ޓެގް ޓީމުގެ މެމްބަރު ޑރ. މުއާޒް ރޭ ނޫސްވެރިންނާ އޮންލައިންކޮށް ވާހަކަ ދައްކަވަނީ.
07 ޖުލައި 2020 - 08:21
11 comments
ކޮވިޑް-19 ޖެހިފައިވާ މީހަކާ ގުޅުމެއް ނެތް ގިނަ ބައެއްގެ ގައިން އެ ބަލި ފެނުމަކީ މުޖުތަމައުގެ ތެރޭގައި އެ ބަލި ފެތުރިފައިވާ މިންވަރު ދައްކުވައިދޭ ކަމެއް ކަމަށާއި އެކަމަށް ސަމާލުވާންޖެހޭ ކަމަށް ކޮވިޑާ ގުޅޭ ކަންކަމުގައި ސަރުކާރަށް ލަފާދޭ ޓީމުން ރޭ ބުނެފި އެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗުއީއޯސީ) ން ބޭއްވި މީޑިއާ ބްރީފިންގައި، ރާއްޖޭގައި މިހާރު އެ ބަލި އޮތް ހާލަތުގެ ތަފާސްހިސާބުތައް ހިއްސާ ކުރައްވަމުން އެޗުޕީއޭގެ އެޕިޑެމިއޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ގުޅުމެއް ނެތް ކޭސްތައް 30-40 ޕަސެންޓާ ދެމެދު ހިފެހެއްޓިފައިވާ ކަމަށެވެ.
އޭނާގެ އެ ވާހަކަތަކާ ގުޅިގެން، ޓެކްނިކަލް އެޑްވައިޒަރީ ގުރޫޕް (ޓެގް) ގެ މެމްބަރު ޑރ. މުއާޒް މޫސާ ވިދާޅުވީ، އާންމު ގޮތެއްގައި އެއްވެސް ގުޅުމެއް ނެތް މީހުންގެ ގައިން ކޮވިޑް-19 ފެންނަ ނަމަ އޭގެ މާނައަކީ މުޖުތަމައުގެ ތެރޭގައި އެ ބަލި ފެތުރެމުންދާ މިންވަރު އިތުރުވުން ކަމަށެވެ.
އައިޖީއެމްއެޗުގައި މަސައްކަތް ކުރައްވާ އެތެރެހަށީގެ ޑރ. މުއާޒް ވިދާޅުވިގޮތުގައި، ދުވާލެއްގެ މައްޗަށް ބަލިޖެހޭ މީހުންގެ އަދަދު ގިނަ ނުވިޔަސް ގުޅުމެއް ނެތް މީހުންގެ އަދަދު އިތުރުވާ ނަމަ އެއީ ކަންބޮޑުވާން ޖެހޭނެ ކަމެކެވެ. އެފަދަ ކޭސްތައް އިތުރުވާ ނަމަ ދުވާލެއްގެ މައްޗަށް ފެންނަ އަދަދު ވެސް އިތުރުވާ ތަން ދުވަސްކޮޅެއްގެ ތެރޭގައި ފެންނަން ފަށާނެ ކަމަށާއި އެ ހިސާބަށް ގޮސް ކޮންޓްރޯލުން ނުދަނީސް އެކަމަށް ސަމާލުވެ ފިޔަވަޅު އަޅަންޖެހޭ ކަމަށް ވިދާޅުވި އެވެ.
އެޗުއީއޯސީގެ ރޭގެ މީޑިއާ ބްރީފިންގައި (ކ-ވ) ޑރ. މުއާޒް، ޑރ. ނަޒްލާ އަދި ޑރ. އަފްޒަލް ބައިވެރިވެވަޑައިގަންނަވަނީ.
އެޗުޕީއޭގެ ސީނިއާ މެޑިކަލް އޮފިސަރު އަދި ކޮވިޑް-19 އާާ ގުޅޭ މައުލޫމާތު ދެއްވާ ތަރުޖަމާން ޑރ. ނަޒްލާ ރަފީގު ވިދާޅުވީ، ފެންނަ ކޮންމެ ކޭސްއަކީ ވެސް ކޮންމެސް އެހެން ކޭސް އަކާ ގުޅުމެއް އޮތް ކޭސްއަކަށް ވާން ވާނެ ކަމަށެވެ. އެހެން ނޫން ނަމަ އޭގެ މާނައަކީ އަދިވެސް ނޭނގި ގިނަ ބަޔަކަށް ބަލި ޖެހިފައި ތިބުން ކަމަށް އޭނާ ވިދާޅުވި އެވެ.
"އެކަމަކު މި ކަހަލަ ކޭސްތައް މި ފެންނަނީ އަޅުގަނޑުމެންނަށް އެ ވަރަށް އެކްޓިވް ސަވައިލަންސް ކުރެވޭތީ. އެއީ ވެސް ފާހަގަކޮށްލަން ޖެހޭ ކަމެއް" ކޮވިޑް-19ގެ ކޮންޓެކްޓް ޓްރޭސިންގައި ވެސް އެންމެ އިސްކޮށް ހަރަކާތްތެރިވެވަޑައިގަންނަވާ ޑރ. ނަޒްލާ ވިދާޅުވި އެވެ.
އެޗުޕީއޭގެ އެޕިޑެމިއޮލޮޖިސްޓް ޑރ. އަފްޒަލް ވިދާޅުވީ ގުޅުމެއް ނެތް ކޭސްތައް 30-40 ޕަސެންޓާ ދެމެދު ހިފެހެއްޓިފައިވާ ކަމަށެވެ.
ރާއްޖެ އިން މިހާތަނަށް ކޮވިޑް-19ގެ 2491، މީހަކު ޕޮޒިޓިވް ވެފައިވާއިރު، 12 މީހަކު މަރުވެ، 2،113 މީހުން ވަނީ ރަނގަޅުވެފަ އެވެ. މިހާރު ފަރުވާދެމުން އަންނަނީ 361 މީހަކަށެވެ. މިދިޔަ ދިޔަ މަހެއްހާ ދުވަހު ދުވާލެއްގެ މައްޗަށް ފެންނަ ކޭސްތަކުގެ އަދަދުތައް ވަރަށް ބޮޑަށް ވަނީ ދަށްވެފަ އެވެ. ޓެސްޓު ކުރުން ވެސް އިތުރުކޮށްފައި ވަނިކޮށް، އާ ކޭސްތައް މަދުވެ، ރަނގަޅުވާ މީހުންގެ އަދަދު ވަނީ ގިނަ ވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޝައިޚް.
07 July 2020
ގުޅުން ނެތް ކޭސްފެންނާނެ އައި.ޖީ.އެމް.އެޗް ހިސާބައްވުރެ ފަރުވާކުޑަވެ، ގޮތެއްނެތުނީމަ، މިކަމަކީ ގަސްތުގަ ހޮސްޕިޓަލުންކުރިކަމެއް، މިހާރު ފެންނަހުރިހާ ކޭސްއަކީ އެ ހޮސްޕިޓަލްގެ ނުހޮރުއްޕާން، ދޮގާ،މަކަރުން ހުރިހާ ކަމެއް،
ރައްޔިތުސޮރު
07 July 2020
މިކިޔަނީ ސީދާ ފޮލް ލޮކްޑައުންނަކަށްދާށޭކޭ ނޫން! ރައްކާތެރިކަމުގެ ފިޔަވަޅުތައް ހެލްތުންނާ ފުލުހުން މޮނީޓަރކޮށް ބަލަހައްޓަންޖެހޭނެޔޭ! ފަރުދީ ޒިންމާއޭ ކިޔާފަ އެއްކޮށް ދޫކޮށްލަންޏާ ދަޢުލަތެއް ނުވަތަ ސަރުކާރެއްގެ ބޭނުންކެނޑުނީ! އެމީހަކު ހިތުހުރިގޮތަކަށް އުޅެން ދޫކޮށްލަންޏާ ކުއްވެރިންވެސް ހައްޔަރުކުރާނެކަމެއްނެތް އޭނަވެސް ފަރުދީ ޒިންމާ އަދާކުރަން ހަނދާންކޮށްދިނީމަ ނިމުނީ! ބޮޑުތަނުން ފެއިލްވާތީ ކޮންމެސް ލަވައެއް ކިޔާނެތާ!
ސަމަން
07 July 2020
ލުއި ތަކޭ ބުނީމަ ބައެއް މީހުންނަށް ހީވަނީ މިއީ ކުރީގައި އުޅުނު ގޮތަށް އުޅެން ލިބޭ ފުރުސަތެކޭ. މިއީ ކުށް ހީ އެއް. މިހާރުގެ ނޯމަލްއަކީ 'ނިއު ނޯމަލް’. އެއީ އެންމެންވެސް ވައިރަސް އުޅޭކަން ދަނެގެން އަޅަން ޖެހޭ ފިޔަވަޅުތަށް އަޅައިގެން ކުރިއަށް ދިޔުން. އެހެން އެކަން ކުރެވިއްޖެ ނަމަ ﷲގެ އިރާދަފުޅުން ދިވެހިންނަށް ދެރަ ގޮތެއް ނުވާނެ. ކުޑަ ހިތްވަރެއް ހަމަ.
ހަސަދު
07 July 2020
ކޮމެންޓުކުރާ މީހުނަނަށް ދަންނަވަން އޮތީ ގައުމު އަބަދު ލޮކުޑައުން އަކު ނުބޭއްވޭނެއޭ. އިގުސޯދުގެ ގެއްލުމުގެ ޒިންމާ ވެސް ނަގަން ޖެހޭނީ ހަމަ ތިކަޔާ ބޮޑުވަޒީރާ، ރާއީސް. ގައުމު ދޫކޮށްލީ ރަނގަޅަކަށް އޭގެ މާނަ އަކީ މަގުތައްމަތީގައި މާސުކު ދަތްދޮޅިއަށް ވައްޓާލައިގެން ސިގިރޭޓު ދަމަށް ތިބެންވީ އެކޭނޫނޭ. ދިވެހިން މިއަށް ވުރެ ތަހުޒީބުވެ ހޭލުންތެރި ވާން އެބަޖެހޭ. އެއްވެސް ކަމަކުން ސަލާމަތެއް ނުވާނެ އެންމެން އެކުގައި މަސައްކަތް ކޮށްގެންނޫނީ.
ފަޤީރުކޮއެ
07 July 2020
މިތާންގަ އޮންނަ ބޯހަރު ސަރުކާރަކުން ތިއަޑެއްނާހާނެ! މިހާރު މިހިނގަނީ ބޮޑުވަޒީރު ބޭނުންވާގޮތައް! އަމީން މައިމޫނާ ސޯލިހް ޒިންމާވާންޖެހޭނެ މިގޮތައް ހުޅުވާލުމުގެ ސަބަބުން ލިބޭ ގެއްލުމަށް! ރައްޔިތުން ބަސްނޭހީއޭކިޔާ ތަންމިނަށް ހިތުހުރިގޮތަށްއުޅެން ހުޅުވާލާ ބޯދަމައެއްނުގަނެވޭނެ!
ހެޔޮގޮތް
07 July 2020
ހެލްތު މިނިސްޓްރީ އަދި އެޗްޕީއޭއިން ކިތަންމެ ރަނގަޅަށް ބަލި ކޮންޓްރޯލުކޮށްފައި، ގައިޑްލައިންތަށް ހަދާ އެއަށް އަމަލުކުރަން އިލްތިމާސްކޮށް ދޫކޮށްލީމަ، އެ ގައިޑްލައިންތަށް ތަންފީޒުކުރުމުގައި މުއައްސަސާތަށް ފެއިލުވީމަ އެކަމުގެ ޒިންމާ ނަގަންޖެހެނީވެސް މިނިސްޓަރު އަދި ޑީޖީ؟ ގައިޑްލައިންތަށް މޮޅަސް އެއަށް އަމަލު ނުކުރަންޏާ ބަލި ފެތުރުން ކޮންޓްރޯލް ނުވާނެ. މިވަގުތަކީ ހުރިހާ މުއައްސަސާއެއް ގުޅިގެން އެޗްޕީއޭގެ ގައިޑްލައިންތައް ތަންފީޒުކޮށްދޭންވީ ވަގުތު.
ފަޅޯދަނޑު އައިޝާ
07 July 2020
ހެލްތު މިނިސްޓުރީއިން ބަލި ކޮންޓުރޯލް ކުރަން ކުރިކަމަކީ ބަލިޖެހުނުމީހުންނާ ކޮންޓެކްޓްވި މީހުން ބައްޔައް ޓެސްޓުކުރުން ހުއްޓާލީ! އެއިރުން ޕޮޒިޓިވްވާ މީހުންގެ އަދަދު ފެނުން މަދުކޮށް އޮޅުވާލީ! އެއްކޮށް ޓެސްޓުކުރުން ހުއްޓާލިނަމަ ބަލިޖެހިފަހުރި އެކަކުވެސް ނުފެންނާނެ! ހަޤީޤަތުގަ ލޮކްޑައުން ކުރިއިރަށްވުރެ ލޮކްޑައުން އުވާލިއިރު ހާލަތުމާގޮސްކޮށް ފެންނަނީ ދިވެހިރާއްޖޭގަ! މީ ހެލްތު މިނިސްޓްރީގެ ސީދާ ފެއިލިއައެއް!
ޓޯކީ
07 July 2020
ހުރިހާ މީހުން ވެސް މިބަލިން ރައްކާތެރިވުމަށް ސަމާލުވާންޖެހޭނެ. 2020 ގެ ފުރަތަމަ 6 މަސް ދުވަހު ރާއްޖޭއިން މަރުވި މީހުންގެ ޖުމްލަ އަދަދަކީ ކޮބާބާ؟ އަދި 2019، 2018، 2017 ގެ ފުރަތަމަ 6 މަސް ދުވަހުު ރާއްޖެ އިން މަރުވި މީހުންގެ ޖުމްލަ އަދަދު އެނގެނިކޮށް ކޮވިޑް-19 ގެ ނުރައްކާތެރިކަން ރައްޔިތުންނަށް ފަހުމުވާނެ. މިޒާތުގެ ސްޓެޓިސްކްސް ހާމަ ނުކުރަނީ ކީއްވެބާ؟ އެހެން ގައުމުތަކުން އެދަދުތައް ހާމަކުރޭ. އަހަރުމެން ވެސް ބޭނުން ފެކްޓްސް ބޭސްޑް މައުލޫމާތު.
ފިތުނަރެސް
07 July 2020
ކަލޭ ކޮންމެވެސް ޢެހެން ފިތުނައެއް ހެދޭތޯ އުޅޭ. މަރުވި މީހުންގެ ސައްހަ އަދަދު މި ނޫހުގެ މަތިންވެސް ފެންނަން އެ އޮތީ.
އުޅުމެއް ނެތް ދިވެހިން
07 July 2020
މިއީ އުޅުމެއް ދިވެހިންނޭ. ލޮކްޑައުން މުއްދަތުގައި ޒަރޫރީ ބޭނުމަށާއި މުހިންމު އެހެން ބޭނުންތަކަށް ބޭރަށް ނުކުތުމުގެ ހުއްދަ ދެމުން ދިޔައިރު ވެސް، އުސޫލާ ޚިލާފަށް ބޭރަށް ނުކުމެގެން 5000 އަށް ވުރެ ގިނަ މީހުން ޖޫރިމަނާ ކުރެވުނު. އަދި އެ ކުށް ތަކުރާރު ކޮށްގެން 200 އަށް ވުރެ ގިނަ މީހުން ހަައްޔަރުކުރަން ޖެހުނު. މިވަރުގެ ބަޔަކު ބަސްއަހާނެ ކަމަށް ބަލާ އަންޑަ އެސްޓިމޭޓްކުރުން ވާނީ މޮޔަ ކަމަކަށް.
ލޫދު
07 July 2020
ދިވެހިން ދިވެހިންގެ އުޅުމެއް ނެތް ކަމަށް ވަރަށް ގިނައިން ބުނާ އަޑުއިވޭ. ބައެއް ކަންކަމީ ދިވެއްސަކަށްވީތީ ކުރާ ކަންތައްތަކެއް ނޫން ނުވަތަ ތަހްޒީބު ނުވެގެން ކުރާ ކަންތައްތަކެއް ނޫން. އެއީ އިންސާނުންގެ ތޮބިއްޔަތާ ގުޅުން ހުރިކަންތައްތައް. ލޮކްޑައުންނަކީ ދުނިޔޭގެ ގިނަ އިންސާނުން ތަޖްރިބާކޮށްފައިވާ ކަމެއް ނޫން. އެއީ ކުށްވެރިންނަށް ލިބިފައި ހުންނާނެ ތަޖްރިބާއެއް. ދިވެހިންނަކީ އާދައާ ހިލާފަށް ބަސް އަހާ ކިޔަމެންތެރި ބައެއް ކުޑަކޮށް ފިޑިވެސް ވާނެ.