ފަނޑިޔާރު މަހާޒް (މ) ގައި: ފަނޑިޔާރުންގެ އިސްތިއުނާފް މަޖިލީހަށް އޭނާ ވަނީ އައްޔަން ކުރައްވާފައި --- ފޮޓޯ/މިހާރު
23 ފެބުރުއަރީ 2021 - 14:15
1 comments
ފަނޑިޔާރުންގެ އިސްތިއުނާފް މަޖިލީހަށް ސުޕްރީމް ކޯޓުން އައްޔަންކުރާ ފަނޑިޔާރަކަށް އެ ކޯޓުގެ ފަނޑިޔާރު މަހާޒް އަލީ ޒާހިރު އައްޔަން ކުރައްވައިފި އެވެ.
ޖުޑީޝަލް ސާވިސް ކޮމިޝަން (ޖޭއެސްސީ) ގެ ގާނޫނު ބުނާ ގޮތުން ފަނޑިޔާރުންނާ މެދު އެ ކޮމިޝަނުން އަޅާ ފިޔަވަޅުތަކާ މެދު އެ ނިންމުންތައް އިސްތިއުނާފް ކުރެވޭނީ ފަނޑިޔާރުންގެ އިސްތިއުނާފް މަޖިލީހުގަ އެވެ. އެ މަޖިލީހަކީ ތިން މަރުހަލާގެ ކޯޓުގެ ތިން ފަނޑިޔާރުން ތިއްބަވާ މަޖިލީހެކެވެ.
ސުޕްރީމް ކޯޓުން ބުނީ އެ މަޖިލީހަށް ފަނޑިޔާރު މަހާޒް މިއަދު ހަމަޖައްސާފައިވާ ކަމަށެވެ. ކުރިން ޑްރަގް ކޯޓުގެ ގާޒީ ކަން ކުރެއްވި މަހާޒް ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވީ 2019 ވަނަ އަހަރު އެވެ.
ފަނޑިޔާރުންގެ އިސްތިއުނާފް މަޖިލީހަށް ފަނޑިޔާރުން އައްޔަން ކުރަނީ އެއް އަހަރަށެވެ. މިދިޔަ އަހަރު ސުޕްރީމް ކޯޓުގެ ފަނޑިޔާރުންގެ ތެރެއިން އެ މަޖިލީހުގައި އިންނެވީ ފަނޑިޔާރު ޑރ. އަޒްމިރަލްދާ ޒާހިރެވެ.
ދާދިފަހުން ހައި ކޯޓުން ވެސް ވަނީ މިއަހަރަށް އެ މަޖިލީހަށް އައްޔަންކުރާ ފަނޑިޔާރެއްގެ ގޮތުން އެ ކޯޓުގެ ފަނޑިޔާރު ހަސަން ޝަފީއު ހަމަޖައްސައިފަ އެވެ.
ފަނޑިޔާރުންނާ މެދު ޖޭއެސްސީން އަޅާ ފިޔަވަޅުތަކުގެ ތެރެއިން ފަނޑިޔާރުން ވަކިކުރަން ރައްޔިތުންގެ މަޖިލީހަށް ހުށަހަޅަން ޖޭއެސްސީން ނިންމާ ނިންމުންތަކެއް ފަނޑިޔާރުންގެ އިސްތިއުނާފް މަޖިލީހަކަށް ނުބެލޭނެ އެވެ. އަދި ޖޭއެސްސީން އަޅާ ފިޔަވަޅު ބަދަލު ކުރުމާއި މައްސަލަ އަލުން ބެލުން ފަދަ ބާރުތަކެއް ވެސް އެ މަޖިލީހަކަށް ނޯވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފިރުލާ
23 February 2021
އެއްވެސް ކަމެއް ބެލުމުގެ ބާރެއް ނެތް، ދަތް ނެތް ސިންގާއެއް ކަހަލަ މަޖިލިހެއް ދޯ. ހިސާނުމެން ހުރިހާ ކަމެއް ބޭނުން ގޮތަކަށް ނިންމާ ތަނެއް ޖުޑިޝަރީއަކީ މިހާރު. ތި މަޖިލިހުގެ މެންބަރަކަށް ހުރުމަކީވެސް ލިބިގަންނަ ދެރަ ކަމެއް.