މިހާރު ކުރިއަށް ދާ އދ.ގެ 71 ވަނަ އާއްމު މަޖިލީހުގެ ހަވާސާގައި ރާއްޖޭގެ ފޮރިން މިނިސްޓަރު އާސިމް، އދ.ގެ ސެކްރެޓަރީ ޖެނެރަލް ބާންކީ މޫންއާ ބައްދަލުކުރައްވަނީ.-- ފޮޓޯ: އދ.
25 ސެޕްޓެމްބަރ 2016 - 11:45
22 comments
ބޭރު ދުނިޔޭގެ ފާޑުކިޔުން އޮންނަންޖެހޭނީ ވަކި ވަރެއްގައި ކަމަށް ބުނެ، މުއައްސަސާތަކަށް އަމިއްލަ އަށް ކުރިއަރަން ފުރުސަތު ދޭން ރާއްޖޭން ރޭ ދުނިޔެ އަށް ގޮވާލައިފި އެވެ.
މިހާރު ކުރިއަށް ދާ އދ.ގެ އާއްމު މަޖިލީހުގައި ރާއްޖޭގެ ފަރާތުން ތަގުރީރު ކުރައްވަމުން ފޮރިން މިނިސްޓަރު މުހައްމަދު އާސިމް ވިދާޅުވި ގޮތުގައި ޑިމޮކްރެސީ ގެނައުމުގެ މަސައްކަތް ރާއްޖޭން ފެށީ މީގެ ދިހަވަރަކަށް އަހަރު ކުރިންނެވެ. އެ މަސައްކަތުގެ ދަށުން ގާއިމްކުރި މުއައްސަސާތައް، ތަޖުރިބާ އާއި ހާލަތަށް ބަލައި ހަރުދަނާވަމުން އަންނަކަން އޭނާ ފާހަގަކުރެއްވި އެވެ.
އާސިމް ވިދާޅުވި ގޮތުގައި ބިނާކުރަނިވި ގޮތެއްގައި ފާޑުކިޔަން ޖެހޭނެ އެވެ. އެކަމަކު، އަބަދު ފާޑު ކިޔާ ނަމަ ކުރިއަރާނެ ފުރުސަތު ނުލިބޭނެ ކަމަށާއި އެހެންވެ ފާޑުކިޔުން އޮންނަން ޖެހޭނީ ވަކި މިންވަރެއްގައި ކަމަށް އޭނާ ވިދާޅުވި އެވެ.
"ބައިނަލްއަގުވާމީ ފަރާތްތަކާ އެކު ރާއްޖޭން އަބަދު ވެސް މަސައްކަތް ކުރާނެ،" މިނިސްޓަރު ވިދާޅުވި އެވެ.
ފޮރިން މިނިސްޓަރު އާސިމް ރޭ އދ.ގެ އާއްމު މަޖިލީހުގައި ތަގުރީރު ކުރައްވަނީ.-- ފޮޓޯ: އދ.
ފޮރިން މިނިސްޓަރު އެހެން ވިދާޅުވީ ކޮމަންވެލްތު މިނިސްޓީރިއަލް އެކްޝަން ގްރޫޕް (ސީމެގް)ގެ ރަސްމީ އެޖެންޑާގައި ރާއްޖެ ހިމެނިތާ އެއް ދުވަސް ފަހުންނެވެ. ރާއްޖެ އަށް ކުރިން ހުށަހެޅި ހަ ކަމެއް އިސްލާހު ކުރަން އެކަށީގެންވާ މަސައްކަތެއް ކޮށްފަައި ނުވާ ކަމަށް ބުނެ، އދ.ގެ އާއްމު މަޖިލީހުގެ ހަވާސާގައި ބޭއްވި ބައްދަލުވުމުގައި ސީމެގުން ވަނީ ދެން އިސްލާހު ނުވެއްޖެ ނަމަ ކޮމަންވެލްތުން ރާއްޖެ ސަސްޕެންޑް ކުރަން ވިސްނާނެ ކަމުގެ އިންޒާރު ވެސް ދީފަ އެވެ.
ކޮމަންވެލްތާއި އދ.ގެ އިތުރުން ޔޫރަޕިއަން ޔޫނިއަން (އީޔޫ) އާއި އެމެރިކާ އަދި އިނގިރޭސިވިލާތް ފަދަ ދުނިޔޭގެ ގިނަ ގައުމުތަކާއި ޖަމާއަތްތަކުން އަންނަނީ ރާއްޖެ އަށް ވަރަށް ބޮޑަށް ފާޑުކިޔަމުންނެވެ. އޭގެ ތެރޭގައި ޝަރުއީ ދާއިރާގެ މިނިވަންކަން ގެއްލިފައިވުމާއި އަސާސީ ހައްގުތައް ގެއްލެމުން ދާ މައްސަލަ އެ ފަރާތްތަކުން ހާއްސަކޮށް ފާހަގަކުރެ އެވެ. މިހާރު އެންމެ ބޮޑަށް ފާޑުކިޔުން އަމާޒުވެފައި ވަނީ އަބުރު ރައްކާތެރިކުރުމަށް ބުނެ ހިޔާލު ފާޅުކުރުން ހަނިކުރަން ފާސްކުރި ގާނޫނާއި އެއްވެ އުޅުން ހަނިކުރި މައްސަލައިގަ އެވެ.
ބޭރު ދުނިޔެއާ އެކު ރާއްޖޭން މަސައްކަތް ކުރާނެ ކަމަށް ބުންޏަސް، ކޮމަންވެލްތުން ވަކިވާން ސަރުކާރުން ވަނީ ރައްޔިތުންގެ މަޖިލީހަށް ހުށަހަޅާފަ އެވެ. އެ މައްސަލަ މަޖިލީހުގެ ކޮމިޓީ މަރުހަލާގައި އޮތް އިރު، ސީމެގުން މިދިޔަ ހުކުރު ދުވަހު ނިންމި ނިންމުމާ އެކު ކޮމަންވެލްތުން ވަކިވުމުގެ މައްސަލަ އަވަސް ކުރާނެކަން ވެރިކަން ކުރާ ޕީޕީއެމްގެ ޕާލިމެންޓްރީ ގްރޫޕުން ވަނީ ހާމަކޮށްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މުހަންމަދު
26 September 2016
ޚުދުމުޚުތާރުވެރިއަކު ބަޔަކުބުނާގޮތަށް ނޫނީ ބަޔާންކޮށްފަވާގޮތަށް ކަމެއްކުރާނެކަން ޤަބޫލެއްނުކުރާނަމެވެ. މިއީ ވަގުތުހޯދަން ބައިނަލްއަޤްވާމީ މުޖުތަމަޢަށްދައްކާ ދަޅައެއްކަމުގައި ބެލެވެނީ މިފަދަ އެއްކަމަކުން ދެކަމަކުންނޫނެވެ.
ހިތި މާމުއި
25 September 2016
ރައްޔިތުންނަށް ހިޔާވަހިކަން ލިބުމުގައި ކުރިމަތިވާ ގޮންޖެހުންތައް ނައްތާލުމުން ތަރައްޤީއަށް މަގުފަހިވަނީ
ޖައިސަމް
25 September 2016
ފިރުއައުނު ޒަމާނުގަ ދުނިޔޭގެ އެންމެ ތަރައްގީ ތަނަކީ މިސްރުގެ ގާހިރާ. އެކަމު އެ'ތަރައްގީގެ' އަގަކީ އިންސާނީ ކަރާމަތާއި މިނިވަންކަން. އެތަރައްގީ އަގު ކުރީ ފަގީރުންނާއި އަޅުންގެ ފުރާނައިންނާ މިނިވަންކަމުން. ފިރުއައުނުގެ ތަރައްގީ ދިފާޢު ކުރި ފަދައިން، ލޮލާއި، ދުލާއި ގަލަމުގެ މިނިވަންކަން ދޫކޮށް ތަރައްގީގެ ނަމުގައި ދިވެހިރާއްޖޭގެ ރައްޔިތުންގެ ތެރެއިން ބަޔަކު މި ގައުމުގެ އަމަލުތައް ދިފާޢު ކުރޭ. އެކަމު ހަގީގަތަކީ އިންސާނީ ކަރާމާތް ނުހިފެހެއްޓޭ ތަރައްގީއަކީ ބިލާހެއްކަން.
އައި
25 September 2016
ފުރަތަމަ ކަމަކީ އިންސާނީ ކަރާމާތް، އެ ނެތިއްޔާ ކީއްކުރާ ތަރަށްގީ އެއް. އިންސާނުން ﷲ މާތް ކުރެއްވީ މަޖަލަކަށް ނޫން، ހަތަރު ކޮންކްރީޓް ބުޑަކަށް ނޫން ތަރަށްގީ ކިޔަނީ ކީ އެއް، ތަރަށްގީގެ ފުރަތަމަ އެއްޗަކީ އިންސާފް އާއި އިންސާނީ ކަރާމާތް ޔަގީން ކުރުން.
މަންދޫބު
25 September 2016
ވައްކަން ކުރިއަސް ފާޑު ކިޔާއިގެން ނުވާނެ ހެހެހެހެހހެހެހެހެ
ސުޒީ
25 September 2016
ރައްތުންގެ ތިޖޫރި ލޫޓުވާލިއަސް ފާޑު ކިއައިގެންނުވާނެ، ރިލުވާނު ގެއްލުނީ ކިހެނެންތޯ ރައްތަކު ހިތައްއަރައިގެން ނުވާނެ! އަފުރާސީމު މަރާލާފަ އޮންއިރު ބޮޑުމައި އިންގިލި މަދީ ކީއްވެކަމާމެދު ރައްތުންގެ ހިތުގަ ސުވާލު އުފެދިގެން ނުވާނެ! ސަރުކާރައް 3 އަހަރުވީއިރު ރައްތުންގެ ދިރިއުޅުމައް ހެޔޮބަދަލެއް ނާންކަމާމެދު އެވެސް ރައްތެއްގެ ހިތުގަ ސުވާލު އުފެދިގެންނުވާނެ
ސަރުކާނު
25 September 2016
ފާޑުކީމަ އެފާޑަށް ފާޑުކީމަ ހަޖަމް ނުކުރެވެންޏާވެސް ގޭގަ އަގަމަޑުން ލައިގެން އޮންނަވާ. ވާނުވަ ނޭގި އަގަ ނުތަޅުއްވާ.
މުހައްމަދު
25 September 2016
ގޭގައި އެއްވެސް ބަޔަކަށް ހިތަށް އެރިހާ ގޮތަކަށް ނުއުޅެވޭނެ، ބެލެނިވެރިން ދެކޮޅުހަދާ ބަސްބުނާތީ، ރައް ރަށުގައި ވެސް ނޫޅެވޭނެ ކަމާއި ބެހޭފަރާތުން އަދަބު ދޭނެތީ، ގައުމުތަކުން ވެރިން ހިތަށް އެރިގޮތަކަށް ކަންތަށް ކުރަން ފެށުމުން ދުނިޔޭގެ ގައުމުތަކުން ބަސްބުނެ ފިޔަވަވަޅު އަޅުއްނެ.
ވާނުވާބެ
25 September 2016
ފާޑުކިޔުން ހަޖަމްނުކުރެވެންޏާ އިސްތިއުފާދީފައި ގެއަށް ވަޑައިގަނޭ. އޭރުން ނުޖެހޭނެ ޖަވާބްދާރީވާކަށް. މަގާމްތަކުގައި ތިބެން ކެރޭ، އެކަމަކު ބަޔަކު އެއްޗެކޭ ބުނާއިރަށް މިތިބެނީ ވާވަރު. ތިހާ ވަރުން އދ.އަށް ނުދިޔައީމާ ވީދޯ. ލަދުން ބޯހަލާކު.
ޒިންދަގީ
25 September 2016
އެންމެ ސުވާލެއް. ރައިސް ކީއްވެތޯ ތިޔަތަނަށްގޮސް ތިޔަހެން ވިދާޅުނުވީ؟؟
ޖަވާބު
25 September 2016
ރަޢީސް ޔާމީން އަކީ "ބަހަށްވުރެ އަމަލު ގިނަ ކުރާށޭ" ބުނާ ފަދަ އިން އަމަލީ ބޭފުޅެއް. އަބަދުވެސް އަވަދި ނެތި އުޅުއްވަނީ މި ކުޑަ ކުޑަ ދިވެހި ރާއްޖޭ އަކީ ދެކުނު އެޝިއާގަ އޮތް އެއްމެ ތަރައްގީ ވެފައިވާ އަދި ބޮލަކަށް ޖެހޭ ނިސްބަތުން އެންމެ މުއްސަނދި "ކުޑަ ސިންގަޕޫރ" އަކަށް ހެދޭތޯ. ދިވެހިންގެ އަތްމަތި ތަނަވަސްވެ ދިރިއުޅުން އުޖާލާ ކޮށް ދެވޭތޯ. ބޭރުގައުމުތަކުގެ އެހީ އިން ބަޖެޓު ފޫބެއްދުން ހުއްޓާލާ ލިބޭ އައްމުދަނީ އިން ސަރުކާރުހިންގަން. 10 އަހަރު ވާއިރު މިދިވެހި ރާއްޖެ އަކީ ބޭރުގައުމުތަކުން ތައުރީފުކުރާނެ ވަރުގެ ކުރި އެރުން ހޯދާފައިވާ ޒަމާނީ "ޑެވެލޮޕްޑް" ގައުމަކަށް ބަދަލު ކޮއްލުމުގައި އަވަދިނެތީ. ރައީސް ޔާމީން އަކަށް މުހިއްމެއް ނޫން ތިކަހަހަލަ ޖަލްސާތަކަށް ސީދާ އެމަނިކުފާނު ވަޑައިގެންނެވުން. ބޭނުން ފުޅީ ބަޔަކު ކިތަންމެ ވަރަކަށް ހަޅޭއް ލެވިޔަސް ދިވެހިންގެ ތަރައްގީގެ މަސައްކަތާއިގެން ކުރިޔަށް ވަޑައިގަތުން.