ޔޫރަޕިއަން ޕާލިމަންޓް އިމާރާތް ވަގުތީ ހިޔަލަކަށް

ބެލްޖިއަމްގެ ބްރަސަލްސްގައި ހުންނަ ޔޫރަޕިއަން ޕާލިމަންޓް އިމާރާތް ކޮރޯނާވައިރަހުގެ ސަބަބުން ހާލުގައި ޖެހިފައިވާ އަންހެނުންގެ ވަގުތީ ހިޔަލެއްގެ ގޮތުގައި ބޭނުންކުރަން ފަށައިފި އެވެ.

ދަ ހެލްމަޓް ކޯލްގެ ނަމުން މަޝްހޫރު އެ އިމާރާތުގައި މި ވަގުތުގައި ބަލަހައްޓަމުން އަންނަނީ ގެވެށިއަނިޔާގެ ޝިކާރައަކަށްވެފައިވާ އަންހެނުންނެވެ. މީޑިއާތަކުން ބުނި ގޮތުގައި އެތަނުގައި މިހާރު ވެސް 100 އެއްހާ މީހުން އެބަތިއްބެވެ.

މިދިޔަ ބުދަ ދުވަހުން ފެށިގެން އިމާރާތް ވަގުތީ ހިޔަލެއްގެ ގޮތުގައި ބޭނުންކުރަމުން އަންނަ އިރު، އެތަނުގެ އޮފީސްތައް ވަނީ ނިދާ ކޮޓަރިތަކަކަށް ބަދަލުކޮށްފަ އެވެ. އެގޮތުން ބައެއް ކޮޓަރިތަކުގައި ދެ މީހުން ބައިތިއްބާ އިރު، ބައެއް ކޮޓަރިތައް އެންމެ މީހަކަށް ވެސް ހާއްސަކުރެ އެވެ. އަދި އެތަނުގައި ތިބޭ މީހުންނަށް ކެއުމާއި ބޭސްފަރުވާގެ ހިދުމަތް ވެސް އަންނަނީ ދެމުންނެވެ.

މިކަމާ ބެހޭ ގޮތުން އިންސާނީ ހައްގުތަކަށް މަސައްކަތްކުރާ އިމަޖެންސީ ޖަމިއްޔާ ސަމުސޯޝަލް އިން ބުނިގޮތުގައި ކޮރޯނާވައިރަހުގެ މި ވަބާގެ ތެރޭގައި ވަރަށް ގިނަ އަންހެނުންނަށް ގެވެށިއަނިޔާ ލިބެމުންދާކަމުގެ ޝަކުވާތައް ދަނީ ލިބެމުންނެވެ. އަދި އެފަދަ މީހުންނަށް ވަންނާނެ ތަނެއް ނެތި، ހާލުގައި ޖެހެމުންދާ ކަމަށް ބުންޏެވެ.

ސަމުސޯޝަލްގެ ޑިރެކްޓަރު ސެބަސްޓީން ރޯއި ވިދާޅުވީ ކޮރޯނާވައިރަހާ އެކު ވަރަށް ގައުމުތަކުން ލޮކްޑައުންގެ ހާލަތުގައި އޮތް އިރު އެންމެ ކަންބޮޑުވާ މައްސަލަ އަކީ ގެވެށިއަނިޔާގެ މައްސަލަތައް އިތުރުވަމުން ދިއުން ކަމަށެވެ.

"މިއީ ދަނޑިވަޅުގައި އަހަރެމެން އެންމެން ވެސް ސަމާލުކަން ދޭން ޖެހިފައި އޮތް މައްސަލައެއް. މިފަދަ މައްސަލަތަކާ ގުޅިގެން އަންހެނުންތަކެއް ބިކަވުމަކީ ވަރަށް ބޮޑު ކަންބޮޑުވުމެއް." އޭނާ ވިދާޅުވި އެވެ. "އަހަރެމެން މިހާރު އެންމެ ކަންބޮޑުވަނީ މިގޮތަށް ދިމާވާމުންދާ އަންހެނުންނަށް ލޮކްޑައުންގެ ހާލަތަށް ފަހު ދިމާވެދާނެ ގޮތަކާ ދޭތެރޭ."

ސެބަސްޓީން ވިދާޅުވީ ޔޫރިޕިއަން ޕާލިމަންޓް އިމާރާތުން ވަގުތީ ހިޔާ މި ވަގުތަށް ލިބުމަކީ ބޮޑު ހިތްހަމަޖެހުމެއް ކަމަށާއި އެ ފުރުސަތު ފަހިކޮށްދިނީތީ ޝުކުރު ވެސް އަދާކުރާ ކަމަށެވެ.

ޕާލިމަންޓްގެ ރައީސް ޑޭވިޑް ސެސޮލީ ވިދާޅުވީ މި ވަގުތަކީ ބެލްޖިއަމާއި މުޅި ބްރަސެލްސް އަށް ވެސް ވަރަށް ދަތި ވަގުތެއް ކަމަށެވެ.

"އެހެންވީމާ އަހަރެމެން މި ދަނޑިވަޅުގައި އެބަޖެހޭ އެންމެން އެކަތިގަނޑެއްގެ ގޮތުގައި މަސައްކަތްކޮށް، އެއް ބަޔަކު އަނެއް ބަޔަކަށް އެހީ ފޯރުކޮށްދޭން." އޭނާ ވިދާޅުވި އެވެ.

ޔޫރަޕިއަން ޕާލިމަންޓްގެ އިމާރާތް ވަގުތީ ހިޔަލެއްގެ ގޮތުގައި ބޭނުންކުރަން ފެށި އިރު، ކޮރޯނާވައިރަހާ ދިމާކޮށް އެތަނުގެ ބަދިގެން އަންނަނީ މަގުމަތިވެފައިވާ މީހުންނަށް އެހީވާ ޗެރިޓީތައް މެދުވެރިިކޮށް ދުވާލަކަށް 1،000 މީހުންނަށް ކެއުން ވެސް ފޯރުކޮށްދެމުންނެވެ.

މިދިޔަ އަހަރުގެ އޮކްޓޯބަރު މަހުގެ ތެރޭގައި ރަސްމީކޮށް ހުޅުވައި ބޭނުންކުރަން ފެށި ހެލްމަޓް ކޯލް އިމާރާތް ނިސްބަތްވަނީ ކޮމިއުނިޒަމަށް ފަހު ޔޫރަޕް އެކަތިގަނޑަކަށް ހެއްދެވި ޖަރުމަންގެ ކުރީގެ ޗާންސެލަރު ހެލްމަޓް ކޯލްއަށެވެ. އޭނާ ވަނޫ 2017 ގައި އަވަހާރަވެފަ އެވެ.