އިސްލާމްދީނާއި ދިވެހި ގައުމަށް ނިކަމެތިކަން ލިބޭ ފަދަ އެއްވެސް ކަމެއް ރައީސް އިބްރާހީމް މުހައްމަދު ސޯލިހު ނުކުރައްވާނެ ކަމަށް ވިދާޅުވެ، އެމަނިކުފާނަށް އަމާޒުވާ ފާޑުކިއުންތައް ޝެއިހު ޑރ. އިޔާޒް އަބްދުއްލަތީފާއި ޝެއިހް އިލްޔާސް ދިފާއުކުރައްވައިފި އެވެ.
ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީގެ އިސްކޮށް އުޅުއްވާ މި ދެ ބޭފުޅުން ރައީސަށް އޮތް ޔަގީންކަން ހާމަކުރައްވައި މި ޓުވީޓް ކުރެއްވީ އެމަނިކުފާނުގެ ވެރިކަމުގައި ގައުމުގެ މިނިވަންކަމަށް ބުރޫއަރާ ކަމުގެ ތުހުމަތުތަކަށް ރައްދު ދެއްވަމުންނެވެ. މި ވެރިކަން ފެށުނު ފަހުން، އަވަށްޓެރި އިންޑިއާ އާ ގުޅުން ބަދަހިކޮށް، ކުދިކުދި މަސައްކަތްތަކުން ފެށިގެން ބޮޑެތި މަޝްރޫއުތަކާ ހަމައަށް އިންޑިއާ އަށް ބަރޯސާވުމަކީ މިނިވަންކަމަށް ނުފޫޒު ފޯރުވަން އެ ގައުމަށް ދޭ ޖާގައެއްގެ ގޮތުގައި އިދިކޮޅުން ދަނީ ބުނަމުންނެވެ.
ރާއްޖޭގައި އިންޑިއާ ސިފައިން ތިބުމާ ދެކޮޅަށް އަޑުއުފުލައި، އެ މީހުން ރާއްޖެ އިން ބޭރުކުރަން ވެސް އިދިކޮޅުން އަންނަނީ ސަރުކާރަށް ޕްރެޝަރުކުރަމުންނެވެ.
އިންޑިއާ އައުޓްގެ ނަމުގައި އިދިކޮޅުން ކުރާ ކެމްޕޭނަކީ ފިތުނައެއްގެ ގޮތުގައި ސިފަކުރައްވައި، ބޭރު ބައެއްގެ އަތްދަށަށް ރާއްޖެ ގެންދެވޭ ވަރަށް ވުރެ ރައީސްގެ ހިކުމަތްތެރިކަމާއި ކެރުންތެރިކަން މާ ބޮޑުކަމަށް ފޮރިން މިނިސްޓަރު އަބްދުﷲ ޝާހިދު ނޫހަކަށް ދެއްވި އިންޓަވިއު އަށް ތާއީދު ކުރައްވައި އިޔާޒު ކުރެއްވި ޓުވީޓުގައި ވިދާޅުވީ ރައީސްއާ މެދު އެ ޔަގީންކަން އެބައޮތް ކަމަށެވެ.
"ދިވެހިރާއްޖެ އަށް ނިކަމެތިކަން ލިބޭ ފަދަ އެއްވެސް ކަމެއް ރައީސް ނުކުރައްވާނެ ކަމުގެ ފުރިހަމަ ޔަގީންކަން އެބައޮތް،" އިޔާޒް ވިދާޅުވި އެވެ.
އިލްޔާސް ކުރެއްވި ޓުވީޓުގައި ވިދާޅުވި ގޮތުގައި ހަގީގަތާ ޚިލާފު ދޮގު ވާހަކަތައް ފެތުރިޔަސް ހަގީގަތް އޮޅުވައެއް ނުލެވޭނެ އެވެ. ރައީސް އިބްރާހިމް މުހައްމަދު ސޯލިހްގެ ސަރުކާރުން ރާއްޖޭގެ އިސްލާމީ ވަހުދަތާއި އިސްތިގުލާލް ނަގާލަން މަސައްކަތްކޮށްފާނެ ކަމަކަށް ގަބޫލުނުކުރައްވާ ކަމަށް އޭނާ ވިދާޅުވި އެވެ.
ޚާރިޖީ ގުޅުންތަކުގައި މި ސަރުކާރުން ގެންގުޅޭ ސިޔާސަތުތަކާ މެދު އިދިކޮޅުގެ ނުރުހުމަށް ރައްދު ދެއްވަމުން ރައީސް ވިދާޅުވެފައި ވަނީ، ބައިނަލްއަގުވާމީ އާއިލާއާ ރާއްޖެ ގުޅުން ބަދަހިކުރަމުން އަންނާނީ މިނިވަންކަމާއި ސިޔާދަތު ނުގެއްލޭ ގޮތަށް ކަމަށެވެ. ގުޅުންތަކުގައި ރާއްޖޭގެ އަމިއްލަ މިނިވަންކަމާއި ސިޔާދަތު ފުރިހަމައަށް ރައްކާތެރިކޮށް ރައްޔިތުންނަށް ފައިދާވާނެ ގޮތަށް ސަރުކާރުން މަސައްކަތް ކުރައްވާނެ ކަމަށް ވިދާޅުވި އެވެ.
އެމަނިކުފާނުގެ ވެރިކަމުގެ ފުރަތަމަ ދުވަހުން ފެށިގެން ވެސް ތަންފީޒުކުރައްވަނީ އެ ސިޔާސަތު ކަމަށާއި ކުރިއަށް އޮތް ތަނުގައި ވެސް ދަމަހައްޓަވާނީ އެ ސިޔާސަތު ކަމުގެ ޔަގީންކަން ރައީސް ވަނީ ދެއްވައިފަ އެވެ.
އިންޑިއާ އިން ރާއްޖެ އަޅުވެތިކުރުން ދެކޮޅުކަމުގެ ޝުއޫރުތަކާ އެކު މާލެ އާއި ރަށްތަކުގައި މުޒާހަރާތައް ވެސް ކޮށްފައިވެ އެވެ. ރާއްޖޭގައި އިންޑިއާގެ ގިނަ އަދަދެއްގެ ސިފައިން ތިބޭ ކަމުގެ ހިތްހަމަނުޖެހުންތަކާ އެކު އަދަދު ހާމަކުރަން ގޮވާލި ނަމަވެސް އެއީ ގައުމީ ސަލާމަތާ ގުޅުން ހުރި ކަމެއް ކަމަށް ބުނެ ސަރުކާރުން ވަނީ އަދަދު ހާމަކުރަން ދެކޮޅު ހަދައިފަ އެވެ.
