ދުއްވާލަން ގެންދިޔަ ސައިކަލެއް ގެއްލުނު މައްސަލައެއްގައި ސައިކަލުގެ ފުރިހަމަ އަގު ދައްކަން ސައިކަލާ ހަވާލުވި މީހާގެ މައްޗަށް ކުރި ހުކުމް ހައި ކޯޓުން މިއަދު ދަމަހައްޓައިފި އެވެ.
އޮގަސްޓް، 2017 ގައި މީހެއްގެ ސައިކަލު ދުއްވާލަން ގެންގޮސް ޕާކް ކޮށްފައި ހުއްޓާ ވަގަށް ނެގި މައްސަލައެއްގައި ސައިކަލުގެ ވެރިމީހާ ދައުވާކުރީ ސައިކަލާ ހަވާލުވެގެން ދިޔަ މީހާގެ މައްޗަށެވެ. އެ މީހާގެ މައްޗަށް ސިވިލް ކޯޓުން 2018 ވަނަ އަހަރު ހުކުމްކުރީ އެ ސައިކަލުގެ ފުރިހަމަ އަގަށްވާ 94،000ރ. އެއް މަސް ތެރޭގައި ދެއްކުމަށެވެ.
އެ މައްސަލަ އޭނާގެ ފަރާތުން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައިވަނީ ބޭނުން ކުރުމަށް ފަހު އަނބުރާ ހަވާލުކުރާ ގޮތަށް އާރިއާއެއްގެ ގޮތުގައި ގެންދާ މުދަލެއް ގެއްލުނީ ނުވަތަ ހަލާކުވީ އެ މުދަލަކާ ހަވާލުވި މީހާގެ އިހުމާލުން ކަމަށް ނުވިޔަސް، އޭގެ އަގު އެ މީހަކު އަދާ ކުރަން ޖެހޭނެ ކަމަށް އިސްލާމީ ޝަރީއަތުގެ ޖުމްހޫރު އިލްމުވެރިން އިއްތިފާގުވާ ކަމަށެވެ. އެ މައްސަލާގައި އެ މީހާ ސައިކަލު ގެންދިޔައީ އަނބުރާ ގެންނަ ގޮތަށް ކަމަށްވާތީ އެއީ އާރިއާގެ ރުކުންތައް ފުރިހަމަވާ މުއާމަލާތެއް ކަމަށް އެ ހުކުމުގައިވެ އެވެ.
މީގެ އިތުރުން އެ ސައިކަލު ވަގަށް ނެގިި މީހަކު ހޯދި އަދި އޭނާގެ މައްޗަށް ޖިނާއީ ކުށް ސާބިތުވެއްޖެ ނަމަ، ސައިކަލުގެ އަގަށް ދައްކަން ޖެހުނު ފައިސާ އެ މީހަކު އަތުން ހޯދުމުގެ ބާރު ސައިކަލާ ހަވާލުވި މީހާއަށް އޮންނާނެ ކަމަށް ދަށު ކޯޓުން ކަނޑައަޅާފައިވާތީ އެ ހުކުމް ރަނގަޅު ކަމަށް ހައި ކޯޓުގެ ހުކުމުގައިވެ އެވެ.
އެ މައްސަލަ ބެއްލެވީ ފަނޑިޔާރު ހުސައިން ޝަހީދާއި ފަނޑިޔާރު އަބްދުﷲ ހަމީދު އަދި ފަނޑިޔާރު ޝުއައިބު ހުސައިން ޒަކަރިއްޔާ އެވެ.
