ކްރިމިނަލް ކޯޓާއި ފެމިލީ ކޯޓަށް އިތުރު ފަނޑިޔާރުން ހޯދަން ޖުޑީޝަލް ސާވިސް ކޮމިޝަން (ޖޭއެސްސީ) އިން އިއުލާންކޮށްފި އެވެ.
ޖޭއެސްސީން ކުރި އިއުލާނެއްގައިވާ ގޮތުން ކްރިމިނަލް ކޯޓާއި ފެމިލީ ކޯޓަށް ހޯދަނީ ކޮންމެ ކޯޓަކަށް އެއް ފަނޑިޔާރެވެ. އެ ދެ މަގާމަށް ކުރިމަތިލުމުގެ ފުރުސަތު އަންނަ މަހުގެ ފަސް ވަނަ ދުވަހާ ހަމައަށް އޮންނާނެ ކަމަށް ޖޭއެސްސީން ބުންޏެވެ.
އެ ދެ މަގާމުގެ ޝަރުތަކީ އުމުރުން 25 އަހަރުވުމާ އެކު، ގާނޫނު ނުވަތަ އިސްލާމީ ޝަރީއާއިން ފުރަތަމަ ޑިގްރީއެއް ހާސިލްކޮށްފައި ވުމެވެ. އަދި ފަނޑިޔާރު ކަމުގައި ނުވަތަ ވަކީލުކަމުގައި މަދުވެގެން ދެ އަހަރުގެ ތަޖްރިބާ ހުރުމަކީ ވެސް ޝަރުތެކެވެ.
ކްރިމިނަލް ކޯޓުގެ ފަނޑިޔާރުންނަށް މުސާރަ އާއި އިނާޔަތްތަކާ އެކު މަހަކު 48،000 އަށް ވުރެ ގިނަ ރުފިޔާ ލިބޭއިރު، ފެމިލީ ކޯޓުގެ ފަނޑިޔާރުންނަށް ލިބޭނީ މަހަކު 46،000ރ. އެވެ.
ކްރިމިނަލް ކޯޓާއި ފެމިލީ ކޯޓަށް ފަނޑިޔާރުން ހޯދަން އިއުލާން ކުރިއިރު، އިއްޔެ ވެސް ކްރިމިނަލް ކޯޓަށް ވަނީ އިތުރު ފަނޑިޔާރަކު އައްޔަން ކުރައްވައިފަ އެވެ. ކްރިމިނަލް ކޯޓުގައި މިވަގުތު 10 ފަނޑިޔާރުން ތިއްބެވިއިރު، ފެމިލީ ކޯޓުގައި ތިއްބެވީ ހަތް ފަނޑިޔާރުންނެވެ.