ދެ ކޯޓެއް ހިންގާ ޖަސްޓިސް ބިލްޑިން: އަންނަ އަހަރުގެ ބަޖެޓްގައި ޖުޑިޝަރީއަށް ހިމަނާފައިވަނީ 100 މިލިއަން ރުފިޔާ މަދުކޮށް --މިހާރު ފޮޓޯ/ނިޝާން އަލީ
14 ނޮވެމްބަރ 2016 - 12:04
58 comments
އަންނަ އަހަރުގެ ބަޖެޓުން ޝަރުއީ ދާއިރާ އަށް ކަނޑައަޅާފައިވާ އަދަދުން ފަނޑިޔާރުންނާއި މުވައްޒަފުންގެ މުސާރަ އާއި އިނާޔަތްތައް ވެސް ނުދެވޭނެ ކަމަށް ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.
އަންނަ އަހަރަށް ޝަރުއީ ދާއިރާ އަށް ލަފާކުރާ ބަޖެޓް ޑީޖޭއޭ އިން ފިނޭންސް މިނިސްޓްރީ އަށް ހުށަހެޅި އިރު އޮތީ 475 މިލިއަން ރުފިޔާ އެވެ. ނަމަވެސް ފިނޭންސް މިނިސްޓްރީން މަޖިލީހަށް ބަޖެޓް ހުށަހެޅި އިރު އޮތީ އެ އަދަދު 367 މިލިއަން ރުފިޔާ އަށް ދަށް ކޮށްފަ އެވެ.
ޑީޖޭއޭ އިން ނެރެފައިވާ އަންނަ އަހަރުގެ ޝަރުއީ ދާއިރާގެ ބަޖެޓް ރިޕޯޓްގައިވާ ގޮތުން ފަނޑިޔާރުންނާއި ކޯޓުތަކުގެ މުވައްޒަފުންނާއި ޖުޑިޝަލް އެކަޑަމީ އާއި ކޯޓުތަކުގެ ސަރަހައްދީ ގޮފިތަކުގެ މުވައްޒަފުންގެ މުސާރަ އާއި އިނާޔަތްތަކަށް 378 މިލިއަން ރުފިޔާ ބޭނުންވެ އެވެ. އެކަމަކު ޝަރުއީ ދާއިރާގެ ހުރިހާ ކަމަކަށް ސަރުކާރުން ހުށަހެޅީ 367 މިލިއަން ރުފިޔާގެ ބަޖެޓެއް ކަމަށް ވާ އިރު އެ އިން މުސާރަ އާއި އިނާޔަތްތައް ވެސް ހަމަ ނުޖެއްސޭނެ ކަމަށް ރިޕޯޓްގައިވެ އެވެ. އަދި މި އަހަރު ވެސް މުސާރަ އާއި އިނާޔަތްތަކަށް އެކަށީގެންވާ ބަޖެޓެއް ނުލިބޭތީ ތިން މިލިއަން ރުފިޔާގެ ދަތިތަކެއް ކުރިމަތިވި ކަމަށް އެ ރިޕޯޓްގައި ބުނެފައިވެ އެވެ.
"2017 ވަނަ އަހަރަށް ބަޖެޓް ސީލިންގެ ތެރެއިން ޝަރުއީ ދާއިރާ އަށް އަންދާޒާ ކޮށްފައިވާ ބަޖެޓުން ބޮޑު ބައެއް އުނި ކުރުމުގެ ސަބަބުން ދާއިރާގެ ހިންގުން ހުއްޓުމަކަށް އަންނާނެ،" އެ ރިޕޯޓްގައިވެ އެވެ.
މަޖިލީހަށް ހުށަހަޅާފައިވާ ބަޖެޓްގެ ސަބަބުން ފަނޑިޔާރުންނަށް އިތުރު ތަމްރީނު ދިނުމާއި ކޯޓުތައް މަރާމާތު ކުރުމާއި މައްސަލަތައް އަވަހަށް ނިންމަން ރަށްރަށަށް ކުރަންޖެހޭ ދަތުރުތައް ވެސް އަންނަ އަހަރު ހުއްޓުމަކަށް އަންނާނެ ކަމަށް ރިޕޯޓްގައި ބުނެފައިވެ އެވެ.
މީގެ އިތުރުން ފަނޑިޔާރުންގެ އިންޝުއަރެންސް މި އަހަރުން ފެށިގެން ބޮޑު ކޮށްފައިވާ އިރު އަންނަ އަހަރުގެ ބަޖެޓްގައި އެ ފައިސާ ހިމަނާފައި ނެތުމުން ފަނޑިޔާރުންގެ އިންޝުއަރެންސް ހުއްޓުމަކަށް އަންނާނެ ކަމަށް ވެސް ރިޕޯޓްގައިވެ އެވެ.
އެ ރިޕޯޓްގައިވާ ގޮތުން ޑީޖޭއޭ އިން ސަރުކާރަށް ހުށަހެޅި 475 މިލިއަން ރުފިޔާގެ ބަޖެޓަކީ މި އަހަރު ޝަރުއީ ދާއިރާ އަށް ލިބުނު ބަޖެޓަށް ވުރެ ހަ މިލިއަން ރުފިޔާ ކުޑަ ބަޖެޓެކެވެ. އެ އަދަދަކީ ކުޑަ ކުރެވެން ހުރި ހުރިހާ ޚަރަދުތަކެއް ކުޑަކޮށް، ޕްރޮގްރާމްތައް ދުރާލައި ރޭވުމަށް ފަހު ފަހު ހުށަހެޅި އަދަދެއް ކަމަށް ރިޕޯޓްގައިވެ އެވެ.
ބަޖެޓް ކުޑަވުމުން އެކަމުގެ ޝަކުވާ ޑީޖޭއޭ އިން ކުރި އިރު ފިނޭންސް މިނިސްޓަރު މުހައްމަދު މުނައްވަރު ވިދާޅުވެފައިވަނީ ބަޖެޓް ބޮޑު ކުރުމުގެ ވިސްނުން މުއައްސަސާތަކުން ދޫކޮށްލަންޖެހޭ ކަމަށެވެ. ބަޖެޓް ދިރާސާ ކުރުމާއި ބަހުސް މަރުހަލާ މަޖިލީހުގައި މިހާރު ދަނީ ހިނގަމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހުސައިން
16 November 2016
އަތޮޅުކޯޓުގެ ސިސްޓަމް ދިވެހިރާއްޖޭގައި ތައާރަފު ކުރަންވީ.އެއްވެސް މައްސަލައެއްނުބަލާ ކިތައްކޮޓުތޯ މިދިވެހިރާއްޖޭގައިހުރީ. މިއަދުވެސް ދިވެހިރާއްޖޭގެ އުތުރާއި ދެކުނުގައި ހައިކޯޓުގެ ދެގޮފި ހަދައިގެން އެކުރާކަންތައް ބަލައިގަންނާނީ ކޮންގޮތަކުން ވިސްނައިގެންތޯ؟
މެންބަ
16 November 2016
މަބުނީ ކޮބައިހޭ މަޖިލީހު ބަޖެޓު. އެޔެއް ކުޑަކުރާކަށް ނުކެރޭހޭ ފިނޭންސަކަށް
އަލިބެ
16 November 2016
އަދިވެސް ބަޖެޓް ބޮޑީ... ނުކަތާވަރުގެ ޚަރަދުތައް ކުރާތީ، މިހުރިހާވެސް މައްސަލައަކީ.
ޙުސައިން
15 November 2016
ހުރިހާ ރަށު ކޯޓްތަކެއް ބަންދުކޮށްލަންވީ، ކާވެނި، ވަރި ކުރަން ވީމަ ކޮންމެ ތަނަކަށް ދުވަން ޖެހުނަސް އޭރުން ޚަރަަދު ބޮޑެއް ނުވާނެ.
ހުސްނާ
15 November 2016
ޖުޑިޝަރީގެ ތެރޭގައި ކޮންމެއަހަރަކުކުރާ ބޭކާރު ޚަރަދުތައް ކުޑަކޮށް ރަގަޅަށް މެނޭޖުކުރަން ދަންނަބަޔަކާއި ޖުޑިޝަރީހަވާލުކުރުމުން މިހާރަށްވުރެ ޖުޑިޝާރީގެ ކަންކަން ރަގަޅުވާެނެ.މިހާރުވެސް ކޯޓުތަކުގައި މަސައްކަތުމީހުން ގެންގުޅެމުން ކުންފުނިތަކާއި ހަވާލުކޮށްގެން ކޯޓުތައްކުނިކަހާ ސާފުކުރމުގެ ކަންކަން ކުރަމުންދާކަށް ކޯޓުތަކުގައި މަސައްކަުރާ އެންމެންނަށް އެނގޭނެ.
އުނބުށެން
15 November 2016
ބަޖެޓު ކުޑައީކީ ނޫން. މުސާރަ މާބޮޑީ. އަހަރަކު މައްސަލައެއް ނުނިންމާ ރަށު ކޯޓްތަކުގައި ތިބޭ މީހުންނަށްވެސް މަހަކު 25 ހާސް ރުފިޔާ ލިބޭކަމަށްވޭ. ވީއިރު މުސާރަ ދެވޭވަރު ނުވަނީ ބަޖެޓް ކުޑަވެގެންނެއް ނޫނެވެ. މުސާރަ އެކަށީގެންވާވަރަށްވުރެ ބޮޑުވީމައެވެ. އެކަން ހަމަޔަކަށް އެޅުވީމާ ތިޔަ ބަޖެޓުންވެސް ދަތިކަމެއް ނެތި މުސާރަ ދެވޭނެއެވެ.
މިނިވަނާ
15 November 2016
ތީ މުސާރަޔާ އިނާޔަތްކުޑަކޮށް ސައިޒު ކުރަން ޖެހިފައިވާ ދާއިރާއެއް!
ދޮޅުގަޑި ބައި
15 November 2016
367 މމިލިޔަން ރުފިޔާ!!! އަދުލުހިތައްއަރާ އިންސާފު ނެތް، ގައުމެއްގެ ޝަރުޢީ ދާއިރާޔަށްމީ ކިއްކުރަން ރައްޔިތުން ކުރާ ބޮޑު ޚަރަދެއްބާއޭ ހިތައްއަރާ.
އިންސާފު
15 November 2016
އަހަރެން ވަރަށް ތާއީދު. ރަށުކޯޓްގެ ވޮޗަރެއްގެ ގެއަށް ގެންދަންލިބޭ 10000 އަށްވުރެ މަދުނޫން ޢަދަދެއް. މަސައްކަތު މީހާއަށްވެސް އެވަރު ލިބޭ. އެމީހުންނަށް އެވަރު ލިބުމަކީ މައްސަލައެއްނޫން. މައްސަލައަކަށްވަނީ ދައުލަތުގެ ހަމަ އެ މަޤާމްތަކުގައި މަސައްކަތްކުރާ މީހުންނަށް 5000 ވެސް ނުލިބޭތީ. ހަމައާއި އުޞޫލުގެއްލިފައިވާތީ. މަގޭ ދެކޭގޮތުގައި ދައުލަތުގެ އެއްމަސައްކަތެއްކުރާ އެއްބަޔަކަށް އެއްމަޤާމެއްގައި ތިބޭނަމަ ކޮންމެތަނެއްގައި ވަޒީފާ އަދާކުރިއަސް ލިބެންޖެހޭނީ އެއްމުސާރަ. ކޮބާ ޕޭކޮމިޝަން. ކޮބާ އިންސާފާއި ހަމަހަމަކަން. ތިޔަ ރަށުކޯޓްތައް ރަނގަޅުވާނެ ދުވަލަކު ދެ ގަދިއިރަށް ހުޅުވާގޮތަށް ހަދާފަ އެލަވަންސްތައް އުނިކުރިއަސް. އެމީހުންނަށް މަހަކު މައްސަލައެއް ނުބެލޭ. ދެންތިބެނީ އިދާރީ ކަންކަން ކުރާ މީހުންނާއި ފޮޅާ ސާފުކުރާމީހުން. މިމީހުންނަށް ދެ ގަޑިއިރުން އެކަންކަން ކޮށްލެވޭނެ.
މުސާރަ
15 November 2016
އަޅުގަނޑު ނަގާނީ މުސާރާއިން އެއްމެ ޑޮލަރެއް! ~ ޑޮނަލްޑ ޓްރަމޕް