެވެސް އަދި ސިފައިންގޭގަވެސް އަލިފާނުގެ ހާދިސާތައް ތަހުޤީޤުކުރުމުގެ ފުރިހަމަ ޤާބިލުކަން ލިބިފައިވާ އެކަކުވެސް ނެތެވެ. މިއީ ވަރަށް ބޮޑު އިސްކަމެއް ދޭން ފެންނަކަމެއް.
ދަތްނެތްކުއްޖާ
20 July 2019
އަމިއްލަ ވިޔަފާރި ވެރިންވެސް މިހާރު ޙިޔާލު އެހުރީ ދަޢުލަތް ފެލާލުމުގެ ޙިޔާލު. ވާނީވެސް އެހެންތާ! އެވެރިންނަށްވެސް ފެނިއްޖެ ނިމިދިޔަ ސަރުކާރުން ކަންކުރި ގޮތް. ކުންފުނިތަކުންވެސް އެހުރީ މިލިއަން މިލިއަން ރުފިޔާ އިން އިނދަޖައްދާލައި އެތާގެ ވެރިންގެ ޖީބުތައް ފުރާލާފައި.
ސަންޕަ އަހަންމަދު
20 July 2019
ކިރިޔާ ދައުލަތަށް 33 ތިޔަ ސަލާމަތްވީ. އެކަމަކު ދީބާޖާ ދައުލަތުގެ ބަނޑުފިލާގަނޑަށްދަންދެން ދުއްވާލާނެ.