ލަންޑަން (ޑިސެމްބަރު 14) - އިނގިރޭސި ޕްރިމިއާ ލީގުގައި ރޭ ފުލަމްއާ 1-1 އިން އެއްވަރުވެ ލީގުގެ އެއް ވަަނަ އަށް އަރަން ލިވަޕޫލަށް ލިބުނު ފުރުސަތު ނަގާލިއިރު، އަމިއްލަ ދަނޑުގައި 1-0 އިން ބާންލީ އަތުން ބަލިވެ އާސެނަލަށް ޕްރެޝަރު ބޮޑުވެއްޖެ އެވެ.
ލީގުގެ އެއް ވަނައިގައި އޮތް ޓޮޓެންހަމް ރޭ ރަށުންބޭރުގައި ކްރިސްޓަލް ޕެލަސްއާ 1-1 އިން އެއްވަރުވުމުން ލިވަޕޫލަށް އޮތީ ފުލަމް ބަލިކޮށްގެން އެއް ވަނައިގައި ދެ ޕޮއިންޓުގެ ލީޑެއް ނެގުމުގެ ފުރުސަތު ލިބިފަ އެވެ. އެކަމަކު އެ ލިވަޕޫލަށް މޮޅެއް ނުހޯދުނެވެ. ލީގުގެ އެއް ވަނައިގައި އޮތް ޓޮޓެންހަމާއި ދެ ވަނައިގައި އޮތް ލިވަޕޫލަށް 12 މެޗުން ލިބިފައިވަނީ 25 ޕޮއިންޓެވެ. ފައިދާ ގޯލުން ޓޮޓެންހަމް ކުރީގައި އޮތްއިރު ލީގުގެ އެއް ވަނަ ކަނޑައަޅަން ބުދަ ދުވަހު ލިވަޕޫލް ދަނޑުގައި ޓޮޓެންހަމާ ކުޅޭ މެޗު ދެ ޓީމަށް ވެސް މުހިއްމުވާނެ އެވެ.
ހެރީ ކޭން ޓޮޓެންހަމަށް ލީޑުނަގައިދީފައިވަނިކޮށް ދެ ވަނަ ހާފްގައި ކްރިސްޓަލް ޕެލަސް އަށް އެއްވަރުކޮށްދިނީ ޖެފްރީ ޝްލަޕް އެވެ.
ލިވަޕޫލުން ލީގުގެ 18 ވަނައިގައި އޮތް ފުލަމްއާ ދެކޮޅަށް މެޗު ފެށީ ލަސް ކުޅުމަކުންނެވެ. އޭގެ ފައިދާނަގައި ފުލަމް އިން ލިވަޕޫލް ގޯލަށް މެޗުގެ ފުރަތަމަ ހާފުގައި ނުރައްކާ ކުރި އެވެ. ފުލަމްގެ ކުރިއަށް ކުޅޭ އިވާން ކަވަލޭރޯ ޖެހި ދެ ބޯޅައެއް ލިވަޕޫލްގެ ކީޕަރު އެލިސަން ބެކާ ވަނީ ހުއްޓުވައިފަ އެވެ. ފުލަމް އަށް ލީޑުނަގައިދިނީ ބޮބީ ޑިކޯޑޯވާ-ރީޑް އެވެ. ލިވަޕޫލަށް ފުރަތަމަ ހާފުގައި އެއްވަރުކޮށްދޭން މުހައްމަދު ސަލާހާއި ސަޑިއޯ މާނޭ އަށް ލިބުނު ފުރުސަތުތަކުގެ ބޭނުމެއް ނުހިފުނެވެ.
އަނިޔާގެ ސަބަބުން ޖޮއެލް މަޓިޕް ދެ ވަނަ ހާފްގައި ބަދަލުކުރަން ޖެހުނުއިރު ލިވަޕޫލްގެ ފަހަތަށް ފަހު ހާފުގައި ކުޅުނީ ކެޕްޓަން ޖޯޑަން ހެންޑަސަން އެވެ. ރޭ އެ ޓީމުން އެއްވަަރުކުރީ މެޗު ނިމެން 11 މިނިޓަށް ވެފައި ވަނިކޮށް ލިބުނު ޕެނަލްޓީ އަަކުންނެވެ. ފުލަމްގެ ކަމާރާ އަތުގައި ޖެހުނު ބޯޅައަކުން ލިބުނު ޕެނަލްޓީ ސަލާހު ވަނީ ގޯލުގެ ތެރެއަށް ފޮނުވާލައިފަ އެވެ.
ލިވަޕޫލްގެ ކޯޗު ޔާގެން ކްލޮޕް ބުނީ އެއް ހާފުގައި ރަނގަޅަށް ކުޅެގެން މެޗަކުން މޮޅުވާން އުނދަގޫވާނެ ކަމަށާއި ހަގީގަތުގައި އެންމެ އުނދަގޫ އެއް ކަމަކަށް ދިމާވީ ފުލަމް އިން މީގެ ކުރިން އެ މީހުން ކުޅެމުން އައި ސްޓައިލް ބަދަލުކޮށް ދިގު ބޯޅަތަކެއް ޖަހައިގެން ކުޅެން ފެށުމުންނެވެ.
ރޭ އާސެނަލް އަމިއްލަ ދަނޑުގައި ބާންލީ އަތުން ބަލިވިއިރު، މިއީ ފާއިތުވި 61 އަހަރު ތެރޭ އަމިއްލަ ދަނޑުގައި އާސެނަލް ޖެހިޖެހިގެން ހަތަރު މެޗުން ބަލިވި ފުރަތަމަ ފަހަރެވެ. އާސެނަލަށް މި މެޗުގައި މައްސަލަ ދިމާވީ މެޗުގެ 56 ވަނަ މިނިޓްގައި ގްރޭނިޓް ޝާކާ އަށް ރަތް ކާޑު ދެއްކުމުންނެވެ. އޭނާ އަށް ރަތް ކާޑު ދެއްކީ ބާންލީގެ އެޝްލީ ވެސްޓްވުޑް ކަރުގައި ހިފުމުންނެވެ. ބާންލީ ޖެހި ގޯލަކީ އާސެނަލްގެ ކެޕްޓަން ޕިއޭ އެމެރިކް އޮބާމަޔަން އަތުން ބައިިކޮޅަށް ވަން ގޯލެކެވެ.
މި ބައްޔާ އެކު އާސެނަލް އޮތީ 12 މެޗުން ލިބުނު 13 ޕޮއިންޓާ އެކު ލީގުގެ 15 ވަނައިގަ އެވެ. ރޭ ލެސްޓާ ސިޓީ ވަނީ އަމިއްލަ ދަނޑުގައި 3-0 އިން ބްރައިޓަން ބަލިކޮށްފަ އެވެ. އަދި ސައުތެމްޓަން ވަނީ 3-0 އިން ޝެފީލްޑް ޔުނައިޓެޑް ބަލިކޮށްފަ އެވެ. ލެސްޓާ ތިން ވަނަ އަށް އެރީ 12 މެޗުން 24 ޕޮއިންޓާ އެކު އެވެ. ސައުތެމްޓަން ހަތަރެއްގައި އޮތީ 12 މެޗުން 23 ޕޮއިންޓާ އެކު އެވެ. ޗެލްސީ ފަސް ވަނައިގައި އޮތީ 12 މެޗުން 22 ޕޮއިންޓް ހޯދައިގެންނެވެ.
