28 އެޕްރީލް 2021 - 08:27
1 comments
ކޮވިޑް-19 ގެ ނުރައްކާ ބޮޑުވެފައިވާ އިންޑިއާގެ ނާގްޕޫރް ސިޓީގެ ހޮސްޕިޓަލަކުން ފަރުވާދޭ ކޮވިޑް ބަލީގެ މީހުން ދޫކޮށްލާ އިރު، ކޮންމެ މީހަކު މަދުވެގެން 10 ގަސް އިންދަން އިރުޝާދު ދީފި އެވެ.
ބަލި މީހުން ދޫކޮށްލާ އިރު ދޭ ސަމަރީ ރިޕޯޓްގައި ގަސް އިންދަން އިރުޝާދު ދެމުން އަންނަނީ ނާގްޕޫރްގައި ހިންގާ ގެޓް ވެލް ހޮސްޕިޓަލުންނެވެ. އެތަނުން ކޮވިޑަށް ފަރުވާ ހޯދައި މި މަހުގެ 22 ގައި ޑިސްޗާޖްވި 41 އަހަރުގެ އަންހެނަކު ބުނި ގޮތުގައި އޭނާގެ ރިޕޯޓްގައި 10 ގަސް އިންދަން އިރުޝާދު ދީ ބުނެފައި ވަނީ، އެއީ ގުދުރަތީ ސާފު ވައިގެ މުހިއްމުކަން އަންގައި ދިނުމުގެ ގޮތުން ދީފައިވާ އިރުޝާދެއް ކަމަށެވެ.
"އޭގައި ފާހަގަކޮށްފައިވޭ އިންސާނަކަށް އޮކްސިޖަން ކިހާ މުހިއްމުކަމާއި ދުވާލެއްގެ މައްޗަށް ކިހާ އޮކްސިޖަނެއް ބޭނުންވާކަން ވެސް،" އަންހެން މީހާ ބުންޏެވެ.
ގެޓް ވެލް ހޮސްޕިޓަލްގެ މި ވާހަކަ މިހާރު މީޑިއާތަކުގެ ސަމާލުކަމަށް ވެސް އައިސްފައިވާ އިރު އެތަނުގެ ޑިރެކްޓަރު ޑރ. ރާޖޭޝް ސްވަރްނާކަރް ވިދާޅުވީ ގަސް އިންދަން، ބަލި މީހުންނަށް އިރުޝާދު ދެނީ ފަހަކަށް އައިސް ގިނަ ބަޔަކު ވެއްޓަށް ފަރުވާލެއް ނުބަހައްޓައި މާއްދީޔަތަށް ވެށި ގުރުބާންކުރާތީ ކަމަށެވެ.
"އަހަރެމެންނަށް ސާފު ވައި [އޮކްސިޖަން] ލިއްބައިދޭ މައިގަނޑު ވަސީލަތަކީ ސާފު ވެށި. އެކަމަކު އެ ވެށި ސާފުވާނީ ގަސްގަހާގެހީގެ ނިސްބަތް ވެސް އިތުރުވެގެން. ނަމަވެސް އޭގެ ބަދަލުގައި އަހަރެމެންގެ އާދަ އަކީ ގަސްކެނޑުން،" އޭނާ ވިދާޅުވި އެވެ. "އެހެންވީމަ އޮކްސިޖަނަކީ ކިހާ މުހިއްމު އެއްޗެއްކަން ތަޖުރިބާކުރަން ޖެހިފައިވާ ވަގުތެއްގައި އަހަރެމެން މި ލަފަ އާއި އިރުޝާދު ދެނީ ވީހާ ވެސް ގިނަ ބަޔަކު ވީހާ ވެސް ގިނައިން ގަސް އިންދަން ސަމާލުކަން ދިނުމަށް."
ޑރ. ރާޖޭޝް ވިދާޅުވި ގޮތުގައި މިހާރު ކޮވިޑަށް ފަރުވާ ހޯދާ ބަލި މީހުންނަށް 10 ގަސް އިންދަން އިރުޝާދު ދިނުމަކީ ގެޓްވެލް އިން އަލަށް ކުރާ ކަމެއް ނޫނެވެ.
"ޚުދު އަހަންނަކީ އާންމުކޮށް ބަލި މީހުންނަށް ލިޔެދޭ ބޭސް ސިޓީތަކުގައި އެ މީހަކު ބަލިން ރަނގަޅުވުމުން މަދުވެގެން އެއް ގަސް އިންދަން އިރުޝާދު ދޭ މީހެއް." އޭނާ ވިދާޅުވި އެވެ.
ރާޖޭޝް ވިދާޅުވީ އޭނާގެ ބައްޕަ އަކީ ސައިންސްވެރިއެއް ކަމަށާއި އެ މީހުންގެ އާއިލާ އަކީ ފެށުނީއްސުރެ ފެހިކަން ގަދަ ތަންތަނުގައި ދިރިއުޅެ، އެއިން ލިބޭ ފައިދާ އާއި އުފާތައް ތަޖުރިބާކޮށްފައިވާ ބައެއް ކަމަށެވެ.
"އެހެންވެ ގަހުގެ މުހިއްމުކަން ދުވަހަކު ވެސް ހަނދާން ނައްތައެއް ނުލަން." އޭނާ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ގެދާނޯމޮސް
28 April 2021
ސާފު ވައި ލިބިގަތުމާއި ފަތިހު އަރައިގެންއަންނަ އިރުގެ ހޫނުން ހަށިގަނޑާއި ލޮލައް ހޫނުކަން ލިބިގަތުމަށް މިހާލަތުގަ އަމުދުން އެންމެން ވަރައްބޮޑަށް ސަމާލުކަން ދެއްވަންޖެހެއެވެ. ގަހެއް އިންދިޔަސް އެއަށްވެސް ނޭވާލެވިގެން އެއިން ވައިކޮޅެއް ފޯރުކޮށް ދެވޭނީ އިމާރާތް ތައްގިނަކަމުން ގަސްހެލި ލާނެ ވައިކޮށްޅެއް އެއަށް ނުލިބެއެވެ. ރާއްޖެ ރައްޔިތުންނަށް އެންމެ ތާޒާވައި ލިބެނީ ރާޅުގޮނޑުދޮށް ތަކުންނެވެ. އެއީ ވަޔަކީ ކަނޑުން އަންނަ އެއްޗަކަށް ވާތީއެވެ.