ވުލްވްހެމްޓަން (އޮގަސްޓް 20) – ޗެލްސީ 4-0 އިން ބަލިކޮށް ވަރުގަދަ ފެށުމެއް ހޯދި މެންޗެސްޓާ ޔުނައިޓެޑުން ޕްރިމިއާ ލީގުގައި ކުޅުނު ދެ ވަނަ މެޗުގައި ރޭ ވުލްވްސްއާ 1-1 އިން އެއްވަރުވެއްޖެ އެވެ.
މި މެޗުން މޮޅުވާން ޔުނައިޓެޑަށް ލިބުނު ފުރުސަތުގައި ޕައުލް ޕޮގްބާ ފޮނުވާލި ޕެނަލްޓީ ވުލްވްސްގެ ގޯލްކީޕަރު ރުއި ޕެޓްރީޝިއޯ ވަނީ މަތަކޮށްފަ އެވެ. ރަށުން ބޭރުގައި ކުޅުނު މި މެޗުގެ 27 ވަނަ މިނެޓުގައި އެންތަނީ މާޝިއާލް ވަނީ ޔުނައިޓެޑަށް ކުރި ހޯދައިދީފަ އެވެ. ވުލްވްސް އިން އެއްވަރުކުރީ 55 ވަނަ މިނެޓުގައި ރުބެން ނެވެސް ޖެހި ގޯލުންނެވެ.
ޔުނައިޓެޑަށް ޕޮގްބާ ޕެނަލްޓީ ހޯދައިދިނީ އޭގެ ފަހުންނެވެ. އެކަމަކު މިދިޔަ ސީޒަނުން ފެށިގެން ތިން ޕެނަލްޓީ ބޭކާރުކޮށްލާފައިވާ ޕޮގްބާ މި ޕެނަލްޓީ ޖެހުމުން ވެސް ބައެއް ފަރާތްތަކުން ސުވާލު އުފެއްދި އެވެ. އެ ޓީމުން ޒުވާން ފޯވާޑް މާކަސް ރަޝްފޯޑް ވަނީ ޗެލްސީ އަތުން މޮޅުވި މެޗާއި އަދި މިދިޔަ ސީޒަނުގެ ޗެމްޕިއަންސް ލީގުގެ ދެ ވަނަ ބުރުން ޕީއެސްޖީ އަތުން މޮޅުވި ޕެނަލްޓީ ކާމިޔާބުކޮށްފަ އެވެ.
މި މެޗުން މޮޅުވެގެން ތާވަލުގެ ކުރިއަށް އެރުމުގެ ފުރުސަތު އޮތް ޔުނައިޓެޑް މިހާރު އޮތީ ދެ މެޗުން ހަތަރު ޕޮއިންޓާ އެކު ހަތަރު ވަނައިގަ އެވެ. އެ އަދަދަށް ޕޮއިންޓް ހޯދައި ލަނޑުގެ ތަފާތުން ތިން ވަނައިގައި އޮތީ ވާދަވެރި މެންޗެސްޓާ ސިޓީ އެވެ. ތާވަލުގެ އެއް ވަނައިގައި އޮތް ލިވަޕޫލާއި ދެ ވަނައިގައި އޮތް އާސެނަލަށް ވެސް ލިބިފައިވަނީ ހަ ޕޮއިންޓެވެ.
ޔުނައިޓެޑުގެ ކޯޗު އޮލެ ގުނަ ސޯލްޝެއާ ބުނީ ފުރަތަމަ ހާފުގައި މެޗު ކޮންޓްރޯލްކޮށް ލަނޑު ޖެހި ނަމަވެސް ދެ ވަނަ ހާފަށް ވުލްވްސް ވަރުގަދަކޮށް އަންނާނެކަން އެނގޭ ކަމަށެވެ.
"ވުލްވްސް އިން އެ ޓީމަށް ހައްގު ލަނޑު ކާމިޔާބުކުރި. އެކަމަކު އަހަރެން ދެކޭ ގޮތުގައި އޭގެ ފަހުން އަނެއްކާ ވެސް މެޗުގެ ކޮންޓްރޯލް ލިބުނު އަހަރެމެންނަށް އަދި މޮޅުވެވެން އޮތް،" ސޯލްޝެއާ ބުންޏެވެ.
އޭނާ ބުނީ ޔުނައިޓެޑުގައި އޮތީ ކުރިއަރަމުން އަންނަ ޒުވާން ސްކޮޑެއް ކަމަށާއި އެ ކުޅުންތެރިން ވަރަށް ގިނަ ކަންކަން ދަސްކުރާނެ ކަމަށެވެ. އަދި މި މެޗުން ވެސް ވަރަށް ގިނަ ކަންތައްތަކެއް ދަސްވި ކަމަށް ބުންޏެވެ.
