މާލެއިން ކޮވިޑް-19 އަށް ޕޮޒިޓިވްވި ބަޔަކު ދިޔަ ތިން މިސްކިތެއް ބަންދުކޮށް ޑިސްއިންފެކްޓް ކުރުމަށް ފަހު އަލުން ހުޅުވައިފި އެވެ.
އިސްލާމިކް މިނިސްޓްރީން ބުނި ގޮތުގައި ޕޮޒިޓިވްވި މީހުން ގޮސްފައި ވަނީ މަސްޖިދުއްސުލްތާން ހަސަން އިއްޒުއްދީން މިސްކިތާއި މުހައްމަދު އިމާދުއްދީން މިސްކިތުގެ އިތުރުން މަސްޖިދުއްއަފީފުއްދީނަށެވެ. މި މިސްކިތްތައް ބަންދުކޮށް ޑިސްއިންފެކްޓްކުރުމުގެ މަސައްކަތް ފަށާފައި ވަނީ އިއްޔެ އެވެ.
އިސްލާމިކް މިނިސްޓްރީން ބުނީ ޑިސްއިންފެކްޝަނަށް ފަހު މިއަދުގެ ފަތިސް ނަމާދަށް މިސްކިތްތައް އަލުން ހުޅުވާފައިވާ ކަމަށެވެ.
މިއީ ކޮވިޑް-19 ފެތުރިފައިވާ މާލޭގައި ބަލި ޖެހިފައިވާ ބަޔަކު ގޮސްފައި ވާތީ މިސްކިތްތަކެއް ބަންދުކޮށް ޑިސްއިންފެކްޓް ކުރި ފުރަތަމަ ފަހަރެވެ.
މާލެ ސަރަހައްދުން ކޮވިޑް-19 ފެނުމުގެ ކުރިން ވެސް ޖަމާއަތްތަކަށް މީހުން އެއްވާ ތަންތަން ހުއްޓުވުމަށް އެޅި ފިޔަވަޅުތަކުގެ ތެރެއިން، މިސްކިތްތަކުގައި ޖަމާއަތް ހަދައި ނަމާދުކުރުން ވެސް ވަނީ ހުއްޓާލާފަ އެވެ. ޖަމާއަތުގައި ނަމާދުކުރުން ފަށާފައި ވަނީ ލޮކްޑައުންއަށް ދިން ލުއިތަކާ އެކު މި މަހުގެ އެއް ވަނަ ދުވަހު އެވެ.
