ބައްޔާ މެދު ލުއިކޮށް ވިސްނަން ގާތްވެސް ނުވޭ: ޑރ. މުރާދު

ކޮވިޑް-19 އިން ރައްކާތެރިވެ، އާއްމުންގެ ތެރޭގައި ބަލި ފެތުރުނަ ނުދޭން ރާއްޖޭގައި އަޅާފައި ހުރި ފިޔަވަޅުތަކާ މެދު ލުއިކޮށް ވިސްނައި ބަލީގެ ސީރިއަސްކަން ކުޑަކުރަން އަދި ގާތްވެސް ނުވާ ކަމަށް އައިޖީއެމްއެޗުގެ ޑރ. މޫސާ މުރާދު މިރޭ ވިދާޅުވެއްޖެ އެވެ.

ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގައި ބޭއްވި މީޑިއާ ބްރީފިންގައި، މުރާދު ވިދާޅުވީ ބައްޔާ މެދު ލުއިކޮށް ވިސްނަން ނުޖެހޭ ސަބަބަކީ 14 ދުވަހުގެ ކަރަންޓީނަށް ފަހު ދޫކޮށްލަން ޓެސްޓް ހަދާއިރު ވެސް ކޮވިޑް-19 އަށް ޕޮޒިޓިވްވާ މީހުން ފެންނާތީ ކަމަށެވެ. އޭނާ އެ އިޝާރާތްކުރެއްވީ، ފިލިޕީންސުން ރާއްޖެ އައިސް ކަރަންޓީނުގައި ހުރި ދިވެއްސަކު ދޫކޮށްލަން ޓެސްޓްކުރިއިރު ނަތީޖާ ޕޮޒިޓިވްވެފައި ވާތީ އެވެ.

އޭގެ މާނައަކީ، މުރާދު ވިދާޅުވި ގޮތުގައި، މުޅި ދުނިޔޭގައި ފެތުރެމުންދާ މި ބަލިމަޑުކަމާ ދެކޮޅަށް އަދިވެސް ގިނަ މަސައްކަތްތަކެއް ރާއްޖޭގައި ކުރަން ޖެހިފައިވާ ކަމެވެ. ކަރަންޓީނުގައި ތިބޭ މީހުން ދޫކޮށްލަން ޓެސްޓްކުރާ އިރު ވެސް ނަތީޖާތައް ނެގެޓިވްވަމުންދާތީ، މިހާރު އަޅާފައި ހުރި ފިޔަވަޅުތަކުގައި އެހާ ބޮޑު ލުޔެއް ގެނެވެން ނޯންނާނެ ކަމަށް ވެސް ވިދާޅުވި އެވެ.

"އަޅުގަނޑު މި އިލްތިމާސްކުރަނީ އަދިވެސް އަޅުގަނޑުމެން އަޅަން ޖެހޭ ފިޔަވަޅުތައް މަތީގައި، ޚާއްސަކޮށް ކުރީއްސުރެން އަޅާފައިވާ ފިޔަވަޅުތަކުގެ މަތީގައި ތިބުން،" މުރާދު ވިދާޅުވި އެވެ.

މިހާތަނަށް ދީފައިވާ އިރުޝާދުތަކުގެ ތެރެއިން މުހިއްމު ކަންކަމުގެ ގޮތުގައި ފާހަގަކުރެއްވީ ގިނަގިނައިން އަތްދޮވުމާއި އެކަކު އަނެކަކާ ދޭތެރޭގައި ހުންނަން ޖެހޭ ދުރުމިން ބެހެއްޓުން ފަދަ ކަންކަން ކުރިއަށް ގެންދިއުމެވެ. މި ބަލީގައި އަލިމަގެއް ރާއްޖޭގައި ނުފެންނަނީސް ފަރުވާކުޑަނުކުރަން އޭނާ އިލްތިމާސްކުރެއްވި އެވެ.

އެންއީއޯސީގެ ތަރުޖަމާން، މުހައްމަދު މަބްރޫކް އަޒީޒް ވެސް ވަނީ ޑޮކްޓަރުގެ އިރުޝާދު ތަކުރާރު ކުރައްވައި ރައްޔިތުންގެ އެއްބާރުލުމަށް އެދިވަޑައިގެންފަ އެވެ.

އޭނާ ވެސް ވިދާޅުވީ ރާއްޖެ އަށް ބަލީގެ ނުރައްކާ އޮތް މިންވަރު އެއްވެސް މިންވަރަކަށް ކުޑަވެފައި ނުވާ ކަމަށެވެ. ދުނިޔޭގެ އަދަދުތަކުން ފެންނަނީ 1.8 މިލިއަން މީހުންނަށް މި ބަލި ޖެހިފައިވާ ކަން ކަމަށާއި ލައްކައަކަށް ވުރެން ގިނަ މީހުން މި ބަލީގައި މަރުވެފައިވާ ކަން ވެސް މަބްރޫކް ފާހަގަކުރެއްވި އެވެ.

އޭނާ ވިދާޅުވި ގޮތުގައި ރާއްޖެ އިން ދުރާލައި މި ބަލިން ރައްކާތެރިވާން އަޅާފައި ހުރި ފިޔަވަޅުތައް ބަދަލުނުކުރުމާ އެކު ސިއްހީ ތަޖުރިބާކާރުންގެ އިރުޝާދާ އެއްގޮތަށް އާދަކާދަ ކުރިއަރުވައި ފަރިތަވުމަކީ އެންމެ މުހިއްމު ފަރުވާ އެވެ.

ފަރުވާއެއް ހޯދިފައިވާ ނުވާ ކޮވިޑް-19 އަށް ރާއްޖެ އިން މިހާތަަނށް 20 މީހަކު ޕޮޒިޓިވްވެ 14 މީހަކު ވަނީ ރަނގަޅުވެފަ އެވެ. މިހާރު ބަލިން ރަނގަޅު ނުވެ ތިބީ ހަތަރު ދިވެހިންނާއި ރާއްޖެ އިން ދިޔަ ފަހުން ލިބުނު ސާމްޕަލްގެ ނަތީޖާ ޕޮޒިޓިވްވި އިޓަލީގެ ދެ ޓޫރިސްޓުންނެވެ.