22 ފެބުރުއަރީ 2021 - 07:10
އިންޑިއާ ރައްޔިތުންނަށް ދަތިވާ ބޮޑެތި މައްސަލަތަކުގައި ބޮލީވުޑްގެ މަޝްހޫރު ދެ ތަރިން ކަމަށްވާ އަމީތާބް ބައްޗަން އާއި އަކްޝޭ ކުމާރު އެއްވެސް ވާހަކައެއް ނުދައްކާތީ އެއީ އަސްލު ހީރޯ އިން ނޫން ކަމަށް ބުނެ އިންޑިއާގެ އިދިކޮޅު މައި ޕާޓީ ކޮންގްރެސްގެ އިސް ވެރިޔަކު ދިން އިންޒާރަކާ ގުޅިގެން އަމީތާބްގެ ގޭގެ ސެކިއުރިޓީ ވަރުގަދަކޮށްފި އެވެ.
މީޑިއާތަކުން ބުނީ މުމްބާއީގެ ޖޫހޫގައި ހުންނަ އަމީތާބްގެ ގެ ޖަލްސާގެ ބޭރުގައި މިހާރު ފުލުހުން ފޯރިމަރަމުން އަންނަ ކަމަށެވެ.
ކޮންގްރެސް ޕާޓީގެ މަހާރަޝްތުރާ ސްޓޭޓްގެ ޗީފް ނާނާ ޕަޓޯލޭ އަމީތާބާއި އަކްޝޭއާ ދެކޮޅަށް ވާހަކަ ދެއްކީ މިހާރު ޕެޓްރޯލް އަގުބޮޑުވެގެން އެކަމުގެ ތަކުލީފު ރައްޔިތުން އުފުލާތީ އެ މައްސަލާގައި އެއްޗެއް ނުބުނެ ހިމޭނުން ތިބޭ ކަމަށް ބުނެ އެވެ. އޭނާ ބުނީ އެފަދަ މީސްމީހުންނަކީ ގައުމުގެ އަސްލު ބަތަލުންގެ ގޮތުގައި ނުދެކޭ ކަމަށާއި އަމީތާބާއި އަކްޝޭގެ ފިލްމުތައް ވެސް ރިލީޒްކުރާ ކޮންމެ ފަހަރަކު އެ މީހުންނާ ދެކޮޅަަށް ނުކުނެ އަޑު އުފުލާނެ ކަމަށެވެ.
"އަދިި އެ މީހުން ފެންނަ ކޮންމެ ތާކުން އެ މީހުންނާ ދިމާއަށް އަހަރެމެން ކަޅު ދިދަ ނަގައި އަޑު އުފުލާނަން. މިއީ ޑިމޮކްރަސީގެ ތެރެއިން އަހަރެމެންނަށް ލިބިގެންވާ ހައްގެއް،" ޕަޓޯލޭ ބުންޏެވެ.
އޭނާ ބުނީ ޒާތީ ގޮތުން އަމީތާބާއި އަކްޝޭ ފަދަ ނުފޫޒު ގަދަ ފިލްމީ ތަރިންނާ ދޭތެރޭ އެއްވެސް މައްސަލައެއް ނެތް ކަމަށެވެ.
I didn't speak against Akshay Kumar&Amitabh Bachchan but against their work. They're not real heroes. If they were, they would've stood beside people during their sufferings. If they want to continue being 'kagaz ke sher', then we don't have any problem:Maharashtra Congress chief pic.twitter.com/ryozCkjnLs
— ANI (@ANI) February 20, 2021
"އެކަމަކު އެ މީހުންގެ އަމަލުތަކާ ދޭތެރޭ އަހަރެމެން ހިތްހަމަނުޖެހެނީ. ހަގީގީ ބަތަލުން ކަމަށް ވަންޏާ ގައުމުގައި ހުރި ރައްޔިތުންނަށް ދަތިވާ މައްސަލަތަކުގައި އެ މީހުން ވާހަކަ ދައްކައި ބަސް ބުނާނެ،" ޕަޓޯލޭ ބުންޏެވެ. "އެ މީހުންނަށް ކަމެއް ދިމާވާ ވަގުތެއްގައި ވިއްޔާ ރައްޔިތުންގެ ގާތަށް ވެސް އާދެވޭ. އަދި ރައްޔިތުންގެ ބޭނުން ހިފޭ. އެކަމަކު އާދައިގެ ރައްޔިތުންނަށް ކަމެއް ޖެހޭ ވަގުތެއްގައި އެއްޗެއް ބުނެލެވޭ ކަމަކަށް ވެސް ނުވޭ."
އަމީތާބްގެ ފިލްމު "ޖުންދު" މި އަހަރުގެ ޖޫން 18 ގައި ރިލީޒްކުރަން ތާވަލުކޮށްފައިވާ އިރު އަކްޝޭގެ "ސޫރިޔަންވަންޝީ" އެޕްރީލް 2 ގައި، "ބެލް ބޮޓަމް" މެއި 28 ގައި، "އަތުރަންގީ ރޭ" އޮގަސްޓް 6 ގައި އަދި "ޕްރިތުވީރާޖް" ނޮވެމްބަރު 5 ގައި ސިނަމާތަކަށް ގެންނާނެ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ދެން އެމީހަކު
22 February 2021
މިއަދި ދޫނިރާއްޖޭގަ ނުކުރާ ކަމެއް. މިހާރު މި އިންތިޒާރު ކުރަނީ މިފަދަ މަންޒަރަކަށް!